The Definitive Guide to Living in the Capital , Cairo , Egypt

تسوق

احمي نفسك من النصب والسرقة.. 11 نصيحة لما تستخدم الفيزا على الإنترنت

احمي نفسك على الإنترنت استخدم الفيزا بطريقة آمنة الشراء أونلاين الشراء عبر الإنترنت النصب على الإنترنت حماية بياناتك
احمي نفسك من النصب والسرقة.. 11 نصيحة لما تستخدم الفيزا على الإنترنت
    بواسطة
    Cairo 360

    بقلم: أحمد أنور سلامةجروب يستاهل

    أكيد أغلبنا جرب الشراء عبر الإنترنت عن طريق الفيزا. متعة إنك تشتري منتجك المفضل بخطوات سهلة وبسيطة ومن غير ما تكون مضطر تدفع كاش لما يوصل لك المندوب بالمنتج.. لكن علشان تحمي نفسك من عمليات النصب والسرقة على الإنترنت فيه مجموعة نصائح مهمة لازم تلتزم بيها. تعالوا نعرفها:

    – بصفة عامة، لو أي حد، في أي وقت، من أي مكان، طلب منك بيانات الفيزا أو الرقم السري أو أي شيء يخصك بلاش تقولها له.

    – فيه مكالمات ورسايل ممكن تجيلك من شركات رسمية لكنها في الحقيقة مفبركة والهدف منها السرقة، وأعرف واحد كان بيبعتلي رسايل على الموبايل باسم شركة Apple وأنا قاعد جنبه؛ ما يعني إنك تتجنب الثقة حتى في رسايل التفعيل اللي ممكن توصلك من الشركات.

    – بلاش تسجل بيانات الفيزا الخاصة بيك في أي موقع شراء أونلاين غير لو ضامنه، وبصفة عامة يفضل تخلي التعامل الأونلاين مع مواقع سوق ونون وجوميا بس، غير كده بلاش، والاختراق الأخير اللي حصل لواحدة من الشركات الشهيرة أفضل دليل على إن أي سيستم قابل للاختراق.

    – لو بتتعامل مع أي موقع، واللينك بتاعه مكانش فيه في أوله كلمة Https متثقش فيه أبدًا، لا في تعامل بفلوس ولا حتى في كلمة سر Password هتكتبها فيه.

    – أول ما بتسجل الفيزا على أي موقع أونلاين، بتجيلك نافذة pop-up بتسألك عايز تحتفظ ببيانات الفيزا على طول؟ بلاش تحتفظ بيها، ودخلها بنفسك كل مرة.

    – ماتحفظش بيانات الفيزا بتاعتك على كمبيوتر الشغل، أو على أي جهاز بره بيتك.

    – ماتصدقش أي لينك يجيلك على الإيميل باسم البنك بتاعك يقول لك دوس هنا عشان تأكد بياناتك الشخصية. 

    فيه حوادث نصب كتير بتحصل بالإيميلات المزورة دي + البنوك مش بتلجأ لتحديث بيانات العملاء عن طريق الإيميل، ولا في مكالمة تليفون مثلًا.

    – حتى في الموبايل، ممكن النصاب مايطلبش منك بيانات الفيزا بشكل مباشر، ولكن يسأل عن بيانات متعلقة بموبايلك = بلاش تقول له برضه.

    – لو البنك بتاعك بيقدم خدمات زي إنه يبعت لك رسايل على الموبايل كل ما تحصل معاملة مالية بالفيزا، يفضل تشترك فيها.

    – تجنب إنك تصور الفيزا بتاعتك وتحتفظ بيها على الموبايل لأن الصور دي معرضة إنها تروح هنا ولا هناك وساعتها برضه هتزعل.

    – لو عايز تسأل عن حاجة بخصوص الفيزا بتاعتك في أي جروب أو مكان أونلاين مش لازم تصورها، ممكن تبحث في جوجل عن فيزا نوع (كذا) بنك (كذا) وترفقها مع البوست وتكتب سؤالك. وخد بالك فيه ناس بتصور الفيزا بتاعتها من غير ما تخفي الأرقام اللي عليها وترفعها على النت، أوعى تعمل كدة.

    مقترح