The Definitive Guide to Living in the Capital , Cairo , Egypt

سنة 1905، اختار البارون إمبان البلجيكي وشريكه المصري باغوص نوبار باشا منطقة نائية في شمال شرق القاهرة علشان يبنوا فيها مدينة الأحلام. البداية كانت بتأسيس شركة “واحات عين شمس”، اللي بقت بعد كده “شركة مصر الجديدة للإنشاء والتعمير”، لتأسيس خط سكة حديد.

وهنا بدأ الحلم يتحقق فوق أنقاض مدينة هليوبوليس القديمة. وقدروا بالفعل يحوّلوا الصحراء لحياة كاملة فيها كل فئات الشعب.وفي السطور الجاية، هناخدكم في جولة داخل حي مصر الجديدة بعد مرور 120 سنة على تأسيسه.

أول مكان اتبنى في الحي، ولسه لحد النهارده أيقونة معمارية، هو قصر البارون إمبان. القصر اللي اتحطت أول طوبة فيه سنة 1911، وكان تصميمه مميز جدًا لأنه دمج بين الطرازات الأوروبية والإسلامية والهندوسية، وكان مستوحى من معابد كمبوديا، وصممه المهندس الفرنسي ألكسندر مارسيل.

التمشية في مصر الجديدة متعة ما تتوصفش، وسط مباني بتتكلم عن نفسها وشوارع بتحكي حكايات. تقدروا تلفّوا في شوارع زي الكوربة، تريومف، روكسي، الإسماعيلية، صلاح الدين، الجامع، غرناطة، والميرغني.. وكل شارع فيهم ليه روح خاصة وملامح بتاخدكم في رحلة ما بين التاريخ والحداثة.

لكن لو هنختار قلب الحي النابض، فهيبقى الكوربة، المنطقة اللي مبانيها مرسومة على شكل مثلث فريد من نوعه، والتصميمات فيها خلتها واحدة من أجمل مناطق القاهرة.

من الأماكن اللي لازم تزوروها كمان، حديقة الميرلاند. وبعد تجديدها، بقيت مش مجرد حديقة، لأ دي بقت أيقونة خروجات القاهرة. التذكرة بـ20 جنيه، وفي الويك إند والأعياد بـ30 جنيه.

كمان، لازم تشوفوا قصر غرناطة اللي بيتم تطويره حاليًا تمهيدًا لافتتاحه. وممكن تعدّوا على قصر الاتحادية، مقر الحكم الرسمي من الخمسينات، وكمان متحف القوات الجوية في شارع صلاح سالم وتذكرته بـ30 جنيه.

ولو معاكم أطفال، جربوا تروحوا متحف الطفل في شارع أبو بكر الصديق، واللي اتأسس سنة 1985، وهو مركز ثقافي وتعليمي ممتع جدًا، وأسعاره بتختلف حسب الأنشطة.

طبعًا، الحي فيه مولات ومحلات من كل نوع، لكن خلينا نتكلم عن نقطة ضعفنا المفضلة: الأكل والشرب!

لو بتحبوا القعدة البلدي، روحوا على قهوة الإسماعيلية أو أسوان في قلب الكوربة. الاتنين ليهم طابع خاص، ورغم بساطتهم لكن شعبيتهم كبيرة جدًا.

بس خدوا بالكم إن الجو في الصيف بيكون حر.

لو بتميلوا للكافيهات، عندكم اختيارات كتير:

كافيهات جوه حديقة الميرلاند، P8 في شارع شبين، 1122 في فندق راديسون بلو، مود كافيه في الكوربة.

ولو بتحبوا تشوفوا مصر الجديدة من فوق وقت الغروب، زوروا روف جاردن في السبع عمارات أو حواري كافيه، تريك ترانك، والكوخ في الكوربة.

ومن ترشيحاتنا كمان:

زودياك في شارع أسوان، ديكوراته مستوحاة من التراث اليوناني ومكانه مثالي للصور.

شغف وورك سبيس في عثمان بن عفان، كل غرفة فيه ليها طابع مختلف ومميز جدًا للناس اللي بتحب الهدوء.

Kafe in في شارع بطرس غالي، تجربة ممتعة سواء كنت لوحدك أو مع أصحابك، وكمان مناسب لأعياد الميلاد، وقعدته الآوت دور معمولة بزجاج شيك ومريح.

وبالنسبة للأكل، لازم نبدأ بـشاورما أبو حيدر في شارع صلاح الدين – روكسي، وبعدها عصير المانجا الشهير.

ومن بعده جربوا حواوشي العائلات في شارع عثمان بن عفان، ومتنسوش مشروب الأوريو من عصائرهم.

طبعًا مطعم الدهان في الميرغني غني عن التعريف، وأكله المشوي مايتفوتش. بدأ بـ”النيفة”، وسرعان ما بقى له صيت كبير بسبب جودته العالية، واتلقب بـ”الدهان العقر”.

لو نفسكوا في تجربة عالمية، زوروا مطعم لو شانتي الموجود من سنة 1976، وبيقدم أطباق سويسرية مميزة، وهنتكلم عنه باستفاضة قريب في مقال خاص.

وكمان مطعم بالميرا في الكوربة، من سنة 1946، وكان زمان قبلة للمشاهير والملوك، ولسه بيحافظ على فخامته.

ومينفعش نختم الجولة من غير ما نحلي!

جربوا كنافة العهد الجديد من سنة 1927 في شارع دمشق، ومتنسوش أبو حمامة الحلواني في شارع هارون، وبسبوسته بالقشطة والسمنة البلدي هتاخدكم لمكان تاني!

في النهاية، حي مصر الجديدة واحد من أكتر المناطق اللي فيها روح، تاريخ، ورُقي.

أكيد مش هنقدر نغطي كل تفاصيله في مقال واحد، لكن حاولنا نرسم لكم خريطة لأجمل الأماكن اللي تستحق الزيارة، من زمان لحد دلوقتي.

وكل سنة ومصر الجديدة بخير بعد مرور 120 سنة على تأسيسها!