روتراكت: واحد من أهم منظمات العمل العام فى القاهرة
Mohamed Abd El Rahman
قبل ما يكون كاتب المقال ده عضو في روتراكت كانت كلمة روتارى أو روتراكت بـ تعنى بالنسبة له ونعتقد لكثير مننا مجرد منظمة أرستقراطية بـ تعمل لخدمة المجتمع فى مجالات كثير وفى نفس الوقت بـ تعمل لنفسها دعاية، يعنى بـ يعملوا خدمة للمجتمع بغرض أنهم يعملوا شو مش بغرض الخدمة الحقيقية وده لأن معظم الأنشطة بتاعة الروتارى بـ يكون لها تغطية إعلامية كبيرة وغالبًا ما بـ يدعى لها ناس مهمين سواء من أعضاء الروتارى أنفسهم أو من شخصيات عامة في المجتمع، لكن لما دخل روتراكت النظرة دي تغيرت.. فى الحقيقة تغيرت خالص.
بداية الروتارى
بدأ الروتارى سنة 1905 في ولاية شيكاغو الأمريكية وكان مؤسسه وصاحب الفكرة محامى أمريكى اسمه بول هاريس وكان هدفه خدمة وتطوير المجتمع اللى بـ يعيش فيه، نجحت الفكرة وبدأت تنتشر في أمريكا وفى العالم ومعها كمان بدأ انتشار نوادي الروتارى.. وفي سنه 1968 تطورت الفكرة شويه وبقى فيه كمان حاجه اسمها روتراكت للشباب من 18 لـ 30 سنة بـ تكون نوادي الروتارى راعية لها.. وحاجه اسمها أنتراكت من 14 لـ 18 سنة.
الروتارى في مصر
سنة 1929 أنشىء أول نادى للروتارى في مصر ودلوقت مصر فيها حوالي 40 نادي روتراكت في القاهرة، والإسكندرية، وطنطا، والفيوم والمنصورة.
إيه هو الروتارى
الروتاري مؤسسة خدمية مش مؤسسة خيرية، بـ يحاول يساعد المجتمع في مجالات كثير زى التعليم والصحة وغيرهم، والحقيقة أنه نجح فعلاً في أنه يكون له الدور الأهم مع منظمة الصحة العالمية مثلاً في مكافحة مرض شلل الأطفال في مصر وفى العالم، ومشروعات ثانية كثير بـ يقوم بها الروتارى وبـ يعمل منح دراسية ومشروعات خدمية زى توصيل المياه النظيفة مثلاً للمناطق المحرومة، ومكافحة الجوع، وقوافل طبية وأنشطة ثانية كثير مهمة جدًا بالذات للمجتمعات الفقيرة زى مجتمعنا.
هـ تشوف إيه في روتراكت؟
من خلال أنشطته روتراكت الخدمية بـ يتعلم الأعضاء حاجات كثير: بـ نعرف أصحاب جدد وبـ نتعلم إزاى نشتغل مع بعض وإزاى نكمل بعض وإزاى نتعلم من بعض حاجات جديدة ونتبادل الخبرات وإزاى نخدم مجتمعنا وكمان قيمة الوقت وأهمية تنظيمه، وإزاى تطور نفسك وتبقى أحسن، كمان روتراكت بـ يعمل أنشطة ترفيهية واجتماعية وكورسات في حاجات كثير للأعضاء، وتبادل ثقافي من خلال سفريات داخل مصر وخارجها.
إزاى تنضم لهم؟
كل نوادي روتراكت في مصر بـ تعمل اجتماعات منتظمة في مواعيد محددة بـ تختلف من نادى للثاني حسب ظروف أعضاءه والاجتماعات دي بـ تكون مخصصة لمناقشة المشروعات اللى بـ يعملها النادي واللى هـ يعملها أو الأنشطة المختلفة اللى بـ يقوم بها النادي زى جمع التبرعات لمشروع معين أو حتى أى نشاط ترفيهي، وطبعًا الاجتماعات دي بـ تكون مفتوحة ومرحب فيها بأي ضيف أو زائر حابب أنه يشارك أو حتى يعرف أكثر عن روتراكت.
علشان تبقى عضو مش مطلوب منك أكثر من أنك تحضر الاجتماعات الخاصة بالنادي وأنك تشارك مشاركة حقيقية في المشروعات اللى بـ يقوم بها النادي، تشارك بوقتك.. بمجهودك.. بأفكارك. مجتمعنا محتاج فعلاً لكل جهد منظم منا.
عن المؤسسة
روتراكت مؤسسة ديمقراطية جدًا ولها قوانين بـ تحكمها زى مثلاً أن فيه انتخابات بـ تجرى سنويًا لرئاسة كل نادى، وزى أن كل قررات النادي بـ تأخذ بأغلبية الأصوات وطبعًا منها قرار ضم عضو جديد للنادي، الشغل في روتراكت فعلاً مختلف عن أى عمل تطوعي، علشان تعرف أكثر زور الموقع الرسمي.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
