طماطم.كوم: موقع لكل اللى الستات محتاجينه!
Shaimaa El Gammal
الستات
نصف المجتمع، ومسئولات عن إدارة البيت وتربية الأطفال، ده غير أنهم بـ يحاولوا دائمًا
يوفقوا بين النجاح في شغلهم والنجاح في إدارة بيتهم. وده كان السبب اللي علشانه تم
إنشاء موقع “ladiez corner” أو طماطم. كوم وفقًا لشخصية الطماطماية الظريفة
المشهورة في الموقع.
الموقع
فكرة اثنين مهندسات هم رشا عيطة وريهام السهيلي وانضمت لهم بعد كده شريكة ثالثة هي
د. راندا محمد وكان هدفهم من الموقع ده أنهم يساعدوا الستات في أن كل دقيقة من
وقتهم تبقى مفيدة وأنهم يساهموا في زيادة وعي المرأة ويخرجوا الطاقة اللي عندها من
أجل تنمية المجتمع.
فريق الموقع مكون من حوالي 9 أفراد، ما بين مهندسين
ومحررين ومتخصصين في الدعاية الإلكترونية وأطباء. بدأ فريق الإدارة رحلته مع
التجارة الإلكترونية وإنشاء المواقع الهادفة منذ عام 2001 وأنشأوا شركتهم الخاصة
في 2007 وبدأت فكرة الموقع تيجي لهم في
2010 وكان وجود طبيبة كبيرة شريكة في المشروع عامل ساعدهم على سهولة توثيق
المعلومات ونجاح المشروع.
اختار الفريق “طماطم” علشان يكون اسم الموقع
لعدة أسباب منها أن الطماطم فاكهة مهمة جدًا في قيمتها الغذائية وشكلها جذاب ومن كثر
أهميتها تصدرت أغلفة العديد من كتب الطبخ والتغذية بالإضافة إلى أنه اسم لطيف ويعتبر
دلع فاطمة في المجتمع المصري.
اختلف “طماطم”
عن المواقع الثانية بكونه الوحيد اللي اعتمد على أن جزء كبير من محتواه يقدم من السيدات المتخصصات إلي
الآخريات وصل عددهم لـ 2950 سيدة وده
ساهم بشكل كبير في أن حجم مكتبة الوصفات مثلاً يوصل إلى 5000 وصفة من مختلف
المطابخ العالمية وبمختلف مستويات التعقيد، ما بين دسم وغني إلى دايت وشهي إلى
سريع ومخصص للأطفال.
ورغم العدد الكبير جدًا من مقالات متابعي الموقع إلا أن
وجودmoderator ساعد أن يبقى فيه قواعد صارمة
للنشر بحيث أن الوصفات والأعمال
الفنية كلها تكون مش منقولة من الإنترنت وأن الصور تكون متصورة بواسطة المشتركين
فعلاً.
واعتمد “طماطم” على نظام النقط في تحفيز
السيدات على المشاركة، فـي كل أسبوع بـ يختار الموقع فائزة وهي الأعلى تحصيلاً
للنقط، بالإضافة لمسابقات دورية وجوائز قيمة للمتميزات.
الموقع فيه أقسام كثير أهمهم دليل الطبخ، ركن الرشاقة،
طبيبك، أطفال طماطم، المول.
القسم الأهم في الموقع هو قسم دليل الطبخ والقسم ده بجد
مش سايب حاجة لها علاقة بالمطبخ إلا وجايبها كل أنواع الأكل من نشويات لبروتينات
لحلويات لمشروبات لأكلات أطفال وتحت كل قسم من دول تقسيمات فرعية أكثر يعني مثلاً
قسم النشويات تحته (أرز، ومكرونة، وبيتزا، وفطائر ومخبوزات، وبطاطس) وهكذا في بقية
أنواع الأكلات.
قسم الطبخ أشبه ما يكون بنادي بـ يضمن عدد مهول من
الستات المهتمات بالطبخ والبارعات فيه. كل عضوة ممكن تعمل صفحة شخصية بـ “بروفايل”
خاص بها و URL خاص بها كمان
وده بـ يخليها تقدر تتواصل مع كل العضوات بالإضافة لعمل شعبية رهيبة على
الإنترنت.
الموقع بـ يوفر كمان خدمة “شيفات طماطم” وده بـ
يسمح لزائرات الموقع بسؤال أعضاء نادي الطبخ عن أي استفسار فيما يخص المطبخ أو
الطبخ.
نيجي لقسم ركن الرشاقة، وده بـ يقدم خدمات بـ تساعد
الستات في الحفاظ على رشاقتهم زي جدول السعرات الحرارية الموجودة في المأكولات المختلفة،
ومعلومات مفيدة عن الرشاقة، بالإضافة لأنظمة مختلفة للريجيم ومؤشر حساب كتلة
الجسم.
أما قسم طبيبك فده بـ يتيح للزائرات سؤال الأطباء عن أي
سؤال بالإضافة للعديد من المقالات الطبية اللي بـ يشرف عليها أطباء متخصصين في
مجالات مختلفة.
قسم الأطفال بـ يقدم مساحة كبيرة للأمهات والأطفال أنهم
ينشروا أعمالهم الفنية مع وجود صفحة خاصة بأعمالهم بالإضافة لدليل المدارس والجزء
الخاص بالسلوكيات.
ويتميز الموقع بوجود قسم خاص بالتسوق الإلكتروني اسمه
“المول” وبـ يُباع فيه أكثر من 15 ألف منتج متنوع ما بين الملابس والأدوات
الكهربائية وأدوات المطبخ ومستلزمات الأطفال والكتب.
هـ تلاقي كمان في الموقع حاجة اسمها “نصيحة اليوم”
ودي عبارة عن نصيحة بسيطة مفيدة بـ يتم تحديثها كل فترة.
لوعايزة تتواصلي مع عالم الطماطماوية ممكن تدخلي على صفحتهم على الفيسبوك، أما
لو أنت مهتمة بالطبخ بوجه خاص ممكن تدخلي صفحتهم الخاصة بالأطباق اللذيذة.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
