The Definitive Guide to Living in the Capital , Cairo , Egypt

الحياة في كايرو

سينما ومسرح وتاريخ.. يلا نزور شارع عماد الدين بوسط القاهرة!

الأمريكيين رينسانس سينما شارع عماد الدين كوزموس ليدو نجيب الريحاني
سينما ومسرح وتاريخ.. يلا نزور شارع عماد الدين بوسط القاهرة!
    بواسطة
    Mohamed Talaat

    الصورة الرئيسية لشارع عماد الدين في الثلاثينيات

    من عشرات السنين، وعلى الطراز الفرنسي، اتبنى في القاهرة شارع عماد الدين، واللي مبانيه بتشبه مباني حي “البوليفار” في باريس. في الشارع ده أجمل العمارات اللي تم بناءها على يد مصممين عالميين، وأشهرها عمارة “الخديوي” اللي صممها المهندس الإيطالي أنطونيو لاشياك. كمان اشتهر الشارع بأنه منبع الفن والسهر والفرحة، وبخلاف عمارة الخديوي، فيه حاليًا أقدم كافيه في وسط البلد، و2 سينما ومسرح.

    خلال السطور الجاية هنقول لكم على أهم الأماكن اللي تقدروا تزوروها في شارع عماد الدين.

    سينما رينيسانس

    بتتكون السينما من 4 قاعات عرض، وبتعرض دايمًا أجمل الأفلام، وهي من السينمات اللي عليها إقبال شديد طول الوقت نظرًا لشهرتها وسعر تذاكرها المميز، واللي خلاها واحدة من أرخص سينمات القاهرة رغم مستواها العالي.

    وهي موجودة في 8 شارع عماد الدين – وسط البلد.

    مسرح نجيب الريحاني

    اشترى نجيب الريحاني قهوة في شارع عماد الدين وحولها لمسرح سنة 1917 لعرض مسرحياته عليه، خاصة أنه كان فنان مشهور جدًا في الوقت ده محليًا وعالميًا، وشخصية كشكش باشا اللي كان بيقدمها كانت عاملة صدى كبير، والمسرح مازال شغال لحد دلوقتي وبيتم عرض “مسرح مصر”، عليه.

    تقدروا تزوروا المسرح في 17 شارع عماد الدين – وسط البلد.

    سينما كوزمس

    على الرغم من عدم شهرتها، إلا أن سينما كوزمس من أعرق السينمات في وسط القاهرة، وهي مبنية على طراز سينما أوديون في لندن، وبتتكون من 5 قاعات وهي أول سينما متعددة القاعات في مصر، وبتستوعب 1200 شخص.

    وعنوانها 12 شارع عماد الدين  – وسط البلد.

    عمارة الخديوي

    هي من أشهر عمارات وسط القاهرة، واللي صممها هو المهندس المعماري الشهير أنطونيو لاشياك، وتم تسميتها بعمارة “الخديوي” نسبة إلى الخديوي عباس حلمي، وهي مقسمة لـ4 عمارات مساحتها الكلية 9025 متر مربع وكل عمارة مكونة ممن 7 أدوار وفي آخرهم قبة من طراز فريد.

    سينما ليدو

    بدأ العمل في سينما ليدو سنة 1953 لكن هي لها تاريخ قديم. في سنة 1917 المكان اتحول من قهوة لمسرح وكان اسمه “الإيجيبسيانة” وكان مشهور جدًا لمشاركة نجيب الريحاني فيه، والمسرح ده شهد غناء أناشيد وطنية في ثورة 1919، وفي سنة 1922 تحول المبنى لسينما الوطني، وبعدين اتهد ورجع اتبنى علشان يكون مسرح “بريتانيا” سنة 1923 وبعدين اتحول لسينما كابيتول سنة 1925، قبل ما يتهد سنة 1953 ويتم بناء سينما “ليدو” الحالية عليه، وبعد حريق كبير سنة 1998 اتقفلت السينما، ولكن في سنة 2014 الحكومة رجعت جددت السينما وعملت فيها 4 قاعات عرض.

    العنوان: 23 شارع عماد الدين، وسط البلد.

    الأمريكين كافيه

    زمان كان بيطلق عليه “كافيه البشوات” وهو تأسس سنة 1943، وبيقدم أكل وشرب بجودة كويسة وسعر مميز، وما زالت الخدمة فيه مختلفة عن أي مكان تاني في وسط القاهرة، ولسه محافظ على طرازه المعماري اللي كان عليه طوال السنين اللي فاتت.

    عنوانه 7 شارع عماد الدين – وسط البلد.

    مقترح