The Definitive Guide to Living in the Capital , Cairo , Egypt

الحياة في كايرو

دليل كايرو 360 لخروجات ممكن تمارس فيها أنشطة في القاهرة

أربيان نايتس أفريكا سفاري بارك أكوا بارك خروجات القاهرة دريم بارك فاميلي لاند
دليل كايرو 360 لخروجات ممكن تمارس فيها أنشطة في القاهرة
بواسطة
Muhammad Nasr

الصورة من أفريكا بارك

كابتن.. كابتن.. هو كله أكل؟ مافيش حركة شوية؟ السؤالين دول دائمًا بنسألهم لنفسنا مع أصحابنا لما لقينا أن أغلب خروجاتنا عبارة عن الغذاء في نهاية الأسبوع في مطعم جديد أو زيارة لكافيه جديد، فقررنا النهارده نكلمكم عن الأماكن القاهرية اللي تقدروا تخرجوا فيها وتمارسوا أنواع متعددة من الأنشطة والأكل مش عنصر رئيسي في الموضوع وتبقى فرصة علشان نطبق المثل المصري الأصيل “الحركة بركة”.

أفريكا بارك

في الكيلو 65 على طريق مصر إسكندرية الصحراوي هتلاقوا أفريكا سفاري بارك اللي بتتيح لكم فرصة مشاهدة حيوانات برية بتتجول بحرية كأنها في موطنها الطبيعي، “أفريكا سفاري بارك” من الأماكن اللي مافيش زيها اثنين في القاهرة وأول حديقة حيوانات مفتوحة في مصر، كمان فيه زي فندق صغير هتحسوا كأنكم عايشين في الغابات الاستوائية في أفريقيا مع وجود مطعم “الزامبيزي” لو حد حابب يأخذ وجبة خفيفة أو ثقيلة، الحديقة بتقدم عدد من الأنشطة زي الرحلة النهرية اللي من خلالها الزوار يقدروا يشوفوا التماسيح والقرود وأنواع مختلفة من الطيور، والكهف اللي بيحتوي على أكثر من نوع مختلف للزواحف والطيور والحيوانات النادرة لكن المتوحش منها بيكون داخل قفص زجاجي، بالنسبة للأنشطة الترفيهية  هتقدروا تلعبوا رياضات متنوعة زي الصيد وتنس الطاولة وكرة القدم والبلياردو وغيرها من الألعاب.

وتقدروا تعرفوا مزيد عن الحديقة من خلال صفحتهم على الفيسبوك.

دريم بارك

بداخل مدينة دريم لاند في مدينة 6 أكتوبر هتلاقوا دريم بارك اللي تعتبر من أهم وأشهر مدن الملاهي في القاهرة، دريم بارك مازالت محافظة على مستواها ودائمًا هتلاقوا فيها الجديد واللي يعجبكم وتقدروا تقولوا من الخروجات اللي الأكل فيها هيكون ضدكم مش معكم، المدينة بتحتوي على عدد من الألعاب المشهورة زي الصاروخ وقطار الموت وقطار الشرق وقطار الظلام وألعاب كثيرة مش لأصحاب القلوب الضعيفة لكن المدينة ما نسيتهومش وهتلاقوا ألعاب هادئة زي السفينة والسيارات التصادمية وألعاب هادئة يعني تقدروا تقولوا أن دريم بارك مدينة شاملة لأصحاب القلوب المغامرة وأصحاب القلوب الضعيفة، تقدروا تتواصلوا وتعرفوا كل الجديد عن دريم بارك من خلال موقعهم الرسمي

أرابيان نايتس

“ركوب الخيل عز”.. الصراحة مش عارفين هل دي مقولة أو مثل ولا إيه بالضبط بس فعلًا ركوب الخيل من الأنشطة الجميلة اللي لها تأثير أجمل على الحالة النفسية والبدنية للإنسان، في الكيلو 48 على طريق القاهرة الفيوم الصحراوي هتلاقوا نادي “أرابيان نايتس – Arabian Knights” اللي بيقدم عدد من الأنشطة أهمها ركوب الخيل، كمان النادي بيقدم رحلات سفاري بالبيتش باجي في صحراء الفيوم الرائعة بالقرب من بحيرة قارون، تقدروا تقولوا أن أرابيان نايتس من أهم الأماكن اللي تقدروا تقضوا فيها وقت رائع ما بين ركوب خيل ورحلات سفاري تجنن، لو حابين تعرفوا أكثر زوروا صفحتهم.

القرية الفرعونية

في شارع البحر الأعظم هتجدوا القرية الفرعونية اللي من أهم المزارات في محافظة الجيزة وأهميتها وشهرتها في أنكم تقدروا تشوفوا ممثلين في أزياء وإكسسوارات الفراعنة كمان وهم بيمارسوا الطقوس اليومية زي الزراعة والتحنيط وغيرها، القرية بتنظم عدد من الأنشطة الترفيهية زي الرحلة النيلية في مركب القرية الفرعونية غير عدد من مهرجانات الألوان اللي بيُنظموا كل فترة وورش تعليم النحت والرسم وغيره من الفنون الفرعونية لمختلف الأعمار، القرية بتنظم برامج مختلفة للمجموعات وللأفراد وللأجانب والمصريين وتقدروا تتواصلوا مع القرية عن طريق الموقع الرسمي.

أكوا بارك

الصيف يعني الفرهدة والقريفة والتوتر وغيره من اللي أنتم عارفينه وبنواجهه في فصل الصيف اللطيف، أكوا بارك في الكيلو 31 طريق مصر إسماعيلية الصحراوي بجوار أكاديمية المستقبل بتعرض مجموعة من الأنشطة والألعاب المائية المفيدة في فصل الصيف الحار. اعرف تفاصيل أكثر عن المكان من موقعهم الإلكتروني.

فاميلي لاند

مدينة ترفيهية بشكل جديد ده اللي تقدروا تقولوه عن “فاميلي لاند” الموجودة في 11 أبراج عثمان بالمعادي، المدينة بداخلها عدد من الأنشطة زي البولينج والتزلج على الجليد وأنشطة مرحة كثيرة، كمان سينما فاميلي، يعني المدينة مهما كان تعريفكم للمرح هتلاقوه في فاميلي لاند.

مقترح