The Definitive Guide to Living in the Capital , Cairo , Egypt

كل عيد حب وأنتم طيبين، عرفتوا هـ تروحوا فين وهـ تشتروا هدايا إيه للناس
اللي بـ تحبوهم؟ كل سنة بـ نقابل نفس المشكلة في المناسبات اللي زي دي واللي
دائمًا بـ تيجي فجأة ونفتكر النهاردة أن العيد بكرة! بالذات عيد الحب وعيد الأم،
والحمد لله أننا ما بقيناش نحتفل بعيد الطفولة.

هـ نحاول نسهل مهمتكم شوية، هـ نقول لكم في المقال ده كام محل ممكن تشتروا
منه هدايا مبتكرة أو إزاي تنظم احتفال صغير وطبعًا أماكن رومانسية للعشاء على ضوء
الشموع.

الهدايا:

لو ميزانيتك تسمح بمجوهرات وإكسسوارات، فروع محلات «عزة فهمي» عاملة تشكيلة
خاصة للـﭭالنتين السنة دي، التشكيلة فيها أحجار كريمة وإكسسوارات، خامات
وتصميمات جديدة وألوان مبهجة لائقة على المناسبة، والأجمل هو الحلي بنقوش الكتابة
العربية أو الـ Calligraphy خاصة الحلقان
والأساور، ممكن تأخذ فكرة عن المعروضات من خلال موقعهم على الإنترنت.

من محل هدايا «صوي – Soi» الموجود في مدينة نصر ممكن تجيب دباديب وشموع وبالونات
وشوكولاتات وحلويات وصناديق هدايا خاصة بهم، وهناك ممكن تعمل لفات بطريقة محترفة
للهدايا، ده غير هدايا خاصة بيوم الـﭭالنتين برسومات وشعارات معينة.

إكسسوارات وحلي مصنوعة يدويًا ممكن تطلبها من على الإنترنت أو بالتليفون من
«هاندي ميد – Handy made». أساور مطلية مرصعة بكريستالات سواروفسكي، وبأسعار بـ تتراوح بين 100
و200 جنيه ممكن تجيب هدية قيمة. ادخل على موقعهم وتفرج على المعروضات، أو اتصل
بهم على .01009644424   

لو عاوز تعمل (أو تعملي) مفاجأة في البيت أو حتى في مكان خارج البيت ممكن
تشتري زينة وبالونات وديكورات جامدة وصناديق هدايا ولفات مبتكرة للهدايا من
عند «فلاي جيفت – Fly Gift» الموجود في التجمع الخامس. الأسعار معقولة وممكن تعمل
خلفية جمالية لليوم بتاعك بـ 200 جنيه تقريبًا.

لو بـ تحب الأكلات المفرحة يبقى أكيد بـ تحب الكب كيك، «كب كيك لاﭭرز – CupCake Lovers» بـ
تطلبه بالتليفون بعد ما تستعرض صفحته على فيسبوك  وبـ يوصل لك لحد البيت في أي حتة في كايرو،
عامل عروض وأشكال كيك خاصة بعيد الحب، اتصل واستفسر على 01067747088

 

الخروجات:

فندق «سويس إن – Swiss Inn» في دريم لاند في مدينة 6 أكتوبر عامل عرض خاص يوم 14-2
عبارة عن غرفة دوبل بالأفطار والعشاء على ضوء الشموع مع سلة فواكة وشمبانيا غير
كحولية وتارت وإمكانية استخدام حمام السباحة، إقامة يومين وليلة وكل ده بـ 650
جنيه، ممكن تحجز من خلال أرقام التليفون دي 38553308 أو 38553309.

وممكن عشاء راقي بفندق «بيراميزا – Pyramisa» على أنغام الموسيقى الحية. بوفيه مفتوح
للمقرمشات والحجز مطلوب طبعًا على الرقم ده 01008973257
والأسعار ممكن تعرفها من المكان بعد ما تحدد طلباتك بالضبط.

لو عاوز تبقى قريب من مصر الجديدة ممكن تجرب مطعم «فيليني – Filini» الموجود في فندق
راديسون بلو هليوبوليس الموجود بشارع عبد الحميد بدوي، مطعم إيطالي شيك بـ يقدم
أكثر من منيو ثابت ممكن تختار منه واستمتع بتارت خاص على شكل قلب معمول مخصوص للـﭭالنتين،
وعزف جيتار لايف لمزيد من الرومانسية.

في المعادي أو في الزمالك ممكن تروح فروع «فويجو» وتأكل سوشي في أجواء رومانتيكية
وإضاءة خافتة وهناك هـ تشعر بالخصوصية الشديدة، بما يناسب خصوصية المناسبة، ومش هـ
تدفع أكثر من 300 جنيه لفردين، والمكان فعلًا جدير بالتجربة.

لو بـ تحب الأجواء التاريخية والأصالة يبقى هـ تختار مطعم «تاج السلطان»
الموجود في قلب الحسين، ديكور أثري ومطبخ مصري بيتي وفيه بعض الأكلات الهندية،
ولما تقعد في التراس في الدور العلوي هـ تشوف منظر جميل للقاهرة الإسلامية. وجبة
لفردين هـ تكلفك 250 جنيه تقريبًا.

وعيد حب سعيد علينا وعليكم..