The Definitive Guide to Living in the Capital , Cairo , Egypt

أنك تبيع أو تشترى عربية مستعملة في القاهرة دي حاجة مش سهلة خالص لأن مافيش سعر محدد لموديل محدد ولا ماركة محددة زى الجديد، كل حاجة في سوق المستعمل بـ تخضع لتقدير البائع والمشتري وكمان لشطارته، ده طبعًا لأن إحنا في مصر. علشان تبيع أو تشترى عربية مستعملة في القاهرة عندك 3 طرق: سايس الجراج، أو معارض السيارات، أو سوق السيارات:

 

سايس الجراج:

أنك تشوف سايس الجراج اللى بـ يشتغل في السمسرة وهو دائمًا عنده العربية اللُقطة اللى حالتها ممتازة ودائمًا اللى بـ يشترى بـ يصدق مع أنه بـ يقول كده على كل العربيات لكل الناس، وده بـ يأخذ إكرامية من البائع والمشترى.

 

معارض السيارات:

المعارض المنتشرة في كل حتة في القاهرة وعارضة العربيات على الرصيف وواخدة نصف الشارع. طبعًا دى طريقة مختلفة بـ تقنع اللى عاوز يبيع أن العربية حالتها وحشة وأن السعر المطلوب ده صعب ودائمًا بـ يوري لك 3 عربيات عنده أحسن من عربيتك وأرخص وأنها مش هـ تتباع إلا بشطارته وطبعًا مش بالسعر اللى أنت عاوزه خالص، وبـ يقنع اللى عاوز يشترى أنه مش هـ يلاقى زى العربية دى في البلد كلها سعرها لُقطة وحالتها نادرة، وطبعًا بـ يأخذ عمولة من الاثنين مبلغ محترم بس يستحقه لأنه على الأقل بـ يوفر عليك التعامل مع أمثاله من التجار.

 

سوق السيارات:

سوق السيارات بقى عالم لوحده، فيه هناك ناس عادية رايحة تبيع أو تشترى وفيه ناس رايحة تأخذ فكرة عن الأسعار، وفيه تجار رايحين يصطادوا فرصة، وطبعًا فيه نصابين.

السوق موجود في شارع ذاكر حسين بالحى العاشر في مدينة نصر، ممكن توصل له من الطريق الدائري وتنزل نزلة الحي العاشر وتمشى على طول هـ تلاقى السوق على شمالك وممكن توصل من مصر الجديدة أو مدينة نصر في اتجاه الحي العاشر، وبـ يشتغل يوم الجمعة ويوم الأحد، لو أنت أول مرة تروح وما تعرفش المكان أوصل للحى العاشر وامشى وراء الزحمة.

بـ تبدأ تجربة السوق قبل ما توصل له، لما تقرب شوية يعنى هـ تلاقى ناس بـ تشاور لك وناس بـ تنادي عليك بماركة العربية وأنت في الطريق، دول طبعًا تجار أو حرامية.. في الحالتين ما تقفش، ولما توصل السوق فيه رسوم دخول طبعًا للعربيات بس.

 

الخدمات الموجودة في السوق:

خلينا نتكلم شوية عن الخدمات الموجودة في السوق وحوله: فيه هناك مكتب توثيق للشهر العقاري بـ يشتغل يوم الجمعة لخدمة السوق، وحول السوق فيه محطات بنزين بـ تقدم خدمة الكشف على السيارات وتقديم تقرير فني للمشترى، طبعًا ده ما بـ يكونش بالدقة الكافية، لكن في كل الأحوال بـ يكون أحسن من أنك تجيب ميكانيكي علشان يكشف لك على العربية اللى أنت عاوز تشتريها وكمان بـ يكون أرخص.

 

تجربة السوق:

نيجي بقى نتكلم عن تجربة السوق نفسها ونوعية الناس اللى هـ تقابلهم هناك سواء كنت رايح تبيع أو تشترى، التجار والسماسرة هما الفئة الأغلب في السوق وكمان هما الفئة اللى هـ يحذرك منها كل اللى مر بتجربة السوق، التعرف عليهم مش صعب أوى، يعني مثلاً لو رايح تشتري عربية ولقيت الرخصة مش باسم الشخص اللي بـ يبيعها وبـ يبقى معاه توكيل باسم شخص ثاني أو العربية نفسها يكون لها أكثر من توكيل يبقى لازم تعرف أن الشخص اللي بـ يبيعها ده تاجر عربيات، وهنا فرص النصب على سيادتك بـ تكون أكثر بكثير.

وفى أحسن الأحوال بـ يكون النصب عليك في الفلوس، يعنى يبيع لك العربية أكثر من سعرها، وفي أحوال ثانية بـ يكون النصب في الفلوس وفى العربية، وساعات بـ يكون للعربية دى أكثر من مفتاح ولما تشتريها وتروح بها البيت بـ تتسرق وممكن تكون مُباعة لأكثر من واحد، فلما تتعامل مع التجار الحذر واجب، ولو رايح تبيع عربية هـ تسمع منه أسعار قليلة جدًا ودائمًا هـ يحاول يغريك بأنه جاهز والفلوس في جيبه وهـ يخَلص.

الفئه الثانيه الناس العادية اللى رايحة تبيع وتشترى وتبقى محظوظ طبعًا لو تعاملت معاهم، الفئة الثالثة والأهم الباعة الجائلين، البياعين دول هـ تلاقيهم هناك أكثر من العربيات نفسها، كل حاجة بـ تتباع هناك: المياه المعدنية، والعصائر، والحاجة الساقعة، وعلب الكشري، والساندويتشات لحد النظارات الشمس المضروبة، والكابات، والشمسيات، وساعات فريسكا كمان زى ما تكون قاعد على البحر في جمصة، وطبعًا بأسعار غالية شويه عن المعتاد، وكمان هـ تلاقى هناك ناس بـ تغسل العربيات.

 

شوية نصائح لو رايح تبيع عربيتك فى السوق:

خلى معاك مياه وعصائر وأكل خفيف: بسكويت وشيبسى حاجات من دى علشان اليوم طويل، ولازم تكون حاطط في دماغك أنه مش مشوار ساعتين فما يكونش وراك حاجة ثانية اليوم ده، وما تأخذش كل اللى هـ تسمعه من أسعار جد علشان صحتك وتحلى بروح الدعابة علشان تقدر تكمل اليوم.

كمان لازم تروح بدري علشان تعرف تقف في مكان كويس والمكان الكويس ده دائمًا بـ يكون بجوار السور ويستحسن يكون في أول السوق لو أنت مش ناوى تخرج بدري، أما لو كان فيه احتمال أنك تزهق وعاوز تمشى فـ حاول تبقى بجوار البوابة قدر الإمكان لأن فكرة الخروج من السوق قبل الساعة 7 بالليل هـ تحتاج منك شوية صبر ومهارة غير عادية في السواقة.

اعمل ورقة عليها موديل العربية وبياناتها والصقها على زجاج العربية، يستحسن كذا نسخة علشان تغطى كذا جهة، وده طبعًا علشان توفر على نفسك الأسئلة كل دقيقة اللى هـ تبدأ تبقى مملة ومرهقة مع الوقت، وسيب كبوت العربية مفتوح علشان ما تنزلش تفتحه كل 3 دقائق.    

اوعى تتصدم بسرعة من الأسعار اللى هـ تسمعها خلى عندك أمل، ويستحسن يكون معاك واحد صاحبك، وآخر نصيحة لما تتفق مع حد على سعر العربية خذ منه عربون قبل ما تتحرك من السوق وده لتجنب مقالب التجار بعد ما تخرج من السوق، لأنك بعد ما بـ تخرج بـ تكون زهقان وتعبان وسهل أنه يضغط عليك ويفاصل ثانى.

ربنا معاكم!