The Definitive Guide to Living in the Capital , Cairo , Egypt

الحياة في كايرو

13 “مافيش” عن فيروس كورونا المستجد

احمي نفسك خليك في البيت فيروس كورونا المستجد محمد عبد الرحمن معلومات عن كورونا
13 “مافيش” عن فيروس كورونا المستجد
    بواسطة
    Cairo 360

    بقلم: محمد عبد الرحمن

    – “مافيش” حاجة اسمها أنا بعيد عن الإصابة، كل الناس معرضة تتصاب بكورونا أيًا كان طبيعة الشغل والحركة والمرحلة العمرية.

    – “مافيش” وسيلة معينة تمنع عننا الفيروس” الرخم”، الكمامة والكحول وسائل وقاية مش مكافحة، والتباعد الإجتماعي أفضل لو كان بايدك تخلي مسافات مع الناس.

    – “مافيش” داعي تتنمر على مصابي كورونا وتهرب منهم، لأن وارد جدًا تبقى مكانهم.

    – “مافيش” علاج أو تطعيم حتى الآن لكورونا ومش متوقع يظهر بسرعة فبلاش تسترخي في إجراءات الوقاية بسبب أخبار بتتنفي بعدها بكام يوم.

    – “مافيش” حد هيقبل يقعد في البيت يموت من الجوع مقابل أنه مايموتش من الفيروس، اللي مضطر هينزل مع الأخذ بالأسباب .

    – “مافيش” حاجة اسمها الدكاترة إزاي بيتصابوا وهم دكاترة، كل الفئات معرضة، ولو الدكتور مناعته ضعيفة أو المرض اكتشفوه متأخر ممكن يتوفى زي أي إنسان.

    – “مافيش” فايدة من الهجوم على الدكاترة لأن مطالبهم معظمها مشروعة، ولأنهم خط الدفاع الأول، ماتكرروش اللي عملتوه مع الصحفيين في 2016 ودلوقتي أنتم بتعرفوا أخبار الجائحة منين، ما هو من نفس الصحفيين اللي قلتوا عليهم مالهمش لازمة.

    “مافيش” مجتمع بيقطع في بعضه زينا كما هو مشار في النقطة السابقة.

    – “مافيش” حاجة اسمها أنا كدكتور متضايق من ظروف العمل فقررت أستقيل، خلينا نقول إن الاستقالات جاءت تحت ضغط عصبي أو وسيلة من وسائل الاحتجاج، لكن دكاترة مصر رجالة وقد المسئولية.

    – “مافيش” دولة في العالم قدرت تواجه الجائحة بمثالية مع زيادة الإصابات، خلونا ننتقد وزارة الصحة والإجراءات لكن مع الاعتراف أن الحمل تقيل على الجميع وإن دي جائحة جائحة جائحة، مش تنظيم دورة الألعاب الإفريقية.

    – “مافيش” منطق حاليًا للاستغراق في مين ورا المؤامرة، أمريكا ولا الصين ولا شركات الأدوية، إحنا في وسط العاصفة، احمي نفسك أولًا من الغرق.

    – “مافيش” معاد محدد لانتهاء الجائحة، ومافيش ضمان لو انحسرت أنها مترجعش تاني وتبقى موسمية، فنتعلم من اللي حصل ونستعد لكل السيناريوهات.

    – وقبل كل شيء، ربنا أحن منه “مافيش”.

     

    تقدروا تتابعوا محمد عبد الرحمن من خلال حسابه الرسمي هنا، أو صفحته الرسمية هنا.

    مقترح