The Definitive Guide to Living in the Capital , Cairo , Egypt

عيد الأضحى 2025 خلص، وناس كتير مكانوش لحقوا يخرجوا. بس ماتقلقوش! إحنا في كايرو 360 دايمًا بندورلكم على خروجات ممتعة وأسعارها معقولة، وعلشان كده جيبنالكم 5 أماكن ترفيهية مميزة، هتخليكم تحسوا إن إجازة العيد لسه مكملة، ومناسبة لكل الأذواق.

حديقة الأزهر

من أكبر وأجمل الحدائق في مصر، موجودة في الجمالية. فيها مساحات خضرا كبيرة، ألعاب للأطفال، وكافيهات ومطاعم بتطل على مناظر خلابة. هتستمتعوا بجمال القاهرة الفاطمية من 9 الصبح لـ10 بالليل كل أيام الأسبوع. سعر التذكرة 40 جنيه للكبار و30 جنيه للأطفال.

جولة نيلية

الجولات النيلية دايمًا ليها طابع خاص. تقدروا تركبوا من كورنيش ماسبيرو أو الدقي أو المعادي، وأسعار الرحلات بتبدأ من 30 جنيه وبتوصل لـ500 جنيه حسب المركب والأنشطة. وكمان ممكن تجربوا الأتوبيس النهري من قدام ماسبيرو وممشى أهل مصر بسعر 20 جنيه للفرد.

فاميلي بارك

في مدينة نصر، هتلاقوا كل حاجة في مكان واحد: أنشطة ثقافية زي المسارح والمراكز الثقافية، وألعاب ترفيهية زي القطار والفنار والسفاري وحديقة الحيوان المصغرة. سعر التذكرة 30 جنيه للفرد (غير الألعاب)، وفيه باقات مميزة بأسعار مخفضة.

فيتالي مول

لو بتحبوا المولات، فيتالي مول في القاهرة الجديدة هيكون اختيار مناسب. قريب من البوابة 4 للجامعة الأمريكية، فيه محلات كتير، منطقة ألعاب للأطفال، وكافيهات ومطاعم متنوعة. وكمان هتلاقوا أحلى أماكن للتصوير والذكريات.

أكوا بارك

مدينة ملاهي مائية على مساحة 66 ألف متر، فيها حمامات سباحة، زحاليق، أمواج صناعية، وألعاب مائية مختلفة. وكمان فيها شاليهات للإيجار ومساحات خضراء هتحسسك بالراحة. موجودة في الكيلو 31 طريق مصر – الإسماعيلية الصحراوي قدام مدينة المستقبل – العبور. سعر التذكرة شاملة الدخول والألعاب ووجبة: 490 جنيه للكبار و430 جنيه للأطفال لحد 10 سنين.