The Definitive Guide to Living in the Capital , Cairo , Egypt

السلام عليكم، إزيكم يا أهل القاهرة؟ بعد أيام دموية عدت على كل بر مصر وسقوط عدد كبير من الضحايا، القاهرة بـ تعيش أسبوع مزحوم بالنهار بالمواصلات والبشر،  وبالليل مليان بالمدرعات العسكرية وكمائن الشرطة العسكرية بمناسبة حظر التجوال في الفترة من 7 مساءً: 6 صباحًا ونشكر ربنا أنه اتعدل علشان يبقى من 9 مساءً: 6 صباحًا ماعدا أيام الجمعة من 7 مساءً: 6 صباحًا، نتمنى الأيام دي تعدي على مصر بخير وتكون بداية لعصر جديد تكون فيه مصرنا في أحسن حال بعيد عن أي سيطرة ديكتاتورية.

بسبب الحرارة المرتفعة في نهار أيام الصيف “اللطيف” بـ تكون أغلب خروجاتنا بعد المغرب لكن مع حظر التجوال بقى لازم نخلص شغل ونجري بسرعة بسرعة نروَح  في زحمة المواصلات والطرق في القاهرة، الفترة خلال فترة حظر التجوال غريبة ومن كثر الملل ما بقيناش لاقيين حاجة نعملها، لكن بعد مرور 4 أيام من الحظر بقى عندنا خبرة ومواهب وأنشطة كثيرة نحب نشاركها معكم علشان ما تزهقوش ويوصل بكم الحال إلى عد بلاطات الشقة أو حساب سرعة النملة في الدقيقة أو حساب سعة التخزين للثلاجة أو حتى التلكيك لأي حد وخلاص (أهو كيفي كده).

 

أهم الأنشطة والحاجات اللي تقدروا تعملوها خلال حظر التجوال:

القراءة:

من الحاجات اللي إحنا دائمًا بـ نقول أن مالهاش وقت بسبب الخروج والشغل والنوم،  لكن الحظر بـ يعطيكم الفرصة أنكم تبصوا بصة على مكتبتكم وتعيدوا اكتشافها.

اكتشفوا نفسكم:

على طريقة الرياضي الجامد جدًا ممدوح فرج “هاي.. أنت” بـ نقول لكم ممكن تعيدوا اكتشاف نفسكم من ثاني وتعرفوا إيه موهبتكم وإيه اللي بـ يميزكم يعني مثلاً ممكن تبدأوا تدخلوا المطبخ (ولاد/ بنات) وتبدعوا. “يُفضل تكون الست الوالدة مش في البيت”، أو أنك تعلي صوتك بالغنا “برضه زي اللي قبلها” أو (للبنات)
بدل ما تلعبوا في الكهرباء وتولعوا في الشقة أو تختبروا مهارتكم في ميكانيكا السيارات، ممكن تجربوا حاجة أفضل من كده فيه آلاف من الوصفات علشان الاهتمام بصحة البشرة والشعر والصحة عمومًا، تقدروا تشوفوا أي وصفة تنفع وتجربوها وتسيبوها لمدة ساعتين ثلاثة وتشوفوا التأثير بس خلي بالكم مش عاوزين نشوف الرجل الأرجواني أو المرأة الفزدقي!

شوية نظام:

لو أنتم من اللي أهلهم بـ يقولوا لهم “نفسي أشوف المخروبة دي نظيفة” يبقى هـ تعجبكم قوي الهواية دي، 9 ساعات حظر كافيين قوي يخلوكم تعيدوا اكتشاف غرفكم وتعرفوا إيه السر في الكركبة وتكتشفوا فلوس هنا ولا هنا (مصلحة)، مش بس كده ممكن كمان تنزلوا تغسلوا عربياتكم وتكتشفوا حاجات كانت ضايعة منكم أو تهتموا أكثر بحيواناتكم الأليفة لو عندكم.

إعادة التواصل:

فترة وجودكم في البيت كافية قوي علشان تقدروا تعيدوا التواصل مع ناس تواصلكم قل معاهم سواء كانوا أقارب أو أصدقاء من أيام المدرسة.

اللعب:

ألعاب الفيديو بقيت دلوقت كثيرة لدرجة اللخبطة، ممكن فترة الحظر تخليكم تجربوا ألعاب جديدة أو تلعبوا لعبتكم المفضلة لغاية الصبح، كمان في المناطق المقفولة حظر التجوال مش حظر بمعنى الكلمة يعني ممكن تنزلوا تلعبوا في الشارع بس بلاش إزعاج ولا أغاني السرسجية بصوت عالي.

اتفرج واستفيد:

تعرفوا أن الأفلام الوثائقية تقدر تعطيك معلومات واستفادة علمية كأنك قرأت كتاب، تقدروا تشوفوا الأفلام الوثائقية على القنوات المتخصصة الموجودة على الأقمار الصناعية أو تنزلوها من على الإنترنت وبـ نضمن لكم أنكم هـ تعرفوا معلومات أول مرة تسمعوا عنها.

اكتب:

جربت نفسك في الكتابة، هتلر كتب كتاب “كفاحي” ومازال بـ يُباع لغاية دلوقت، جربوا كده واكتبوا شعر عن حالة الملل أو عن الحظر أو حتى اكتبوا خواطر، مين عارف يمكن الحظر ده يخلي مصر تفرح بنوبل ثانية في الأدب!

اتعلموا حاجة جديدة:

جربتوا تعرفوا إزاي تعملوا موقع على الإنترنت، جربتوا تتعلموا برنامج جرافيك؟، جربتوا تعزفوا على آلة موسيقية جديدة؟، 9 ساعات ممكن فيهم تتعلم شيء جديد سواء من خلال التجربة أو مشاهدة آلاف الفيديوهات على الإنترنت.

نتمنى تكون الأنشطة والأفكار دي عجبتكم وساعدت شوية في كسر ملل فترة حظر التجوال، بس مهما مليتم واتضايقتم بلاش قَلش (خصوصًا الرخيص) على خلق الله لأن فيه مرضى.. ربنا يعافينا.