The Definitive Guide to Living in the Capital , Cairo , Egypt

غالبًا المجهود اللي بنبذله في التفكير في هدية عيد الأم كل سنة بيبقى أكبر بكثير من مجهود شراء ولف الهدية نفسها، ما ننساش كمان أن فيه عوامل كثير داخلة في اختيار الهدية؛ طبعًا مهم جدًا عامل ماما بتحب أو محتاجة إيه، بس لما الميزانية بتحكم، الموضوع ممكن ينتهى على مج ظريف يرفع من روحها المعنوية… أو بوسة و"كل سنة وأنتي طيبة يا ماما". 

حاولنا في الموضوع ده أننا ننوع الهدايا والأفكار اللي ممكن تناسب أي ميزانية، ولو كل الاقتراحات دي مش مناسبة لأي سبب من الأسباب، وقررت أنك ما تجيبش حاجة… يكفي أنك أجمل هدية جاءت لماما.

 

1 – مفروشات:

مالها المفروشات؟ بشاكير وملايات ومفارش، كل الحاجات دي ممكن تعبر بها عن حبك لماما في عيد الأم، من الأماكن اللي رحناها بنفسنا كانت نيللينز – Nillen’s في الزمالك، واللي عنده مجموعة كبيرة من المفروشات اللي بتتميز بجودتها واختلاف تصميمها. الجميل أن كل منتجات نيللينز مصرية الصنع 100%، ده غير أن أي حاجة بتشتريها من هناك بتساهم في المشروعات التنموية اللي بتساعد ستات كثيرة أنهم يتعلموا حرفة الخياطة والتفصيل –يعني أنت كده بتنفع ناس كثير بالهدية دي مش بس والدتك.

أسعار نيللينز متفاوتة، وبالتالي هتلاقي حاجة مناسبة لميزانيتك؛ يعني ممكن تلاقي طقم فوط (فوطة وبشكير) من القطن المصري الخالص بأسعار من 215: 300 جنيه. أما لو ميزانيتك تسمح أنك تعلى عن الأسعار دي فعندك مجموعة الملايات (2 كيس مخدة وملاية) واللي أسعارها بـتبدأ من 390: 610 جنيه.

لو تحب تأخذ فكرة عن المعروضات شوف هنا.

 

2 – أكلة لطيفة في مكان جميل:

صحيح أكل الأمهات البيتي لا يعلى عليه، ولكن ممكن نريحها في يوم عيد الأم بأننا نعزمها بره البيت في أي مكان، عارفين أن الاقتراح ده ممكن يبقى كليشيه بالنسبة لناس كثير، ولكن تجربة زي كافيلوكة – Cafelluca ممكن تكون جديدة وممتعة في الوقت نفسه. كافيلوكة عبارة عن مركب بـتلف في النيل ولها منيو بـتختار منه الأكل على حسب ميعاد رحلتكم.

سعر الفرد بـيختلف من موعد للثاني؛ يعني عندك 175 جنيه للفرد في الإفطار، والغداء 250 جنيه للفرد. وممكن تزود 125 جنيه وتضمن عرض All You Can Drink اللي بـيشمل مشروبات ساخنة وباردة و2 شيشة. أقل عدد لحجز المركب 4 أفراد، فممكن تخليه احتفال عائلي بالأم.

لمعلومات أكثر شوف صفحتهم على الفيسبوك.

 

3 – حفلة أوبرا:

إحساس حلو جدًا لما تعزم حد على حفلة في الأوبرا –بس لازم تتأكد أنها مناسبة لذوقها- تتشيك وتلبس وتقضي سهرة سعيدة ومختلفة. دار الأوبرا عاملة سلسلة من الحفلات مخصوص بمناسبة عيد الأم، من ضمنها حفلة "سداسي شرارة"، واللي هيقدموا مجموعة من المقطوعات الشهيرة الخاصة بالمناسبة دي، وسعر التذكرة مش غالي – 25 جنيه للفرد.

لو عارف أنها بتحب الفن بشكل عام تقدر تبص على أجندتنا اللي أكيد ممكن تلاقي حفلة تناسب ذوق ماما.

 

4 – أثاث وقطع ديكور:

بالرغم من أن قطع الأثاث والديكور مش من الهدايا المنطقية في أي مناسبة –وأحيانًا حتى لو رايح تزور حد في بيته الجديد- إلا أن في عيد الأم الموضوع بيختلف؛ لأنك كفرد من البيت، أو من المتواجدين فيه في أوقات كثير هتقدر تعرف إيه اللي ممكن بيت والدتك يحتاجه وإيه الذوق والحجم المناسب. الهدايا دي بقى مفتوحة حسب الميزانية… ممكن حد يحب يغير لوالدته السفرة بالكامل، وحد يحب أنه يشتري حاجة ناقصة أو حاجة على قد الإيد.

من الأماكن اللي أبهرت الشعب المصري من أول ما فتحت هي ايكيا – Ikea ، حتى لو ما عندكش فكرة معينة في دماغك هـتطلع هناك بحاجة مفيدة. إحنا شخصيًا ممكن نجيب مجموعة من أطباق السيرفيس اللي ممكن كمان تدخل الفرن وأسعارهم بتتراوح بين 129 جنيه و29 جنيه (الحجم الأكبر حجمه 41×26 سم، والأصغر دائري 14 سم). أو نختار من مجموعة الأباجورات الكثيرة اللي عندهم واللي أسعارها بـتبدأ من 150 لحد 650 جنيه.

ممكن تأخذوا فكرة من هنا عن منتجات ايكيا المختلفة.

 

5 – تأخذها بازار من بازارات عيد الأم:

بنحس أن الاهتمام بقضاء وقت مع حد أهم من شراء أي هدية؛ فما بالك بقى لو قضيت مع ماما يوم بحاله وأكلتوا واشتريت لها هدية من البازار. ما تقلقش من حيث البازارات فهي موجودة في كل حتة الأيام دي، ومعمولة في يوم أجازة مخصوص علشان تقضيه براحتك. الميزة كمان في البازار أنها هـتقدر تختار اللي هي تحبه من غير ما تتعب أنت في التفكير.

يعني عندك مثلًا يوم الجمعة فيه اثنين؛ واحد في داون تاون قطامية والثاني في أمريكانا بلازا.

 

6 – حاجة معمولة علشانها مخصوص:

فيه بقى هدايا كثير ممكن تبقى  Personalized؛ خلينا نحاول ننقي أسهل وأرخص حاجة ممكن تتعمل على ذوقها وباسمها مخصوص، وهي مجموعة من الهدايا اللي ممكن تختارها من محلات الهدايا زي دكان دابيكتشر – Dokan Dapicture مثلًا. المحل بيقدم مجموعة كبيرة من الاختيارات اللي ممكن تجمعها في هدية واحدة؛ يعني عندهم مثلًا مج فيه زهور وشوكولاتة وزينة محطوطين بشكل لطيف سعره 150 جنيه (أحسن ما تجيب المج فاضي). وطبعًا كل ما زاد عدد الهدايا الموجودة في اللفة الواحدة وتغير شكل التصميم كل ما زاد السعر؛ يعني فيه مجموعة مكونة من كريم وغسول وجه من باث أند بدي ووركس – حامل إكسسوارات – قطعتين إكسسوار مع 6 قطع شوكولاتة سعرهم 700 جنيه.

الجميل أنك ممكن تطلب الهدايا دي أونلاين من خلال صفحة الفيسبوك الخاصة بهم.

 

7 – مشغولات يدوية تراثية:

عارفين أن مش أي حد ممكن يلبس مشغولات يدوية لأنها محتاجة ذوق معين، ولكن ما نقدرش ننكر أنها مختلفة عن أي حاجة بنجيبها من المحلات الثانية. فيه أماكن زي سامي أمين، واللي عنده مجموعة خرافية من المشغولات اليدوية زي الإكسسوارات النحاسية اللي عليها موتيفات تراثية زي الحلقان 70 لـ 90 جنيه، الأعقاد 80 لـ 390  جنيه (حسب الخامة اللي مصنوعة منه)، وممكن تشتري من مجموعة الشنط المصنوعة من جلد طبيعي وأسعارها من 420 لـ 1200 جنيه حسب الحجم والتصميم.

لو تحب تأخذ فكرة عن المكان بص هنا.

 

8 – خير جليس الكتاب:

هو فيه أجمل من الكتب كهدية؟ ودي بقى مش هتزيد بأي حال من الأحوال عن 250 جنيه – طبعًا مش بنتكلم عن الكتب النادرة والطبعات الخاصة- يعني مثلُا عندك الروايات مش هتخرج عن 30 جنيه وآخرها لو لعظماء الأدب ممكن توصل لـ 90 جنيه، وحتى لو عاوز تشتري كتب أجنبية ممكن تتحرك في حدود 25 جنيه (كلاسيكيات بالإنجليزية) ولو كتب معاصرة ممكن تبدأ 90 جنيه لحد 250 حسب شهرة الكاتب ونجاح الكتاب.

ديوان – Diwan و أ –   Alefمن الأماكن اللي هتساعدك في الموضوع ده، ولو عارف أن ماما بـتحب الكتب القديمة ممكن تروح مكتوب – Maktoob في الزمالك، واللي أسعارها سواء العربي أو اللغات الثانية هـتبهرك.

 

9 – طب ورد؟

عارفين أننا ما جبناش التايهة، ولكن الجميل بقى أنك مش بس هتشتري ورد يموت بعد أسبوع بالكثير، ده أنت ممكن تجيب ورد ونباتات بالأصاري الخاصة بها من معرض زهور الربيع الموجود في حديقة الأورمان لمدة شهر. الفكرة أنك مش بس هـتشتري هدية… أنت ممكن تقضي يوم جميل وممتع مع والدتك وسط الخضرة والورود، وأجمل حاجة أن المعرض مستمر لمدة شهر، فقدامك لحد أبريل علشان تحتفل بعيد الأم.

شوف التفاصيل في الأجندة الخاصة بنا هنا.

 

10 – تقمص دورها لمدة يوم:

لو الدنيا زنقت معاك ومش قادر تجيب لها هدية، تقدر أنك تعمل لها شغل البيت لمدة يوم كامل أو على قد ما تقدر. شوف إيه أكثر حاجة بتتعبها في شغل البيت وأعمله (غسيل، نشر غسيل، طبخ، إلخ…). إحنا عارفين قد إيه الفكرة دي متعبة ومرعبة لناس كثير، بس فكر فيها… يوم واحد تعب عمره ما هيعادل كل يوم هي تعبت فيه.