The Definitive Guide to Living in the Capital , Cairo , Egypt

زي ما عودناكم كل سنة إننا ننقل لكم تفاصيل أجمل حدث خاص بالطبيعة والخضرة في مصر، وهو معرض زهور الربيع، واللي في 2024 بتتزامن مع دورته الـ91، ورغم أن المكان مش كبير، لكن بالتأكيد هتلاقوا فيه كل احتياجاتكم الخاصة بالزراعة ونباتات الزينة والورد والفل والياسمين وأكثر، وكمان هتلاقوا عندهم شوية حاجات مختلفة للزينة والديكور هتنبسطوا بيها.

يلا نعرف تفاصيل رحلتنا لمعرض زهور الربيع 2024، علشان لو حابين تزوروه تبقى عندكم المعلومات الأساسية للزيارة.

السنة دي معرض زهور الربيع مقام في المتحف الزراعي بالدقي، وأقرب محطة مترو له هي الدقي، ولو مواصلات عامة فأي عربية متجهة أو راجعة من شارع البطل أحمد عبد العزيز هتنزلكم قصاده، وهو له 3 بوابات منهم بوابة مخصصة للسيارات، ولو أنتم هتدخلوا المكان بالسيارة فهيكون بـ25 جنيه شاملة واحد راكب، وكل فرد في السيارة هيقطع تذكرة واللي تمنها 10 جنيه، وكمان فيه باركينج بره المعرض بـ20 جنيه.

في البداية لازم ننصحكم تلبسوا لبس خفيف وتعملوا حسابكم في مياه وسناكس علشان المكان صحيح صغير لكن لو هتلفوا فيه هياخد في حدود ساعة ونص لو زينا بتهتموا بالتفاصيل، ولو أنتم معاكم أطفال فحاولوا تريحوا في الكافيهات الموجودة هناك بعد كل جولة علشان مايتعبوش في ظل درجات الحرارة المرتفعة.

أول ما هتدخلوا من البوابة الرئيسية هتلاقوا منفذ وزارة الزراعة اللي فيه كل اللي هتحتاجوه من العسل والألبان والبقوليات وخلافه بتتباع عندهم بأسعار تنافسية، وبعد كده هتلاقوا مشاتل تابعة لوزارة الزراعة ووزارة الإنتاج الحربي والأسعار تبدأ من 15 جنيه وبتختلف الأسعار حسب نوع النبات وحجم، وكمان هتلاقوا شركات متخصصة في اللاند سكيب والديكورات للمحلات والفلل والكافيهات والشقق من الفخار والترتان والخوص وغيرهم.

كمان لو أنتم من هواة الزراعة بنفسكم فهتلاقوا أقسام كتير لبيع كل ما يخص الزراعة من أدوات ومستلزمات وطين وسماد وغيرهم، ده غير أنه فيه ناس بتبيع فازات فاضية بأشكال مختلفة وألوانها مبهجة لو حابين تعملوا ديكور مميز في البيت ودي تختلف خامتها ما بين فخار وألمونيوم.

وخلال رحلة كايرو 360 لقينا قسم بيبيع فخار بأشكال متنوعة ومختلفة ومعاها ألوان متخصصة والقسم ده من ضمن مشروعات سيدات نادي الصيد وهو مميز لكل محبين التلوين، والسعر بيبدأ عندهم من 50 جنيه، وكمان لقينا ضمن جولتنا داخل معرض زهور الربيع 2024 سيدات بيعملوا شغل هاند ميد من المكرمية والخوص والأسعار بتبدأ من 120 جنيه، كمان لقينا قسم بيبيع منتجات ديكور أفريقية ولوحات وأشكال مختلفة هاند ميد والأسعار تبدأ من 50 جنيه، وأنتيكات من الزمن الجميل وده غير  مجموعة الإنارة اللي بتطرد الطاقة السلبية واللي شبيهة لمصابيح العصر العثماني وبتبدأ الأسعار من 450 جنيه.

لقينا كمان مكان بيبيع مجموعة من الطيور النادرة بأشكالها الجميلة والمميزة، وفيه كمان منها المحنط والأسعار متوسطها 500 جنيه.

رغم أن معرض زهور الربيع السنة دي مش كبير ولا بقوة العارضين اللي كانوا في فترة وجوده في حديقة الأورمان إلا أنكم هتلاقوا فيه كل حاجة محتاجينها تخص نباتات الزينة وأدوات الزراعة والديكور وغيرها.

بنفكركم تاني أن المعرض موجود السنة في المتحف الزراعي اللي موجود بشارع وزارة الزراعة بالدقي، وهو مستمر حتى 19 يونيه 2024.