حالة الطقس في الأسبوع الثالث من رمضان 2026.. أمطار خفيفة ورياح وشبورة (تفاصيل ونصائح)
أخبار الطقس أمطار الأرصاد الجوية الشبورة المائية الطقس في القاهرة الطقس في مصر حالة الطقس طقس رمضان كايرو360
Mohamed Talaat
الصورة الرئيسية: كايرو360
مع دخول الأسبوع الثالث من شهر رمضان، كتير من الناس بتبدأ تخطط لخروجات بعد الإفطار أو زيارات عائلية وسهرات رمضانية. وعلشان كده متابعة حالة الطقس بتبقى مهمة جدًا، خاصة مع التقلبات اللي ممكن تحصل في الفترة دي من السنة.
الهيئة العامة للأرصاد الجوية أعلنت توقعات حالة الطقس خلال الأيام الجاية، ولحد يوم الخميس 12 مارس 2026، على مستوى الجمهورية.
وبحسب بيان الهيئة، من المتوقع إن الطقس يكون شديد البرودة في الساعات الأولى من الصباح الباكر، بينما يميل للدفء إلى الدفء المعتدل خلال ساعات النهار على أغلب الأنحاء.
أما في الليل، فبترجع درجات الحرارة تنخفض تاني ويكون الطقس شديد البرودة، خاصة في الأماكن المفتوحة وعلى الطرق السريعة.
ومن الظواهر الجوية اللي متوقع تظهر خلال الفترة دي، الشبورة المائية في الصباح الباكر، تحديدًا من الساعة الرابعة وحتى التاسعة صباحًا. والشبورة هتكون موجودة على عدد من الطرق المؤدية من وإلى مناطق شمال البلاد، مرورًا بالقاهرة الكبرى ومدن القناة ووسط سيناء، وصولًا إلى شمال الصعيد، وفي بعض الأوقات ممكن تكون كثيفة نسبياً على بعض الطرق.
الأرصاد كمان أشارت إلى فرص لسقوط أمطار خفيفة، وقد تكون متوسطة أحيانًا، يومي السبت والأحد، على مناطق من السواحل الشمالية وشمال الوجه البحري.
ورغم إن الأمطار مش متوقع تكون قوية، لكنها ممكن تسبب بعض البرودة في الجو أو بطء نسبي في حركة المرور في بعض المناطق.
كمان متوقع نشاط للرياح على فترات متقطعة بداية من غدًا الجمعة وحتى يوم الإثنين، على أغلب أنحاء الجمهورية، وهو ما قد يزيد الإحساس ببرودة الطقس خاصة خلال ساعات الليل والسحور.
نصائح للتعامل مع طقس الأسبوع الثالث من رمضان
لو عندك خطط للخروج بعد الإفطار، حاول تاخد معاك جاكيت خفيف، لأن درجات الحرارة ممكن تنخفض بشكل ملحوظ في الليل. ولو هتتحرك بدري الصبح، خاصة على الطرق السريعة أو السفر بين المحافظات، حاول تمشي بحذر بسبب الشبورة المائية اللي ممكن تقلل الرؤية.
ويفضل متابعة تحديثات الأرصاد أول بأول قبل السفر.
ولو بتقضي وقت طويل في الشارع أو في خروجات رمضان، حاول تختار ملابس مناسبة لفرق درجات الحرارة بين النهار والليل.
متابعة حالة الطقس بشكل يومي بتساعدك تخطط يومك بشكل أفضل، سواء للخروج أو السفر أو حتى لقضاء يوم هادي في البيت وسط أجواء رمضان المميزة.
