سوبر ماما: موقع لكل أم عربية
Shaimaa El Gammal
من كام سنة لو كان حد عمل بحث عن أي موقع مصري موجه للأم
والطفل ما كانش هـ يلاقي خالص لأن كان فيه عدم اهتمام بالنوع ده من المواقع. لكن
من فترة مش كبيرة بدأ الاهتمام بتأسيس مواقع إلكترونية بـ تهم الأم لكن المشكلة كانت
في أن أغلب المواقع دي ما كانش مهني ولا بـ يتحرى الدقة في المعلومات اللي بـ ينشرها
وما نقدرش نقارنه بأي موقع أجنبي أبدًا.
النهاردة الموضوع تغير مع موقع supermama.meدلوقتي
تقدري تدخلي على الموقع ده -وهو موقع مخصص للأمهات- وتشوفي إزاي إحنا تطورنا جدًا
في النوع ده من الخدمات.
الموقع تم إطلاقه في شهر أكتوبر 2011 باللغتين العربية
والإنجليزية تحت شعار “كل شيء تحت السيطرة“، أسس الموقع ثلاث صديقات هم: ياسمين المهيري وزينب سمير وشيرين
السماع، واللي جمع ما بين الثلاثة هو كرههم للعمل في وظيفة تقليدية ورغبتهم في عمل
مشروع حر يقدروا يبدعوا فيه هما الثلاثة، لكن هم ما كانوش عاوزين يعملوا فكرة
تافهة أو فكرة تجارية وخلاص تكسبهم فلوس، هما كانوا بـ يدوروا على حاجة تخدم
المجتمع في نفس الوقت، وفضلوا يبحثوا لحد أكتوبر 2010 لما إحدى صديقاتهم بقت حامل
وعرفوا من خلال تجربتها إزاي الست الحامل بـ تكون قلقانة وبـ يبقى عندها تساؤلات كثير
وبـ تبقى محتارة ما بين كلام الأم وكلام الصديقات وكلام الدكاترة ومن هنا جاءت
فكرة موقع “سوبر ماما”.
بشكل عام موقع “سوبر ماما” هدفه أنه يمد الأم
بالمعلومات المختلفة و بـ يترك لها حرية اختيار القرار المثالي اللي بـ يناسب أسرتها
وشخصيتها، يعني سوبر ماما مش بـ يفرض وجهة نظره على الأم. ومثال على كده بـ تقول
ياسمين: “مرة عرضنا مقال بـ يشرح فوائد اللبن البقري وبعدها بفترة عرضنا مقال
ثاني موثق بأدلة وأبحاث علمية من الخارج أن لبن البقر مضر جدًا لصحة الإنسان، ولما
المقال ده نُشر عمل أزمة كبيرة أن إزاي نقول أن لبن البقر مُضر؟!، إحنا هدفنا أن
الأم تعرف كل المعلومات الموثقة اللي بـ تُقال حولها وأنها تعرف أن فيه اختيارات ثانية
في كل شيء وهي من حقها تختار اللي هي شايفاه مناسب لها ولأسرتها.
الموقع بـ يقدم ثلاث خدمات رئيسية بـ تتفرع منها عدة خدمات
فرعية وهم: المعلومات المقدمة في صورة مقالات وفيديوهات ونصائح، والمجتمع وهي
المناقشات اللي بـ تتم ما بين عضوات الموقع زي أن واحدة تسأل سؤال ويشترك الجميع
في مناقشتها، والقسم الثالث هو التطبيقات أو الـapplications
اللي بـ تساعد المرأة أنها
تمارس حياة منظمة.
من أمثلة التطبيقات دي الـ to-do-list اللي بـ تقدر الست تملأها
أول الشهر بالفعاليات والحاجات المهمة اللي عاوزة تعملها على مدار الشهر زي مواعيد
زيارة مدرسة الأولاد أو مواعيد الامتحانات أو متابعات الدكتور وبـ تقدر الأم
تطبعها وتستعين بها طول الشهر. وثانى تطبيق مهم هو جدول حساب الدورة الشهرية وده بـ
يفيد المرأة لو عاوزة تبقى حامل أو عاوزة تمنع الحمل أو حتى عاوزة تضبط رحلة سفر
مع جوزها وهـ نلاقي كمان الأجندة والـshopping list أو قائمة
المشتروات.
أقسام الموقع هي: الحمل والولادة، تربية وصحة الأبناء، البيت،
المطبخ، أنت. أما القسم اللي حاز على إعجاب الكثيرين حتى الرجالة فهو قسم “أرسليها
لزوجك” وهو قسم فيه مقالات سريعة مهمة حول الأزواج أو حول معلومات متعلقة بهم
أو معلومات لازم يعرفوها وده مختصر في عدد كلماته مراعاة لأن كثير من الرجالة مش بـ
يحبوا يقرأوا مقالات حول التربية وممكن الستات بسهولة يبعتوها لأزواجهم.
من الأفكار المستقبلية اللي بـ يتم دراستها علشان تتطبق في
سوبر ماما: الفيدوهات الخاصة بالموقع وهـ تتضمن نصائح من خبراء وأطباء وخدمات
النصائح المسموعة وقسم بـ يعرض نماذج للأمهات الناجحة.
كثير من المشاكل والصعوبات بـ تقف عائق أحيانًا في طريق
ثلاثي سوبر ماما لكن هم بـ يتكيفوا معاها وبـ يديروها. وعن ده بـ تقول ياسمين: “عدم
الاستقرار السياسي من أكثر الحاجات اللي بـ تؤثر على مشروعنا لأن لو فيه أي حاجة
جديدة بـ تحصل بـ ينخفض جدًا معدل الزيارات للموقع نتيجة لمتابعة الأمهات للمواقع
السياسية. بالإضافة أن الموقع فيه كُتاب كثير متطوعين وعلى الرغم من التزامهم
الشديد ومهارتهم لكن إدارة المتطوعين بـ تفضل مشكلة بـ تواجهنا لأن المتطوعين لازم
يلتزموا بمواعيد تسليم الشغل وفي نفس الوقت هم مشغولين بأعمالهم الأخرى، وطبعًا
الإدارة المالية بـ تكون صعبة في أي مشروع خاصة في بدايته لأننا لازم ندفع مرتبات
ولازم نعمل دعاية ونشارك في فعاليات في نفس الوقت.
تابعوا “سوبر ماما” على صفحة الفيسبوك.
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
