The Definitive Guide to Living in the Capital , Cairo , Egypt

رنا شرف

الصورة الرئيسية: Kaŕeem Saleh

الصورة الداخلية: Faqih Abdul

الصيف بيحب البحر، والقاهرة مش بعيدة عن البحر، في أقل من 90 دقيقة ممكن توصل العين السخنة، وهناك هتقدر تقضي يوم مميز على البحر وسط الطبيعة الصحراوية الجميلة، وعلشان يومك في العين السخنة يكون مبهج بجد، هنعرفك على بعض التفاصيل اللي هتساعدك على تخطيط يوم مختلف.

 

“السخنة” يعنى بحر وشمس وهواء وأحلى جو، بالإضافة للمناظر الطبيعية اللي هتخلي عشاق التصوير ينبسطوا خصوصًا في حضن مركب أو يخت في بورتو السخنة مثلًا، المكان هناك حلو واليخت سعره معقول، ولو كنتم مجموعة هتنبسطوا بجد وهتتصوروا كتير تحت الشمس وفي قلب البحر.

والشواطئ في “السخنة” كتير، يعنى غير بورتو، ممكن تروحوا شاطئ لولي أو روكيت أو أميجو أو السادات، كلها شواطئ مميزة وساحرة.

ومايفوتكش زيارة خليج الأديبة، اللي بيتميز بالجو الساحر الحلو، ولو بتحب الصيد والتزلج علي المياه، يبقى هتلاقي نفسك هناك.

تلفريك وملاهي

عشاق المغامرات تعالوا نروح نركب التلفريك، وهناك هنستمتع بمنظر الغروب ونتصور كمان، ودي تجربة مش هتتنسي.

ولو معانا أطفال يبقي لازم نبسطهم ونوديهم الملاهي، و”السخنة” فيها ملاهي “تيدا فن فالي” المليانة بألعاب مناسبة للصغار والكبار.

الأكل في السخنة

جعان؟ مطاعم “السخنة” كتير، وإحنا بنرشح لك مطعم جربناه وعجبنا علشان الفيو هناك مميز والجو العائلي ولا أروع، المطعم اسمه “ذا جريل” للمشاوي، الفيو هناك ساحر، والخدمة مميزة، وكمان الأسعار معقولة.

إحنا طلبنا هناك فتة فراخ وكان سعرها 220 جنيه، وكانت حلوة بس الخبز لو كان أطرى كان هيبقي أحلى. المطعم متخصص في المشاوي.

تقدروا تعرفوا عنهم أكثر من هنا.

ولو بتحب الأسماك، بنرشح لك مطعم “استاكوزا الدولي” اللي جربناه في العين السخنة من فترة، وتجربتنا عندهم كانت مميزة فعلًا، رغم أن الأسعار هناك كانت عالية شوية.

تقدروا تعرفوا تفاصيل التجربة من هنا. 

 

العين السخنة مكان حلو لفسحة مبهجة ماتتنسيش، فلو بتدوروا على رحلة سريعة وقريبة من القاهرة ومش مجهدة يبقى اطلعوا على هناك.. على “السخنة”!