The Definitive Guide to Living in the Capital , Cairo , Egypt

بديعة: شنط بناتي للبيع على الفيسبوك بتصميمات مميزة

بديعة: شنط بناتي للبيع على الفيسبوك بتصميمات مميزة

الحقيقة أن كثير من المشروعات التجارية بالنسبة لنا بـ تبقى "عجيبة" شويتين، ومش بـ نقدر ندرك مدى واقعيتها أو نفهم سر نجاحها غير لما نعرف ونفهم نسبيًا نفسية الشريحة المستهدفة بالخدمة أو المنتج اللي بـ يعمله أصحاب المشروع.

يعني مثلًا.. كاتب الموضوع ده كـ "ولد" ما عرفش يفهم بسهولة سر استحواذ بعض الحاجات على قدر وافر من اهتمام بنات حواء، فيا دوب نرصد كده من بعيد ونسجل علشان يوم ما نحب نهادي حد منهم عزيز على قلوبنا نعرف نلاقي اختيار مناسب ولطيف ويحقق الأثر المطلوب، من ضمن الحاجات دي الشنط بأنواعها.

موضوع الشنط ده بدأ يلفت نظرنا من لما كنا في خروجة مجمعة مع بعض الأصدقاء والصديقات، وفي فقرة الأكل في وسط اليوم عدت أمامنا بنت كانت لابسة شنطة يد عليها زخارف ملونة، وشكرًا على كده، اليوم بالنسبة للبنات اللي معانا انتهى عند اللحظة دى، لحد آخر اليوم تحولت موضوعات أحاديثهم كلها عن جمال لون الشنطة، وروعة تصميم الشنطة، والأماكن اللي محتمل تكون البنت اشتريت منها الشنطة، والتحسر على أنهم ما لحقوش يروحوا يسألوها منين جابت الشنطة.. وهكذا.

الطبيعي أن العبد لله يكون متنح ومستغرب وبـ يحاول يفهم، لكن في الواقع كان مشغول جدًا بالقضية اللي اتكلم عنها في بداية الموضوع، وافتكر أن كان عدت عليه صفحة على الفيسبوك لمشروع "شنط" بناتي بتصميمات مختلفة شوية عن اللي موجود، واستغرب وقتها شوية من قيام مشروع كامل على منتج محدد كده، وكان بـ يقول لنفسه إزاي حد "يزنق" نفسه في مساحة ضيقة جدًا بالشكل ده، ولما حصل الموقف ده فهم، وبدأ يعيد بناء عقليته التجارية عمومًا والتسويقية خصوصًا من أول وجديد.

مقدمة تمهيدية ضرورية –في رأينا- قبل الدخول في موضوع بالطبيعة دي، "بديعة" هى الصفحة اللى على الفيسبوك اللي كنا حكينا لكم عليها واستغربناها، لكن بما أنه قد بطل العجب بمعرفة السبب، فخلونا نتكلم شوية عنهم:

"بديعة".. مشروع بدأ من فترة قريبة، المنتج الوحيد اللي بـ يقدموه -حتى الآن- هو شنط بناتي بتصميمات مميزة ومختلفة، معظمها رسومات يدوية بسيطة بس تاخد العين، تحولت لتصميمات مطبوعة على الشنط المنتجة، اللي –بدورها- برضه تفصيلتها لطيفة جدًا، وعمليّة إلى حد مقبول جدًا، شأنها شأن التصميم المطبوع عليها، ويبدو أن الفكرة مش بس في الألوان المبهجة والتصميمات الجميلة، لكن واضح كمان من كلام بعض الصديقات أن طبيعة التصميمات نفسها مختارة بعناية شديدة جدًا علشان تبقى متماشية مع اللي بـ يحبوه واللي عاوزينه، وده في الغالب سر الانتشار السريع لـ "بديعة" والقبول الشديد لمنتجهم من جمهورهم البناتي، وعامة السوشيال ميديا سهلت جدًا على أي حد معرفة تقييم المستخدمين لمنتج ما وقت ما يحب، ومن مجموع التقييمات دي بـ يبدأ يكون صورة واضحة عن مميزات وعيوب المنتج.

التعليق السلبي الوحيد اللي لمسناه من بعض المستخدمين هو أن السعر نسبيًا أغلى من معدلات الأسعار الطبيعية، لكن ده مفهوم شوية لأن شكل الإنتاج وحجمه بـ يفرق جدًا في عملية التسعير دي، ولما يكون عدد القطع المنتجة من التصميم الواحد قليلة نسبيًا بـ يكون السعر أعلى شوية علشان التكاليف الثابتة، كمان نوع الطباعة وطريقة التصميم من البداية بـ تفرق جدًا، وفي كل الأحوال تقدروا بنفسكم تشوفوا التصميمات والشغل بتاعهم وتقيّموا إذا كان الأمر مقبول ولا مبالغ فيه، تابعوا شغلهم وتواصلوا معاهم إلكترونيًا على صفحتهم على الفيسبوك أو تليفونيًا على رقم 01066192884.

وبالمناسبة في الفترة الحالية هـ تلاقوهم عاملين عروض لطيفة وتخفيضات كويسة على منتجاتهم بمناسبة العام الجديد.. يجعل أيامكم كلها سعيدة وكل سنة وأنتم جميعًا زي الفل!

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح