The Definitive Guide to Living in the Capital , Cairo , Egypt

لو بنزين عربيتك خلص على الطريق.. سيارة الإغاثة المرورية هتنقذك
    بواسطة
    Omar Abd-elmaqsoud

    كتير بنتعرض لمواقف سخيفة بعربيتنا وإحنا على الطريق، سواء كان طريق سفر سريع، أو جوه البلد، وسواء كانت عربيتنا قديمة أو جديدة، كلنا بنتعرض لإن كاوتش العربية يعملها معاك، أو البنزين يخلص منك قبل أقرب بنزينة، أو في أسوء الأحوال تعمل حادثه، وفي كل الحالات دي أغلبنا بيحتاس ومابيعرفش يتصرف.

    الرائد “هيثم الكنيسي” من الإدارة العامة للمرور ادالنا الحل في المواقف اللي زي دي، وهو ” سيارة الإغاثة المرورية” الموجودة على كل الطرق السريعة، سواء الصحراوي، أو الدائري، أو الإقليمي الجديد، واللي ممكن تستدعيها بإنك تتصل على الرقم : 01221110000 طول اليوم وطول أيام الأسبوع، يعني 7/24 .

    “الكنيسي” قال لبرنامج “دوس بنزين” مع الإعلامي ” تامر بشير” إن الإدارة العامة للمرور هتنشر عدد كبير من سيارات الإغاثة المرورية على مختلف الطرق السريعة والمجهزة للتعامل مع كافة مشكلات العربيات على الطرق، من أول مشكلة البنزين لو خلص منك، أو مشكلة في الكاوتش، لحد الحوادث لا قدر الله.

    العربيات دي بتوصل زي ما قال “الكنيسي” في أقل من 5 دقائق، وفيها “جراكن” بنزين أو سولار، ومكنة كهرباء بتشتغل في حالة إن المنطقة اللي اتعرضت فيها للمشكلة مفيش فيها نور أو إضاءة، وكمان فيها “صدادات” في حالة حدوث حادثة بتتحط ورا العربية للحماية، ومنشار كهرباء لقطع الصاج الحديد للعربية في حالة الحادثة.

    مقترح