The Definitive Guide to Living in the Capital , Cairo , Egypt

لو بتدور على تجربة تجمع بين التسوق، التراث، والأجواء الحلوة، يبقى معرض “ديارنا” 2026 هو وجهتك المثالية. على هامش معرض الزهور في المتحف الزراعي، هتلاقي نفسك قدام بانوراما حية من الحرف اليدوية المصرية، من النوبة لسيوة لأخميم. المقال ده هيديلك دليل سريع وعملي لكل اللي محتاج تعرفه قبل الزيارة: الأسعار، المواعيد، وأهم الحاجات اللي تستاهل تشتريها.

التخطيط لزيارتك: المواعيد والتذاكر

عشان تستمتع بتجربة تسوق راقية، دي المعلومات الأساسية اللي محتاجها:

المكان: المتحف الزراعي بالدقي – شارع وزارة الزراعة.

أقرب مترو: محطة الدقي وبعدها التمشية أقل من 10 دقائق، ولو مواصلات أي ميكروباص بيعدي على شارع الدقي والبطل أحمد عبد العزيز هينزلكم قدام المتحف.

سعر التذكرة: 20 جنيهاً “شاملة دخول المعرض والاستمتاع بالمتاحف المتنوعة حتى الساعة 3 عصراً”.

تذكرة السيارة: 20 جنيهاً.

ساعات العمل: من 9 صباحاً حتى 9 مساءً.

جولة في أروقة “ديارنا”: من البيت النوبي لواحات مطروح

المعرض مقسم لمجموعة من الأقسام اللي بتقدم منتجات متنوعة جداً، مابين الأثاث، الموضة، والمنتجات الغذائية الطبيعية:

ركن “المونة” والمنتجات الطبيعية “الأكل والزيوت”

لو بتدور على جودة المحافظات الأصلية، القسم ده هو “الكنز”

الجمعية التعاونية بمطروح: زيت زيتون، مخللات، عسل، طحينة، وسمنة بلدي، بالإضافة لخضروات مجففة وبذور.

صندوق دعم الصناعات الريفية: عسل وتمر بجودة عالية.

بدوية كرافت وزهرة النوبة: متخصصين في البهارات النادرة، زيت الزيتون، والمقرمشات النوبية اللي ليها طعم خاص.

الأسر المنتجة: بيقدموا منتجات زي الزعتر، المرمرية، والصلصة البودر، وفواكه مجففة.

الموضة، العبايات، والإكسسوارات

المعرض السنة دي “ديستينيشن” لكل ست بتدور على “ستايل” مختلف:

لارا فاشون وديجاتيلي: العبايات المطرزة هاند ميد والشغل الصعيدي المطعم بـ “خيوط التيلي” الفاخرة، بأسعار بتبدأ من 850 جنيه للعبايات.

إكسسوارات خان الخليلي: براند “عزت” بيقدم نحاس بيور وإكسسوارات علاجية بأسعار مميزة من 50 لـ 350 جنيه.

براندات الإكسسوارات: تنوع بين الستانلس عند “جاليري عشم”، والخرز واللولي عند “Pearls 77” و”هاتوش”، والأحجار الكريمة عند “روح الفؤاد”.

شنط وجلود: تشكيلات من الجلد الطبيعي والكروشيه مقدمة من  Rsl، سوزان الحكيم، ووزارة الصناعة.

ديكورات المنزل واللمسات الفنية

عشان تضيف “روح” لبيتك، هتلاقي اختيارات كتير:

سيوة سبرينجس: أبجورات الملح الصخري المشهورة بفوائدها، وأعمال خشب البرتقال والليمون.

شغل الصدف: الجمعية التعاونية لخان الخليلي بتقدم صواني وترابيزات وبراويز صدف فخمة جداً.

الفخار والخشب: جمعية الملابس بالفيوم بتقدم خصم 50% على كل أنواع الفخار، ومعاهم كراكيب دودو وهالة حماد بصواني خشبية “هاند ميد” ولوحات فنية.

الريزن والشموع: براند “غزل” متميز جداً في شطرنج وطاولة و”نوت بوك” ريزن، والأهم “الجوابات الهاند ميد” اللي تقدر تكتب فيها أي جملة تحبها.

دليل التسوق الذكي في “ديارنا“

لعشاق منتجات “أخميم”: هتلاقوا كل منسوجات أخميم المعروفة بجودتها عند “أخميم ستور”.

للهدايا المميزة: براند “ببساطة” بيقدم “هولدر شاي” خشب مطبوع وميداليات وماجات سيراميك شيك جداً.

للكروشيه والمكرمية: المعرض مليان شغل احترافي من “مانيوال هاند ميد” و”منتجات الهلال الأحمر”.

رأي “كايرو 360“:

معرض “ديارنا” السنة دي هو فرصة ذهبية لشراء منتجات بجودة عالية بأسعار المصنع مباشرة، وبيدعم صغار الحرفيين. المكان واسع ومنظم، والجو العام مبهج جداً بوجود الزهور حواليك من كل جانب.