The Definitive Guide to Living in the Capital , Cairo , Egypt

الحياة في كايرو -
مقترح

وسط البلد.. دليلك السريع لقضاء سهرة جميلة في أجمل منطقة في القاهرة

أجمل الأماكن في وسط القاهرة أماكن وسط البلد حاجات تعملها في وسط البلد خروجات وسط البلد وسط البلد
وسط البلد.. دليلك السريع لقضاء سهرة جميلة في أجمل منطقة في القاهرة
    بواسطة
    Mohamed Talaat

    وسط البلد واحدة من أجمل مناطق العاصمة المصرية، فيها مكتبات وسينمات ومطاعم وكافيهات ومولات.. ده غير مبانيها التاريخية العظيمة اللي عايشة من عشرات السنين، وبتبدأ منطقة وسط البلد من طلعت حرب وبتمر بهدى شعراوي وباب اللوق ومحمد محمود وميدان التحرير وبتوصل لحد شارع القصر العيني وجاردن سيتي، ده غير طبعًا الشوارع الجانبية.

    في الموضوع ده هنتعرف على أفضل الأنشطة اللي ممكن تعملها لو قررت تروح وسط البلد علشان تقضي سهرة حلوة.

    أكلة حلوة ومشروب أحلى

    وسط البلد فيها مجموعة من أجمل المطاعم والكافيهات، اللي بتتميز بأسعار مناسبة وجودة معقولة، زي مثلًا مطعم “أولديش” اللي بيتميز بالتراث والديكور الجميل اللي بيسمح لك بالتقاط أروع الصور، كمان بيوفر حفلات موسيقية جميلة في أوقات كتير، وهتلاقي هناك شبابيك ملونة مبهجة.

    عندك كمان مطعم “القزاز” اللي هتلاقي عنده أجمل شوربة عدس هتاكلها في حياتك وموجود في 38 شارع صبري أبو علم متفرع من ميدان طلعت حرب.

    ولو عاوز تعمل حاجة مختلفة ننصحك تجرب عربيات الكبدة والسجق اللي في وسط البلد، كلها مميزة وبتقدم مستوى ساندوتشات هيعجبك.

    عندك كمان مطعم “فسحة سمية” المتخصص في الأكل البيتي، وكل يوم بيقدم أكلات جديدة، وبيتم تقديم الأكل في حدود الساعة 5 مساءً.

    أما الكافيهات فهي كتيرة في وسط البلد، وأجملها في شارع محمد محمود زي “سيلنترو”، “بينوس” وغيرهم.

    التسوق أحلى في وسط البلد

    ولو كنت بتحب التسوق هتنبسط جدًا في وسط البلد، هتلاقي ماركات عالمية كتير، ومحلات وكمان مول مميز وهو مول طلعت حرب اللي فيه محلات كتير.. ولو بتدور على أجهزة إلكترونية عندك مول البستان.

    أجمل السينمات والمسارح

    بتتميز وسط البلد بوجود مجموعة من أجمل وأقدم السينمات اللي سعرها مناسب في القاهرة، زي: مترو – ميامي – رينسانس – هيلتون رمسيس وكمان سينما زاوية اللي بتعرض أفلام أوربية وأفلام مهرجانات.

    كمان هتلاقوا هناك مسارح مميزة زي البيت الفني للمسرح ومسرح الفن جلال الشرقاوي.

    أحلى مكتبات في وسط البلد

    وسط البلد فيها مكتبات مهمة، زي الشروق، ومدبولي، وتنمية، وغيرهم. وكلهم قريبين من بعض في ميدان طلعت حرب.. يعني هتخرج من مكتبة هتلاقي التانية في وشك.

    برج القاهرة

    قبل ما تنهي سهرتك في وسط البلد اتمشى شوية على كوبري قصر النيل وشوف منظر نيل مصر العظيم، وبعدها اطلع واحد من الأماكن الجميلة اللي ممكن تنهي فيها سهرتك وهو برج القاهرة، اللي بيفتح أبوابه يوميًا من الساعة 10 صباحًا، وممكن تشرب حاجة هناك في المطعم الدوار وتستمتع بأحلى فيو للقاهرة.

    مقترح