The Definitive Guide to Living in the Capital , Cairo , Egypt

الحياة في كايرو

على قد الإيد.. أحلى 6 خروجات في القاهرة للويك إند

أجمل أماكن الفسح في القاهرة أماكن للفسح في القاهرة خروجات في القاهرة خروجات في الويك إند
على قد الإيد.. أحلى 6 خروجات في القاهرة للويك إند
    بواسطة
    Mohamed Sabry

    القاهرة مليانة أماكن ترفيهية وخروجات ممتعة كتيرة، زي السينمات والمطاعم والنوادي، أو الأماكن اللي ممكن تروحها تقضي فيها اليوم كله لحد آخر النهار، بس أحيانًا بنحتاج خروجات للويك إند تكون مميزة وفي نفس الوقت مش مكلفة وتناسب الميزانية، خاصة لو آخر الشهر، علشان كده جمعنا لكم أفضل خروجات على قد الإيد لويك إند مميز في كايرو:

    فلوكة في النيل

    من أجمل الأماكن اللي ممكن تزورها وتستمتع بجوها، تقدر تخرج مع أسرتك أو أصحابك في رحلة على فلوكة في النيل، وتقضوا أحلى وقت وسط الأغاني والمزيكا، وانتوا بتتفرجوا على منظر الأماكن على الضفتين.

     

    حديقة الحيوان

    المكان اللي ممكن يستمتع فيه الكبار والصغيرين بلا استثناء، وسط أنواع مختلفة من الطيور والحيوانات الجميلة، وماتنساش طبعًا تأكل القرد وسيد قشطة، وجولتك في اليوم كله مش هتكلفك كتير.

    برج القاهرة

    من أشهر العالم السياحية في القاهرة، وتقدر من فوق تتفرج على القاهرة كلها بشكل يبهرك بجماله، وكمان البرج فيه مطعم دوار، تقدر تطلب فيه وجبتك وانت بتتفرج على القاهرة بـ 360 درجة.

     

    فطار على النيل

    اخرج من روتين أجازتك المتكرر واصحى بدري مرة وانزل جرب أحلى فطار على النيل، فيه أماكن كتيرة زي كافيهات شارع عبد العزيز آل سعود في المنيل، بتقدم أنواع مختلفة من الفطار وبأسعار مناسبة، وتقدر بعدها تتمشى على الكورنيش، أو تتخلص مشوار مهم من غير زحمة.

     

    الحدائق العامة

    القاهرة مليانة حدائق عامة ومتنزهات كتيرة بمساحات خضراء وزهور نادرة ومناظر خلابة، تقدر تستمتع فيها بالجو الجميل وكمان فيها مطاعم وكافيهات لو حبيت تشرب حاجة، زي: حديقة الأزهر، حديقة الفسطاط، حديقة الأورمان، الحديقة الدولية.

     

    المتحف المصري

    تقدر تاخد جولة سياحة في المتحف تتعرف فيها على تاريخ الفراعنة وتعرف معلومات عن بلدك هتبهرك، وتشوف أشكال مختلفة من التماثيل وتعرف قصة كل واحد منهم، طبعًا تاخد أحلى الصور للتجربة دي.

     

    يا ترى خروجتكم للويك إند الجاي هتكون فين؟

    مقترح