The Definitive Guide to Living in the Capital , Cairo , Egypt

الحياة في كايرو

ممرات لأصحاب الهمم وطرق عرض جديدة وأكتر.. أعمال تطوير المتحف المصري بالتحرير مستمرة

المتحف المصري المتحف المصري بالتحرير ذوي الاحتياجات الخاصة ممرات لذوي الهمم
ممرات لأصحاب الهمم وطرق عرض جديدة وأكتر.. أعمال تطوير المتحف المصري بالتحرير مستمرة
    بواسطة
    Mohamed Talaat

    في الوقت اللي بتستعد فيه الحكومة المصرية لافتتاح المتحف المصري الكبير بمنطقة الأهرامات، بتحصل حاجة عظيمة تانية، وهي تطوير المتحف المصري بالتحرير علشان يليق بالآثار المصرية اللي بيعرضها، وبحسب تصريحات إعلامية لـ صباح عبد الرازق، مدير عام المتحف، أعمال التطوير داخل المتحف شغالة حاليًا بشكل منتظم.

    “عبد الرازق” أضافت إن الهدف هو انتهاء كل أعمال التطوير خلال العام الحالي، واللي هتشمل تنفيذ سيناريو عرض متحفي متقدم، وتزويد المتحف باللوحات الإرشادية، ووضع عدد كبير من المقاعد للزائرين علشان يرتاحوا عليها، كمان تم تخصيص ممرات ممهدة لأصحاب الهمم، لسهولة حركتهم داخل المتحف.

    وأشارت مديرة عام المتحف المصري بالتحرير، إلى أنه بيتم عمل بطاقات شرح جديدة، للتسهيل على الزوار معرفة تاريخ القطع الأثرية المعروضة داخل المتحف، إلى جانب الاستمرار في تطوير أرضيات المتحف.

    وبيضم المتحف المصري بالتحرير، بقلب القاهرة، أكبر مجموعة من آثار مصر القديمة، وبيحتوي على أكثر من 136 ألف أثر من مصر القديمة، بالإضافة إلى مئات الآلاف من الآثار الموجودة في مخازنه.

    ويتكون المتحف المصري من دورين، الأرضي موجود فيه الآثار الثقيلة زي التوابيت الحجرية والتماثيل واللوحات والنقوش الجدارية، أما العلوي ففيه الآثار الخفيفة زي المخطوطات وتماثيل الأرباب والمومياوات الملكية وآثار الحياة اليومية وصور المومياوات والمنحوتات غير المكتملة وتماثيل وأواني العصر اليوناني الروماني وآثار تانية أكتر.

    مقترح