The Definitive Guide to Living in the Capital , Cairo , Egypt

تسوق

بالتفاصيل.. أفضل 10 تليفونات ذكية في 2019

3310 galaxy iphone آبل أيفون تلفونات جلاكسي سامسونج سمارت فون نوكيا
بالتفاصيل.. أفضل 10 تليفونات ذكية في 2019
بواسطة
Omar Abd-elmaqsoud

تقريبًا مافيش حد في الفترة الأخيرة سواء مهتم أو مش مهتم بالتكنولوجيا مش ملاحظ تطور المنافسة ما بين شركات تصنيع وتطوير التكنولوجيا واللي بتزيد كل يوم عن التاني، ومع تطور المنافسة بيتطور الأداء والمنتج اللي بيتقدم، وبالأخص في عالم الموبايلات أو السمارت فون.

رحلة كل واحد فينا من تليفون نوكيا الشهير 3310 واللي كان أيقونة التطور والتكنولوجيا، لحد ما دخلنا في عالم الموبايلات اللي بتقوم بأكتر من دور غير الكلام، زي التصوير أو تسجيل المكالمات، أو وجود راديو، أو نغمات MP3 بدل النغمات البوليفونك أو العادية، لحد ما حصل لنا نقلة حضارية بوجود شاشات التاتش وكروت ميموري بتسمح لنا نحط كميات ساعتها كانت “مهولة” من الصور والأغاني.

وحدة وحدة لقينا نفسنا دخلنا في دوامة تطور تكنولوجي في زمن قصير، وهي ظهور التليفونات اللي بتعتمد في شغلها على أنظمة تشغيل مفتوحة المصدر، أو بمعنى أبسط ممكن تنزل برامج أو تطبيقات أو ألعاب إنت اللي هتختارها بنفسك على تلفونك اللي بيشتغل باللمس، وده كان تطور مش سهل على عقول كتير إنها تفهمه في وقتها، لإنه كان أحد أشكال الخيال العلمي.

المقدمة الطويلة دي علشان نفكركم بالنقطة اللي وصلنا لها النهارده، بعد المنافسات والاحتكارات والتطورات اللي شاهدها عالم التليفونات المحمولة أو “السمارت فون” واللي وصلت بينا لإننا نحتار فعليًا في اختيارنا لتليفون نشتريه من كتر الإمكانيات المتاحة، والأسعار المتقاربة.

النهارده فريق “كايرو 360” حاولنا نقرب لكم ونسهل عليكم على قد ما نقدر عملية الاختيار لأفضل تليفون في 2019، وبنقدملكم أكتر  10 تلفونات تصدرت القائمة:

1- سامسونج جلاكسي S10 بلس – samsung galaxy s10 plus :

ده واحد من  أحدث إصدارات الشركة، وكان أول ظهور ليه في مارس 2019، وأهم مميزاته 3 كاميرات3D  بدقة 12، +12، +16 ميجا بكسل.

البروسيسور أو المعالج الموجود فيS10  بلس هو 9820 Exynos بتكنولوجيا 8 نانو، والبطارية قوية بسعة 4100 مللي أمبير.

2- آيفون 11 – iPhone 11 :

آخر إصدارات شركة apple، وقلب الدنيا من قبل نزوله حتى للأسواق في سبتمبر اللي فات، برغم ارتفاع سعره نسبيًا بالمقارنة بجيله من التليفونات، إلى إنه كفاية إنه شايل علامة التفاحة.

الشاشة 6.1 بوصة من نوع LCD، والبروسيسور أو المعالج من نوع Apple A13  بتكنولوجيا 7 نانو متر، وده مخلي التليفون بيشتغل وبيستقبل الأوامر بسرعة عالية جدًا، ودي ميزة ماحدش من الشركات المنافسة لـ apple قدر يوصلها لحد النهارده.

زاوية عدسات الكاميرات اللي موجودة في التليفون واسعة وبدقة 12 و+12 ميجا بكسل، والكاميرا الأمامية مزدوجة كمان بدقة +12.

3- سامسونج جلاكسي Note 10 بلس – samsung note 10 plus :

في أغسطس اللي فات نزلت سامسونج الإصدار الجديد ده من سلسلة Note  الشهيرة، بميزة متفوقة على الإصدارات اللي فاتت كلها وهي تاتش سكرين وقلم  S Pen بيشتغل على مسافة 10 متر عن بعد، وده هيخليك تشغل أي حاجة في التليفون من غير ما تلمس الشاشة، زي الريموت كنترول كده.

ولإن السلسلة دي من سامسونج حمالة قسية زي ما بنقول، فكانت الشكوى دايمًا من بطاريات الأجهزة اللي بتخلص بسرعة، وده اللي طورته الشركة في Note 10 علشان ينزل للأسواق ببطارية قدرتها 4300 مللي أمبير، ومعالج ثماني النواة Exynos 9825 بتكنولوجيا 7 نانو.

4- آيفون 11 Pro Max:

للمرة التانية هنتكلم عن إصدار جديد لـ apple في قائمة أفضل 10 تليفونات في 2019، وده لإن من أول ما ظهرت سلسلة تليفونات Iphone 11 في الأسواق في سبتمبر 2019، وهي عاملة قلق في عالم للمنافسين بسبب إمكانياتها غير التقليدية، فمثلًا نظام الرؤية الليلية للتليفون يعتبر من أفضل مميزاته، ده غير شاشته الـ 6.5 بوصة بدقة 2688x 1242.

وبما إن البطارية هي أزمة حياة كل عشاق apple، ففي الإصدارات الجديدة وصلت سعة البطارية لـ 4000 مللي أمبير.

 

5-  سامسونج جلاكسي S10 e:

سعر التليفون ده بالنسبة لإمكانياته هو المنافسة الحقيقية، زاوية الكاميرا واسعة بخلفية ثلاثية 12، +12، 16 ميجا بايت، والبطارية فيها خاصية الشحن السريع بقوة 15 واط، وتطوير الشحن اللاسلكي علشان يبقى بتقنية الـ Quick Charge 2.0  بقوة 15 واط برده، ده غير تزويد التليفون بخاصية الشحن العكسي (يعني التليفون يشحن تليفون تاني كإنه باور بانك) بقوة 9 واط .

6-    وان بلس 7 برو – Oneplus 7 pro:

آخر إصدارات شركة “1+” للتكنولوجيا واللي للأسف مش واخده حقها في السوق المصري، برغم سمعتها العالمية الممتازة.

الإصدار الجديد نزل في مايو 2019 بسعر 580 دولار، وللأسف بيتباع أونلاين بس، أو ليكم حد بره مصر ممكن يجيبه لكم، التليفون بيتمتع بـ 3 كاميرات خلفية دقتها 48، +16، 12 ميجا بايت مميزة ومحترفة جدًا، والكاميرا الأمامية بتوصل دقة صورها لـ 16 ميجا بايت ومزودة بستاند كاميرا فيديو.

سرعة التليفون عالية جدًا وأداؤه قوي، وده بفضل البروسيسور بتاعه اللي من نوع SDM855 Snapdragon 855  بتقنية الـ 7nm من شركة “كوالكم”، ده غير بروسيسور خاص للرسومات من نوع Adreno 640 .

7-  جوجل بيكسل 4XL:

نزل في الأسواق المصرية في أكتوبر اللي فات، وطبعًا لإنه من إصدار Google فتصميمه مختلف ومطرقع، مقاس شاشته 6.3 بوصة، ومساحة تخزين داخلية بتبدأ من 128 و 256 جيجا بايت، وبينزل بأحدث إصدارات أندرويد 10.

التليفون فيه 2 كاميرا خلفية بدقة 12.2، + 16 ميجا بكسل، وكاميرا أمامية مزدوجة بدقة 8 ميجا بكسل.

8-  سامسونج جلاكسي S10:

اتكلمنا على الـ S10 e والـ S10 بلس فوق، لكن هنا هنتكلم عن سامسونج جلاكسي S10 بس من غير أي إضافات، وهو تليفون ظهر في مارس اللي فات برده، وشاشته قوية بمقاس 6.1 بوصة من نوع Dynamic AMOLED.

التليفون عظيم في إمكانياته بالنسبة لسعره، فمثلًا فيه خاصية الشحن السريع، وبطاريته 3200 مللي أمبير.

9- هواوي بي 30 برو – Huawei P30 Pro:

الشركة الصينية “هواوي” تعتبر من أوائل الشركات الصينية اللي اقتحمت عالم التليفونات الذكية بقوة ومهارة، وأثبتت وجودها بشكل كبير في السق المصري، وده شجعها على الاستمرارية والتطوير من منتجاتها، علشان نشوف إبداعها في “بي 30 برو” اللي نزل في مارس اللي فات.

التليفون تصميمه يخطف العين، من أول شاشته اللي واخده “كيرف” من الجناب زي سلسلة الـ EDGE  في سامسونج، ده غير إنها متينة  وجودتها عالية بفضل تصنيعها من زجاج مع إطار ألومنيوم.

هواوي بي 30 برو فيه 4 كاميرات بزاوية واسعة، دقة الكاميرا الأولى بس لوحدها 40 ميجا بكسل.

10- آيفون XR:

كلاكيت تالت مرة، بس المرة دي هنتكلم عن تليفون apple أهم ميزة فيه سعره، وده لإن المعروف عن تليفونات apple  كلها إنها غالية سيكة.

التليفون نزل في أكتوبر اللي فات، وفيه خاصية الشحن السريع واللاسلكي، فممكن تشحن 50% من البطارية ف 30 دقيقة بس، لكن تفضل المشكلة الأزلية لكل تليفونات apple وهي سعة البطارية (2942 مللي أمبير) مقارنةً بإمكانيات التليفون.

مقترح