The Definitive Guide to Living in the Capital , Cairo , Egypt

الحياة في كايرو

“عربية الدفا”.. شباب مصريين بيوزعوا “شوربة عدس” ببلاش على البردانين

التكية شوربة عدس عدس على البردانين عربية الدفا مبادرة
“عربية الدفا”.. شباب مصريين بيوزعوا “شوربة عدس” ببلاش على البردانين
    بواسطة
    Mohamed Talaat

    المصريين دايمًا فيهم الخير، وكل يوم فيه جانب إنساني بيظهر لنا ويخلينا سعداء، ومن ضمن الحاجات اللي بتحصل في مصر حاليًا وأسعدتنا هي مبادرة “عربية الدفا” اللي بيعملها شباب تابعين لمشروع مطبخ التكية الخيري، واللي بدأوا من رمضان اللي فات بشكل رسمي انهم يشتغلوا على توزيع وجبات متكاملة على المحتاجين تحت شعار “فرح العين قبل ما تملئ البطن”.

    “عربية الدفا” بدأت فكرتها أن بعض الشباب المصريين في محافظة الشرقية قرروا مع موجة السقعة الأخيرة يفكروا في الناس اللي بتبقى موجودة بره البيوت وفي الشوارع، وقرروا أنهم يقدموا لهم وجبات شوربة العدس مجانًا، وبيتم فيها توزيع الأكل اللي بيكون طازة، وكمان بيتحفظ في علب حرارية تحافظ على سخونته، ومعاه عيش وبصل وليمون، كوجبة متكاملة، والوجبات بتتوزع مرتين في اليوم، الأولى بتكون الصبح على عمال اليومية والنظافة وغيرهم علشان يبقى عندهم طاقة يستمروا في عملهم وجهدهم، والمرة التانية بتتوزع بالليل الساعة 11 وبتكون للأسر في المستشفيات وعمال الخدمات في الشوارع.

    أما فكرة مطبخ التكية الخيري، فهي بدأت عن طريق كريم فودة، أحد شباب مدينة الزقازيق في محافظة الشرقية، بمشاركة مروة حازم، اللي ساكنة في محافظة الإسماعيلية وبتروح يومين في الأسبوع للشرقية علشان تساعد في الوجبات، وبدءوا بالفعل أنهم يعملوا أكل على فترات ويوزعوه على مواطني الشرقية بكميات مختلفة كل مرة، وقرروا أنهم يتنقلوا من البيوت لفتح مطعم خيري يقدروا من خلاله يعملوا أكل أكتر للأهالي.

    واتبرع فاعل خير بمكان علشان يعملوه مطعم، وبالفعل بدءوا يجهزوا وجبات لأول مرة في رمضان من مكانهم الجديد بشكل أكثر تنظيم، وانضم ليهم فئات مختلفة من المتطوعين سواء طلبة وأطفال وشباب وسيدات وكبار السن، وكان حصيلة الخير اللي بيقدموه يوميًا من 1500 لـ1700 وجبة، وآخر ليلة في رمضان “وقفة العيد”، تم توزيع 10 آلاف وجبة لدرجة أنهم وقفوا قطار ووزعوا الوجبات على كل اللي فيه، وكل ده من خلال التبرعات اللي بتوصل لهم من أهالي الشرقية.

    الشباب المتطوعين في المبادرة الخيرية دي بيقدموا وجبات كل جمعة مميزة اسمها “أكل مطاعم”، بيكون فيها أكل زي “بروست – برجر – شاورما – لازانيا – نجرسكو – حواوشي – بلح الشام – كنافة – بسبوسة” وغيرهم من الوجبات اللي بتتقدم دايمًا بشكل شيك ويفرح المواطنين.

    العنوان: الشرقية – الزقازيق – تقسيم المعلمين – آخر شارع مدرسه الشبان المسلمين بجوار مسجد المصطفي.

    تليفون: 01024616888

    صفحة الفيسبوك من هنا.

    مقترح