The Definitive Guide to Living in the Capital , Cairo , Egypt

5 خروجات حلوة هتنسيكم زحمة نفق زهراء المعادي
    بواسطة
    Mohamed Talaat

    أزمة كبيرة موجودة حاليًا في منطقة زهراء المعادي، وده بسبب غلق كتير من الطرق اللي بيتم تطويرها وتوسعتها لخدمة أحسن في المستقبل، وعلشان نساعد بعض في أننا منتضايقش من القفلات وقلة الخروجات، هنقول لكم في الموضوع على 5 أماكن تقدروا تخرجوا فيها في المعادي، بعيدة عن أزمة النفق، وفي نفس الوقت فيها كيدز إيريا وكمان سعرها في المتناول.

     

    جراند مول

    لو أنتم من عشاق الشوبينج، فجراند مول من أفضل الأماكن وأقدمها اللي ممكن تتسوقوا فيها أو تقعدوا في الكافيهات والمطاعم جواه أو حواليه، وكمان فيه منطقة أطفال للعب.

    العنوان: شارع نجيب المستكاوي – دجلة المعادي.

    بلاتفورم

    هتلاقوا داخل بلاتفورم المعادي مطاعم وكافيهات مميزة، وكلها على النيل، وكمان فيه مركب “كافيلوكة”، ومنطقة لعب أطفال “بوميرز”، وأسعاره في المتناول.

    العنوان: كورنيش المعادي – أمام مستشفى السلام الدولي – بجوار نادي مستشاري المحكمة الدستورية العليا.

    جزيرة المعادي

    من أشهر أماكن الخروج في المعادي، وفيها بحيرات صناعية وجزر صغيرة مربوطة ببعض عن طريق كباري، وتقدروا تتمشوا فيها أو تاخدوا لفة بالمركب في النيل، وهتلاقوا جواها مطاعم وكافيهات ومنطقة ألعاب أطفال، ورسم الدخول 30 جنيه للأيام العادية، 40 جنيه في الويك إند.

    العنوان: جزيرة المعادي – أمام مستشفى القوات المسلحة.

    مزاج كافيه

    هو مكان مناسب جدًا لخروجة هادية ورايقة ومميزة، وكمان كل خميس عندهم بارتي مختلف، ولكن للأسف غير مناسب للأطفال علشان معندهمش كيدز إيريا.

    العنوان: كورنيش المعادي – بين مدخل المعادي رقم 1 و2 – بجوار Blue Nile.

    فاميلي لاند

    من أكتر الأماكن اللي فيها ألعاب تناسب الكبار والصغار، زي البلياردو والبولينج والتزحلق، ده غير السينما وغيرها من الأنشطة، والأسعار عندهم بتبدأ من 15 حتى 60 جنيه، وشغالين يوميًا من الساعة 12 ظهرًا حتى 11 مساءً.

    العنوان: شارع مصر حلوان – خلف أبراج عثمان.

     

    مقترح