The Definitive Guide to Living in the Capital , Cairo , Egypt

الحياة في كايرو

مطاعم وكافيهات وكتب وسينما.. دليلك للاستمتاع بيوم كامل في الزمالك

حي الزمالك قصر عائشة فهمي قضاء يوم في الزمالك كافيها الزمالك مطاعم الزمالك معالم الزمالك
مطاعم وكافيهات وكتب وسينما.. دليلك للاستمتاع بيوم كامل في الزمالك
    بواسطة
    Cairo 360

    الصورة الرئيسية: Eric Monkaba.

    رنا شرف

    حي الزمالك من الأحياء الراقية في القاهرة، فيه عراقة وتاريخ وبيتمتع بشعبية كبيرة عند ناس كتير، وأجيال كتير من المصريين ليهم ذكريات حلوة مع الزمالك، اللي المشي بس في شوارعها هو تجربة حلوة في حد ذاتها.

    في الموضوع ده هنعرفك على اقتراحات هتخليك تقضي يوم مميز في المعادي، هتستمتع بأكلة حلوة ومشروب مميز وكمان هتتفرج على أفلام وتشتري كتب.. يلا نبدأ أول خطوة في المعادي.

    نبدأ بالإفطار!

    مطعم زوبا الزمالك بيوفر لك إفطار مميز، يمكن لأنه بيقدم الإفطار المصري الأصيل اللي بيتكون من الفول والطعمية والبيض بالبسطرمة، الإفطار الجامد اللي كلنا بنحبه. “زوبا” أسعاره غالية شوية بالنسبة لبعض الناس، لكن بالتأكيد جودته عالية، والمطعم موجود في 132 شارع 26 يوليو، الزمالك.   

    وفيه مكان إفطار تاني مميز، وهو العبد، وده طبعًا حلواني معروف ومشهور، لكن مش كتير يعرفوا إنه عنده إفطار حلو وخفيف، عبارة عن كرواسون لذيذ، مع قهوة تركي، والأسعار معقولة جدًا، يعني الإفطار كله مش هيزيد عن 30 جنيه.

    زيارة تاريخية وغداء وكافيه

    بعد الإفطار ننصحك تروح مكان فني وثقافي مميز، وهو قصر عائشة فهمي، اللي بيعتبر من أجمل الأماكن في الزمالك، خصوصًا لمحبي التصوير والأماكن التاريخية، والجميل إن دخول القصر مجاني!

    في القصر هتقضي وقت جميل، وهو مفتوح يوميًا من 9 صباحًا لحد 9 مساءً، هتستمتع هناك بمقتنيات القصر المميزة، وهتشوف حوالي 80 عمل فني ما بين مصر وعالمي، وهتلف ما بين 48 غرفة وقاعة.

    بعد الخروج من القصر، ننصحك تتمشى شوية على كورنيش النيل، وبعدها تتفرج على مباني الزمالك التاريخية، وتبص بصة على المحلات القديمة اللي هناك.

    لو حسيت بالجوع ممكن تاخد الغداء بتاعك في مطعم ستديو مصر، وده موجود داخل مركب نايل سيتي وبيعتبر من الأماكن اللي الفيو بتاعها حلو لأنه علي النيل، والمطعم بيقدم أكل مصري أصيل معمول بمزاج عالي.

    ستديو مصر موجود أمام بوابة نادي الفروسية بالجزيرة.

    ولو حابب بقي بعد الغدا تروح كافيه حلو يبقى ننصحك تروح بينوس كافيه، وده واحد من أشهر الكافيهات في الزمالك، وموجود في شارع الشيخ المرصفي.

    أما لو كنت من عشاق المقاهي الشعبية، فبنرشح لك عمر الخيام في شارع الدكتور طه حسين داخل اليمامة سنتر.

    اشتري كتاب

    لو كنت من عشاق الكتب فعندك أجمل مكتبة في الزمالك، وهي مكتبة ديوان، موجودة في شارع 26 يوليو، واللي بتوفر أجمل وأهم الكتب، تقدر هناك تشتري الكتاب اللي يعجبك، وممكن تقراه في كافيه المكتبة أو تاخده وتروح كافيه جميل تستمتع فيه بمشروبك المفضل مع الكتاب!

    سينما.. سينما!

    أما الناس اللي بتحب السينما، فيقدروا في المساء يتفرجوا على أجمل الأفلام في سينما الزمالك، والموجودة في شارع شجرة الدر، ودي سعر تذكرتها 75 جنيه، وبيتعرض فيها حاليًا فيلم واحد تاني وفيلم العنكبوت.

    أهم معالم الزمالك

    ماتنساش توثق رحلتك بصور بتليفونك، ومهم تركز في تفاصيل المباني، وتتفرج على محلات الزمالك القديمة اللي بتبيع هدايا وملابس وأسماك وغيره، المحلات دي شاهدة على عظمة المكان ده. ولو بتحب المجلات فرصة تبص على باعة الصحف في الشارع، الزمالك فيها أكتر من بائع صحف عندهم إصدارات مختلفة من مجلات عربية وإنجليزية.

    ودي قائمة بأهم معالم الزمالك:

    النادي الأهلي
    برج القاهرة
    دار الأوبرا المصرية
    مجمع اللغة العربية
    القصر اللي بناه الخديوي إسماعيل لاستقبال ضيوف حفل افتتاح قناة السويس واللي أصبح فندق ماريوت القاهرة.
    نادي الجزيرة
    ساقية الصاوي

    مقترح