The Definitive Guide to Living in the Capital , Cairo , Egypt

“زبالة”.. يع! اسمحوا لنا نتكلم المرة دي عن موضوع ممكن يكون مقرف شوية بالنسبة للبعض، لكن معلش استحملونا، هنتكلم عن الزبالة… أه الزبالة، هنقترح عليكم شوية حاجات كده لو قدرتوا تعملوها يمكن تكونوا جزء مهم من حل المشكلة الأزلية اللي بتعاني منها مصر وزهقت ناس كثير في عيشتها!

في ألمانيا ودول كثير بيعرفوا حاجة اسمها “فرز من المنبع” يعني ببساطة الناس من البيت بتقسم زبالتها في أكثر من كيس: واحد للبلاستيك، وواحد للزجاج، وواحد للورق، وواحد للمواد العضوية وباقي الزبالة، بالتالي الشركات اللي بتجمع الزبالة بيكون سهل عليها تدور الزبالة، وجمعها بدون أزمات… هنا بقى في مصر حدث ولا حرج، كله على بعضه من غير تمييز، والأصعب أن الدولة عمالة تجمع فلوس نظافة، وفيه كلام أنهم هيزودوها!

فيه جهات كثير بتشتري الزبالة المفروزة بـ “الكيلو” يعني لو فيه مكان مناسب تقدروا تحوشوا فيه الزجاجات البلاستيك، والزجاج، والورق ممكن توفروا ثمن فاتورة الكهرباء، أو على الأقل الجزء الخاص بالزبالة فيها! خلال السطور الجاية هنقول لكم على مجموعة من الناس اللي بتشتري الزبالة، منهم ناس بتشتري البلاستيك بس، ومنهم ناس بتشتري الزجاج بس، ومنهم ناس بتأخذ المعادن والألمونيوم، ومنهم ناس بتشتري كل شيء، هنعرض لكم الأسعار والتفاصيل، والاختيار لكم.

 

هيبكو إي جي.. كل حاجة

ده مصنع كوري في المنطقة الصناعية الثالثة لتدوير القمامة، مديره حب يعمل حاجة مبتكرة شويتين، فكر أنه بدل ما يشتري من وسطاء، قرر يروح بنفسه للمنبع ويوعي الناس بضرورة الفرز من المنبع، الأستاذ وليد منير مدير المصنع بدأ مؤخرًا يعمل ملصقات وإعلانات بسيطة تنصح  القائمين على المدارس والجامعات في 6 أكتوبر أنهم يحافظوا على أموالهم، وما يرموهاش في الشارع، ويبيعوها له.

وليد ومصنع التدوير بيشتروا زجاجات الزيت، والمياه المعدنية، والكوكاكولا والبيبسي والكانز الفارغة، كمان بيشتروا الكرتون والورق المستعمل، وزيوت التحمير بالكيلو، وكل ده له تسعيرة خاصة.

كيلو البلاستيك بـ 2 جنيه، والكانز بـ 3 جنيه، والكارتون والورق بـ 50 قرش، وزيت التحمير المستعمل المصفى بـ 2 جنيه للكيلو.. طبعًا مع الكميات الكبيرة، ولو فيه إمكانية للاتفاق مع باقي السكان، في رأينا أن الحصيلة ممكن يكون لا بأس بها.

لو عجبتكم الفكرة، وكنت من سكان أكتوبر أو الأماكن القريبة منها، وجمعتوا كمية كويسة، ممكن تتصلوا بأستاذ وليد على رقم 01090172831.

سمير عرابي.. كانز وألومنيوم

في شبرا الخيمة، فيه تاجر كبير اسمه سمير عرابي، متخصص في شراء زجاجات الكانز وأي حاجة ألومنيوم، لو كلمتوه هييجي لحد عندكم والسعر مغري جدًا جدًا.

لو تعاونتم كسكان عمارة أو منطقة، أو حتى مجموعة أصدقاء، على جمع كل الكانزات والحاجات الألومنيوم اللي بتتعاملوا معاها وجمعتم نصف طن أو طن كل فترة، هتقدروا تأخذوا مقابل كبير جدًا، سمير عرابي بيقول لكم: “الكانز أو علب الحاجات الساقعة التجار بيجمعوها من المخلفات أو الشوارع زي ما يكون، وبيجمعوا معاها ورق الألومنيوم “السيلوفان” اللى بنلف به الأكل وبيجمعوا معاه الطبق الألمنيوم بتاع الطواجن اللى بييجي فيه الأرز باللبن أو طاجن المكرونة، الثلاثة عناصر دول اسمهم “شغل كانز خليط أو شغل صوالا” بنشتري الطن ثمنه داخل القاهرة 6500 وخارج القاهرة 6250، لكن لو تم فرزه وأصبحوا ثلاث أنواع علب الكانز لوحدها والطبق لوحده والورق الألومنيوم لوحده كده كل حاجة بيكون لها سعر، الكانز لوحده بـ 7000 جنيه داخل القاهرة و6750 خارج القاهرة، والطبق الألومنيوم بـ 7000 جنيه داخل القاهرة و6750 خارج القاهرة، والورق الألومنيوم 3000 جنيه للطن وده بيكون كميته صغيرة تتراوح بين 100 لـ  70 كيلو فى الطن.

سمير بيقول أنه بيشتري كل الأنواع، وبالكميات، من أى مكان خارج أو داخل القاهرة، لو عجبتكم الفكرة، وحبيتوا تعملوا دخل لطيف من حاجات بسيطة ممكن تتصلوا بسمير عرابي 01027890334.

المهندس تامر خليل.. والورق

الورق في البيوت كمياته مش طبيعية، نقدر نقول أطنان، كراسات وكتب دراسية، وغيرها منتجات ورقية كثير الواحد بيرميها وبتختلط بباقي المخلفات العضوية، فما تبقاش صالحة للاستخدام أوي بعد كده زي ما تروح لمصنع إعادة التدوير على طول من المنبع، فيه تجار عندهم استعداد يشتروا الزبالة ككارتون والورق بكل أنواعه، من الناس دول المهندس تامر خليل اللي بيجمع الورق بكل أنواعه، ويوصله لمصانع التدوير، كايرو 360 بتشجع فكرة الفرز من المنبع، لو كنتم في بيت عائلة، أو عمارة سكنية وقادرين تتواصلوا مع بعض، ممكن تتفقوا، وتجمعوا الورق والكارتون مع بعض وكل فترة تتصلوا بالمهندس تامر تتواصلوا معاه وتبيعوا الورق له، هو مستعد يتقبل أي كمية، في العادي بيقبل طن كحد أدنى، لكنه قال لنا: “لو جاء لي كيلو في اليوم أنا موافق، أسعار البيع 800 جنيه للطن، و80 جنيه للكيلو.

الورق اللي يقصده المهندس تامر هو الورق بكل أنواعه سواء مكتوب، أو دشت، أو جرائد، أو بواقي الكرتون وورق التصوير وكل حاجة، الكتب القديمة، مكان المهندس تامر في مدينة السادات، في المنطقة الصناعية، والعيب الوحيد أنه محتاج الناس تروح لحد عنده تعطى له الحاجة، لكن الدفع فورى، لو عجبتكم الفكرة وشايفين أن عندكم ورق كثير بيروح في الزبالة ممكن تتواصلوا مع المهندس تامر على رقم 01110120145 وتتفقوا معاه.

الزجاج.. يعني مصنع العبور للزجاج

الزجاج من أكثر العناصر الثقيلة، تجميع كمية منه أمر سهل، مع كميات الزجاج اللي بنسخدمها، ونرميها بعد شرب العصير، أو المشروبات الغازية، أو الأدوية، كل ده بيشتريه المهندس يسري السنطاوي اللي شغال في مصنع مصر للزجاج، وبينقسم المنتج لزجاج عسلي، وأخضر وأبيض ومحروق.

الشوال الواحد من الزجاج -بحسب المهندس يسري– بيساع 50 كيلو بـ 25 جنيه، لو عمارة كاملة تعاونت وجمعت إنتاجها في شهر، أو شخص واحد عنده مساحة تخزينية مناسبة لجمع  كميات كافية من الزجاج على مدار مدة طويلة، تقدروا تبيعوا الطن بـ 500 جنيه، المهندس يسري بيقول أن الشغل على الزجاج الملون (أخضر وعسلي) متوقف مؤقتًا، لكن الإقبال أكثر على الزجاج الأبيض، لو مهتمين بالموضوع تقدروا تروحوا على عنوانهم في 8 المدينة الصناعية، مدينة العبور، وتليفونهم 0246103911 (5 خطوط).

المخلفات العضوية… هي كمان لها فائدة!

كل المخلفات الصلبة لها مشترين ومقابل مادي، العنصر الوحيد في زبالة كل بيت اللي مغضوب عليه وما حدش بيحبه أو يحب يتعامل معاه ولا له مشترين هو ” القمامة العضوية”.. يعني بواقي الأكل، ودي العناصر اللي بتعمل رائحة غير لطيفة وبتبوظ باقي العناصر لو معاها، إحنا في كايرو 360 دورنا كويس وحاولنا نعرف هل فيه حد ممكن يأخذ المخلفات دي، للأسف بشكل عام مافيش حد بيحب ولا بيحتمل يتعامل معاها، لكن المفاجأة أننا  اكتشفنا المهندس محمود جابر اللي دلوقت شغال على مشروع للاستفادة من المخلفات العضوية، واللي بيشتغل على تدريب الشباب على الاستفادة من المخلفات دي في إنتاج “بيوجاز”، تكلمنا معاه وقال لنا أنه كمان شهرين بالضبط هيكون جاهز أنه يأخذ المخلفات العضوية وينتج منها الغاز اللي يشبه الغاز الطبيعي وطبعًا هيحتاج مساعدة ناس كثير في أنها تمده بالنوع ده من المخلفات.

الفارق الوحيد بين العنصر ده وبقية العناصر اللي موجودة في القمامة، أنه مش هيكون بفلوس، لو حابين تتبرعوا به للمهندس محمود هيكون مساهمة طيبة منكم، لأن المهندس محمود جابر نفسه بيتبرع بوقته وجهده وعلمه في تدريب الشباب على كيفية بناء مخمرات وإنتاج غاز البيوجاز، وهو مشروع بالكامل قائم على التطوع بداية من الناس اللي بتعلم الشباب الطريقة، مرورًا بالمعدات اللي قائمة على تبرعات جمعيات أهلية انتهاءً بالمنتج اللي هيشغل شباب كثير مش لاقي شغل.

لو مهتمين بالفكرة، أو حتى حابين تنضموا بفريق عمل المهندس محمود وتتدربوا ويكون عندكم المشروع ده تقدروا تتواصلوا معاه على الصفحة دي، لو مهتمين ابعثوا رسالة وهو هيرد عليكم مباشرة، والمشروع ده هيوفر كميات بيوجاز كويسة تقدر تشغل مصانع الطوب، ومزارع الفراخ وغيرها من المشروعات اللي بتحتاج طاقة كبيرة وبتصرف مصاريف باهظة عليها.