The Definitive Guide to Living in the Capital , Cairo , Egypt

التاكسى واحد من أهم وسائل الانتقال فى القاهرة، مئات الآلاف من المشاوير بـ يتم إنجازها فى العاصمة من خلال سيارات الأجرة اللى بـ تجوب القاهرة من أقصاها إلى أدناها يوميًا بحثًا عن الزبائن.

من هنا كانت الفكرة الأساسية لتطبيق Easy Taxi، التطبيق التابع لمؤسسة “إيزى تاكسى” العالمية واللى بـ تشتغل فى عدد كبير من بلدان العالم منها الولايات المتحدة، وتايوان، والبرازيل، والأرجنتين، والمكسيك وغيرها من الدول ومن بينها مصر طبعًا.

التطبيق قابل للتحميل على أبل ستور الخاص بتليفونات iPhone أو جوجل بلاي لكل الأجهزة المحمولة اللى بـ تشتغل بتطبيق أندرويد، أو حتى من خلال سامسونج أبليكيشن، وممكن حتى يتم استخدام التطبيق من الموقع مباشرة من خلال تطبيق الويب المباشر.

تجربتنا الشخصية فى التعامل مع التطبيق كانت من خلال تحميله على “آى فون” واستخدمناه فى 3 مشاوير رئيسية، تجربة واحدة منهم كانت غير موفقة، وتجربتين موفقتين.

بمجرد بدء استخدام التطبيق تم سؤالنا عن موقعنا الجغرافى الحالى، وعلى أساسه بـ يتم عمل Scan لأقرب التاكسيات الموجودة حولنا واللى بـ تستعمل نفس الخدمة، بضغطات بسيطة حددنا المكان اللى عاوزين نروحه، وحطينا بعض التفاصيل الخاصة بموقعنا الحالى، ثم انتظرنا.. والحقيقة انتظارنا ما طالش لأن أحد سائقى التاكسى المشتركين بالخدمة وافق على التوصيلة، بعدها تم إرسال لنا رسالة من التطبيق بموقع التاكسى وبعده عننا بالكيلو، واسم السائق ورقم العربية وموديلها ورقم تليفون السائق، ودى ميزة أمنية ممتازة جدًا فى البرنامج لأن لو –لا قدر الله– تعرض الراكب لمشكلة أو اختطاف أو سرقة –ودى مشاكل بـ نشوفها يوميًا فى صفحة الحوادث- بـ يكون عارف بيانات السائق كويس ويقدر يوصل له أو يبلغ عنه الشرطة.

التجربة الأولى لنا مع إيزى تاكسى ما كانتش بالجودة اللى كنا متخيلينها، لأن أكثر من سائق اتصل واعتذر عن القيام بعملية التوصيل، وبعد فترة انتظار زادت عن نصف ساعة اضطرينا لركوب تاكسى بالطريقة التقليدية من ميدان الأوبرا إلى مستشفى العجوزة الساعة 1 ظهرًا تقريبًا.

بعد حوالى ساعة من فشلنا فى ركوب التاكسى، اتصل بنا مندوب خدمة العملاء وسألنا ليه ما استعملناش تاكسى من خدماته، والحقيقة أنه كان متعاون معانا جدًا وقدرنا نعرف منه بعض التفاصيل الداخلية عن التطبيق.

التطبيق قائم على إنشاء اتصال بين السائق والراكب وبـ يعطى سائق التاكسى تليفون أندرويد بـ يدفع السائق نصف ثمنه كاش والباقى بالتقسيط بـ يقدر من خلاله يتابع حركة الأشخاص المستعملين لنفس التطبيق واللى طالبين تاكسى فى منطقة جغرافية واسعة محيطة به، ومن هنا بـ يبدأ التوصيل.

حتى الآن الخدمة مجانية بالكامل، إيزى تاكسى مش بـ تحصل أى مبالغ من العميل أو من سائق التاكسى، بالإضافة إلى أن سعر التوصيلة بـ يتم حسابه بالعداد من بداية ركوب العميل مع السائق، بالتالى مش بـ يتم تحمل أى تكاليف إضافية خاصة بالخدمة، لكن –وفقًا لكلام مندوب خدمة العملاء– الخدمة ممكن فى المستقبل تكون بمقابل مادي مع زيادة انتشارها فى القاهرة والإسكندرية وباقى المحافظات.

من الحاجات الكويسة فى التطبيق واللى لاحظناها فى باقى المشاوير اللى قومنا بها هى اتصال خدمة العملاء طوال الوقت للتأكد من صحة بيانات الراكب وصاحب التاكسى وأن الخدمة تم أدائها بالكامل، كمان لاحظنا درجة كبيرة من الوعى والفهم عند سائقي التاكسى اللى بـ يتم التعاقد معاهم وده بـ يعرفنا أن الشركة بـ تختار نوعية معينة من السائقين لضمان توفير أفضل خدمة ممكنة.

باقى المشاوير اللى قمنا بها كانت من سيتى ستارز إلى التحرير أو العكس، وكانت موفقة على عكس التجربة الأولى، ومعدل وصول التاكسى للعميل بـ تتراوح من 3 إلى 4 دقائق فى المتوسط، وزى ما قولنا مش بـ تدفع أى مبالغ إضافية لاستخدام الخدمة، على الرغم من مكالمات الدعم الفنى لنا طوال الوقت للتأكد أن كل شىء تمام.

تطبيق “إيزى تاكسى” حل ممتاز جدًا لأزمات التاكسى فى محافظات مصر المختلفة، وكمان حل مثالى للمشاكل الأمنية اللى ممكن تتعرض لها بعض البنات من تحرشات أو مضايقات ممكن تصدر من بعض سائقى التاكسى، نتمنى تجربوه وتقولوا لنا رأيكم.