The Definitive Guide to Living in the Capital , Cairo , Egypt

كل سنة وأنتم طيبين.. رمضان واللي ييجي منه!

كثير مننا بـ ينتظر رمضان من السنة للسنة علشان يبدأ يطلع فلوسه اللي راصدها لعمل الخير.. لكن الأسئلة اللي دايمًا بـ تخلق فترة من الحيرة والتوهة: مين؟ .. وفين؟ .. وإزاي؟.. محتاج مكان ثقة، وسهل التواصل معاه.. وفي نفس الوقت يكون بـ يوجه الفلوس في اتجاهات صح.

طيب.. خلونا نقول أن كل اللي جاي في الدليل ده هو محاولة لإيجاد إجابة وافية (ومركزة قدر الإمكان) للأسئلة دي، هـ نقتصر فيها على ذكر المؤسسات والجمعيات اللى نشاطها واسع، وبـ تغطي مساحات جغرافية أكبر بمساعداتها.. لو جينا كده نقسم الجهات الموجودة في المجال الخيري هـ نلاقيهم (من حيث طبيعة الشغل) واحدة من اثنين:

أولاً: المؤسسات الإغاثية: ودي عاملة بالضبط زي الدواء المسكن كده، علشان المريض ما يموتش من الألم.. يعني هي مش بـ توجد حلول للمشاكل قد ما هي بـ تعالج أعراضها المؤلمة.
ثانيًا: المؤسسات التنموية، ودي بـ تهدف لإيجاد حلول جذرية للقضاء على المشاكل الكبرى اللي بـ تواجه المجتمع.. زي "الجهل" و"الفقر".. وهكذا.

المؤسسات والأعمال اللي من النوع الأول زي:

1- "بنك الطعام المصري":

ودي -باختصار شديد- مؤسسة أهلية بـ تهدف إلى سد احتياجات الفقراء من الطعام، ومكافحة الجوع.. ومشاريعهم اللي شغالين عليها حاليًا: "إفطار الصائم"، "صك الأضحية"، لو حبيت تعرف أكثر تفاصيل عن شغلهم وطرق التبرع ممكن تتصل برقم 16060 وتستفهم منهم عن التفاصيل اللي محتاج تعرفها.. أو تزور صفحتهم على Facebook.

2- "بنك الشفاء المصري":

ودي مؤسسة بـ تهدف لتوفير العلاج للمرضى غير القادرين على تحمل تكاليف علاجهم.. وشغالين حاليًا على حملة "علاج من أجل الإنتاج" اللي بـ تهدف للقضاء على فيروس "C" بحلول رمضان 2020، ولو حبيت تتواصل معاهم ممكن تتصل على 16060 أو تزور الـ Website بتاعهم.

3- "مشروع نهر الخير":

أحد مشروعات مؤسسة "عُمّار الأرض" التنموية، وبـ يشتغل على توصيل المياه للقرى المصرية اللي مش واصل لها مياه نظيفة.. أو مش واصل لها مياه أصلًا، تقدر تتواصل معاهم على الرقم 19054 أو تزور صفحتهم على Facebook.

4- "جمعية أصدقاء المبادرة القومية ضد السرطان":

ودي جمعية أهلية بـ تهدف لمكافحة المرض الخبيث سواء بـ توفير فرص علاج للمرضى أو بالتوعية ضد المرض.. وهي الجمعية القائمة على دعم وتطوير مستشفى 57357 لعلاج سرطان الأطفال، وكذلك التعاون مع المعهد القومي للأورام وبقية الهيئات العاملة في المجال، لو حبيت تتواصل معاهم تليفونيًا ممكن تكلمهم على 19663، أو إلكترونيًا ممكن تزور صفحتهم على Facebook.

5- "جمعية الأورمان":

واحدة من كبرى الجمعيات الخيرية في مصر حاليًا، وتعتبر من الجمعيات الرائدة في مجال العمل الإغاثي والمساعدات المباشرة، كونها بـ تشتغل على مجالات منوعة وفي اتجاهات مختلفة ابتداءً من إدارة دور رعاية الأيتام والمسنين والمعاقين وحتى دعم المؤسسات التنموية بالمشاركات المباشرة وغير المباشرة، ممكن تتواصل معاهم على 19455 أو تزور صفحتهم على Facebook.

أما المؤسسات والأعمال من النوع الثاني زي:

1. "صناع الحياة":

أحد أكبر المؤسسات اللي شغالة في المجال التنموي في مصر والوطن العربي، وبـ تسعى لإحداث نهضة حقيقية من خلال القضاء على مثلث التخلف: "الفقر، الجهل، المرض".. وشغالين حاليًا على حملة كبيرة تحت اسم "1000 حياة" بـ تهدف لإخراج 1000 أسرة مصرية من دائرة الفقر بشكل نهائي، وده عن طريق عمل مشروعات مناسبة لكل حالة علشان يقدروا يتكسبوا منها وتجيب لهم دخل ثابت وتغنيهم عن السؤال، ممكن تتواصل معاهم تليفونيًا على 16563 أو إلكترونيًا من خلال صفحتهم على Facebook.

2- "جمعية رسالة للأعمال الخيرية":

ودي الجمعية الأشهر تقريبًا في مجال العمل الخيري عمومًا.. ولها باع طويل وخبرة كبيرة فيه، وبـ تتميز بشغلها المتنوع والمزدوج في الجانبين الإغاثي والتنموي، يعني زي ما بـ تشتغل على شنط رمضان وكفالة الأيتام ومساعدة الفقراء، بـ تشتغل برضه في مجالات التعليم والتوعية وغيرها من المجالات التنموية، تقدر تتواصل معاهم تليفونيًا على 19450 وإلكترونيًا على موقعهم الإلكتروني.

3- "مؤسسة مصر الخير":

أحد المؤسسات التنموية اللي مشيت بخطوات تصاعدية سريعة في النجاح والانتشار، وبـ تهدف لمكافحة الفقر والجهل والمرض والقضاء على البطالة، وبـ تشتغل في اتجاهين: الأول: صرف فلوس الزكاة في مصارفها الشرعية مباشرة، الثاني: استثمار جزء من أموال التبرعات لتمويل مشروعات تنموية تقوم عليها المؤسسة، تواصل معاهم تليفونيًا على 16140 أو إلكترونيًا من خلال الموقع الإلكتروني.

4- "مؤسسة معًا لتطوير العشوائيات":

مؤسسة أهلية مصرية تهدف إلى تطوير العشوائيات، وبتشتغل على محورين للتنمية،
الأول: التنمية البشرية، وده بـ يتم من خلال عمليات التوعية ورفع مستوى الثقافة، الثاني: تنمية المنشآت، وده بـ يتم من خلال إعادة هيكلة وتنظيم المنشآت المختلفة بالمناطق العشوائية، لو حبيت تتواصل معاهم ممكن تتصل بـ 16164 أو من خلال موقعهم الإلكتروني.

5- "مشروع المليون حلم":

وده مشروع تابع لجمعية "من أحياها" بالمنيل، وبـ يسعى (بالتعاون مع عدة مبادرات شبابية وجمعيات أهلية) لعمل مليون مشروع صغير لمليون أسرة مصرية فقيرة علشان يخرجهم من دائرة الفقر.. تقدروا تعرفوا أكثر عنهم من خلال صفحتهم على Facebook أو تتواصلوا معاهم تليفونيًا من خلال 01140603331.

دي كده تجميعة مختصرة لأهم الأماكن اللي ممكن تشارك فيها باللي يقسمه الكريم على أيدك.. ورمضان -دايمًا- كريم!