The Definitive Guide to Living in the Capital , Cairo , Egypt

الحياة في كايرو

دليل كايرو 360 للفسحة ولخروجات العيد في الشيخ زايد

أمريكانا بلازا الشيخ زايد القاهرة خروجات خروجات القاهرة كريزي ووتر كلابليكو مزار مول مول العرب هايبر وان ويست تاون هاب
دليل كايرو 360 للفسحة ولخروجات العيد في الشيخ زايد
    بواسطة
    Angie El Batrawy

    كل عيد فطر وأنتم طيبين، رمضان جرى هوا كالعادة، وكل الناس نزلت الأيام اللي فاتت تشتري لبس العيد استعدادًا للخروجات والزيارات، ولأن العيد زي رمضان أهم حاجة فيه اللمة مع الأهل والأصحاب، جمعنا لكم أهم الأماكن في الشيخ زايد اللي ممكن تخرج وتتفسح فيها، ساعات بيبقى صعب على بعض الناس تتجمع في البيت أو بيبقوا عاوزين يخرجوا يتقابلوا بره من باب التغيير، والأطفال تنطلق وتخرج الطاقة اللي جواها، خاصة الناس اللي ما قدرتش تسافر بره القاهرة تغير جو، تعالوا نعرف تفاصيل كل مكان:  

    هايبر وان:

    هايبر وان من أوائل الأماكن اللي فتحت في الشيخ زايد وكان تقريبًا الخروجة والمتنفس الوحيد للناس، في الدور اللي فوق فيه Food court صغيرة ممكن تتغدى هناك أو ممكن تعمل شوبينج أو تشتري كحك، وفي الدور اللي تحت ممكن تقعد في سيلانترو أو تاكل سينابون.

     

    كريزى ووتر – Crazy Water:

    موجود جنب هايبر وان، تحس أن المكان مهجور وما بيعملوش دعايا كافية لكن في الحقيقة هو شغال، مواعيدهم في العيد من الساعة 10 صباحًا: 6 مساءً، التذكرة للفرد 85 جنيه شاملة كل الألعاب، وبالنسبة للأكل فيه جوه مطاعم كتير ممكن تاكل فيها، للاستعلام اتصلوا بـ 01004463945.

    Escapers – أمريكانا بلازا:

    عندهم أحدث مجموعة من ألعاب الهروب في العالم، المكان فيه أوض كتيرة واللعبة عبارة عن أنك بتتحبس في أوضة، وعلشان تهرب منها لازم تحل ألغاز، سعر الفرد بيتوقف على عدد الناس اللي في المجموعة، للاستفسار اتصلوا بـ 01001036917، وفي أمريكانا بلازا ممكن برضه تدخل سينما آي ماكس أو السينما العادية أو تقعد في الكافيهات والمطاعم، ممكن تتابعوا أفلام العيد وغيرها من قسم السينما.

     

    ويست تاون هب – بيفرلى هيلز:

    موجود في كومبوند بيفرلى هيلز، منطقة مطاعم وكافيهات بتتميز بالهدوء والمساحات الواسعة علشان أطفالك ياخدوا راحتهم ويلعبوا، فيه كمان هناك لسه فاتح جديد منطقة ألعاب Bubbly ممكن تودى أولادك فيها.

    مول العرب:

    مول العرب يعتبر من أهم المولات في القاهرة، مش بس علشان بيشغل مساحة كبيرة (وكمان بيعملوا امتداد جديد له)، لكن كمان علشان هتلاقي فيه كل حاجة، ممكن تخرج مع أسرتك وتتغدوا بره في الفوود كورت، أو في المطاعم اللي عند النافورة أو جوه المول، وممكن كمان تودى أطفالك لمناطق ألعاب البيلى بييز، أو Spark’s أو Shoot IFC أو تدخل تتفرج على أفلام العيد في سينما جلاكسى، أو تعمل شوبينج لو ما كنتش لسه جبت لبس العيد، لو عاوزين تعرفوا تفاصيل أكتر عن المول ممكن تقرأوا الفيتشر اللي كتبناه قبل كده.

    Clubliko:

    موجود قريب من كومبوند بالم هيلز، مكان عائلى ممكن الكبار يستمتعوا فيه وكمان فيه أنشطة كتيرة للأطفال زي الرسم والمسرح وتعليم الطبخ وألعاب المياه والرمال، وكمان عندهم مطعم، في أول يوم العيد وقت ماتش مصر وأوروجواي عاملين شاشة كبيرة علشان تقدر تشوف الماتش وأولادك بيلعبوا في نفس الوقت، بس لازم تحجز قبلها، لمزيد من التفاصيل 01028888335.

    Funtopia – مزار مول:

    موجود في الحى الـ 16 في الشيخ زايد وهى Trampoline park أو مكان للنط على الترامبولين، الحلو أنها مش للأطفال بس لكن للكبار كمان، النص ساعة بـ 75 جنيه، والساعة بـ 150 جنيه في العيد، المول كمان فيه سوبر ماركت سبينيز، ومحل أبو الخير للمنتجات السورية، ومطعم أسماك، وممكن تعمل شوبينج في محل Nile Stock هناك.

    أماكن تجمع كافيهات ومطاعم:

    زايد مليانة أماكن تجمع مطاعم وكافيهات، زي أركان مول موجود عند المدخل 2 للشيخ زايد، فيه هناك مطاعم زي Topaz وبلدينا وكراكاس ومينس برجر، وكمان ساعات بيبقى فيه Booths بتبيع منتجات عالية الجودة زي اللبس والإكسسوارات وديكورات للبيت، وجنبه على طول الجزيرة بلازا مشهور بمطاعم فويجو وسينابون، ممكن تروح هناك تتغدى مع العيلة أو الأصحاب، وعندهم شاشة كبيرة ممكن تشوف عليها ماتشات كأس العالم.

    كابيتال بيزنس بارك – Capital Business park كمان من أحلى الأماكن اللي ممكن تروحها في زايد، وزود حلاوتها الامتداد اللي فتحوه من كام أسبوع Capital Promenade، وجنبه هتلاقي توين تاورز – Twin Towers وهو معروف كمان باسم Rivulet، وكمان تيفولى دوم – Tivoli Zayed موجود أمام أمريكانا بلازا، وأتريم بلازا – Atrium Plaza اللي كتبنا عن واحد من المطاعم هناك بوتشرز برجر، وداون تاون مول المشهور بمطعم سمسمة وموجود قريب من On the Run، وفيه Sky Center Ville الموجود بين فريش فوود ماركت ومستشفى جلوبال كير وكنا كتبنا لكم عن تجربتنا في مطعم Avitchii،  وأخيرًا جنبه على طول Plaza 34.

    بنتمنى لكم أجازة وعيد سعيد، وإحنا في انتظار افتتاح حديقة زايد المركزية اللي قربت خلاص علشان نستمتع بأجواء رائعة في الهواء الطلق وكمان هيبقى فيها إيفنتات وأنشطة أكيد للعيلة وأكيد هنكتب لكم عنها بالتفصيل.

    مقترح