The Definitive Guide to Living in the Capital , Cairo , Egypt

الموضة والأزياء من الحاجات المهمة والملفتة في حياتنا اليومية. وناس كتير بتحب دايمًا تتابعها وتعرف الجديد فيها. ومحلات كتيرة في القاهرة اهتمت بالموضوع ده. وقررت تقدم للجمهور أفضل الإكسسوارات والأزياء في عالم الموضة.

جوائز اختيارات المحررين لأفضل محلات الموضة لعام 2017:

مايزون 69 – Maison 69:

من المحلات اللي متخصصة بمعنى الكلمة في الأزياء والموضة. وبيقدم دايمًا حاجة جديدة ومختلفة. وده اللي رشحه للقائمة بتاعتنا للفائزين السنة دي.

 

50A كونسيبت ستور – 50A Concept Store:

القطع المعروضة في 50A كونسيبت ستور أصحاب المحل بيختاروها بنفسهم من كل حتة في العالم؛ القطع دي  مش بس تشمل الملابس الحريمي، الرجالي والأطفال، دي كمان بتضم مجموعة كبيرة من قطع الإكسسوارات المنزلية اللي ممكن تناسب كل الأذواق. الجديد كمان أن  50A  كونسيبت ستور بقى كمان بيوصل اللي أنت عايزه  لحد البيت.    

 

بوهو جاليري – Boho Gallery:

بعد نجاح الفرع الأول لبوهو جاليري في مصر الجديدة، المحل قدر يوصل لكل مجانين التسوق في الناحية الثانية من القاهرة بفرعه الثاني في الزمالك. بيميز بوهو جاليري أنه بيجمع ما بين القطع المستوردة والقطع اللي بيصمموها الفنانين المصريين الشباب. وأجمل حاجة أن المعروضات متاح منها قطع محدودة، علشان ما تلاقيش نص مصر لابسة زيّك.

 

فيلا بابوشكا – Villa Baboushka:

من البوتيكات اللي حققت نجاح كبير من أول ما فتحت، والنجاح لسه مستمر بدليل أن المحل لسه بيفوز عندنا بجوائز اختيارات محرري كايرو 360 زي كل سنة. بيعجبنا في فيلا بابوشكا الاهتمام بالتفاصيل؛ من أول القطع المعروضة المميزة والأنيقة ولحد أناقة المكان نفسه، والموجود في الزمالك.

 

فينتاج بوتيك – Vintage Boutique:

إضافة جديدة لقائمة الفائزين، من المحلات اللي قلبت الزمالك من أول ما فتحت. فينتاج بوتيك هو جنة لأي واحدة بتحب تجدد في شكلها؛ لأنه بيقدم مجموعة متنوعة من القطع اللي مش مقيدة بستايل معين، وبالتالي أيًا كان ذوقك هتلاقي حاجة تناسبك.

 

الموضة الرجالي:

أورانج سكوير  – Orange Square:

ما نوعدكش أنك تبقى جيمس بوند لما تختار بدلتك أو تفصلها من أورانج سكوير، ولكن المضمون والمؤكد أنك هتلاقي بدلة تناسبك من بين تشكيلة البدل الكثيرة اللي جاية من بلاد الموضة العالمية زي إيطاليا وإنجلترا. ده غير أن المحل بيفصّل لك الاستايل اللي أنت عايزه بالتفاصيل اللي على مزاجك. وسواء اشتريت جاهز أو فصلت، البدلة هتاكل من عليك حتة.

 

الموضة والإكسسوارات:

إيه بي أن جي وورلد – Abn’G World:  

المحل عالم لوحده، نعتقد أنك ممكن تدخله وتنسى نفسك جواه من كثر المعروضات الموجودة، واللي بتضم كل حاجة ممكن تتخيلها، ومن أي مكان في العالم. لو ليكي في الموضة هتلاقي… لو ليك في قطع الديكور الغريبة هتلاقي. إحنا شخصيًا دخلناه قبل كده وكان نفسنا ناخد ركن نعيش فيه هناك… أهو بدل ما نشتري الحاجة نعيش وسطها.

 

بيمن – Beymen:

بيمن يعني ماركات عالمية مهمة زي ديور، شانيل ودولتشي & جابانا.  الموضوع مش بس متوقف على الملابس، ده ممتد للإكسسوارات والمكياج وحتى قطع الأثاث المختلفة. بالرغم من أن أسعاره فوق مستوى الأسعار العادية، إلا أنه من الأماكن اللي لما بتعمل تخفيضات بتعمله بجد.  

 

جاليري منايا – Mounaya  Gallery:

من أوائل البوتيكات اللي فتحت في القاهرة –و ده كان سنة 2006. جاليري منايا بهر محبي التسوق بمعروضاته اللي أغلبها إكسسوارات وحلي حريمي، ده غير مجموعة الملابس الحريمي اللي عليها إمضاء أشهر مصممي الأزياء المصريين زي “أمينة كيه” وغيرها كثير.

 

سامي أمين – Sami Amin:

من المحلات اللي بتتميز بطابع خاص بمنتجاتها واللي لحد دلوقتي ما حدش قدر أنه ينافسه. من أول قطع الحلي النحاسية، مرورًا بالشنط المصنوعة من الجلد الطبيعي وحتى قطع الأثاث والإكسسوارات المنزلية؛ منتجات سامي أمين المستوحاة من التراث المصري قدرت أنها تحقق نجاح وتثبت أن مقولة “البلدي يوكل” صح مية في المية.

 

تويا – Tuya:

هو من الأماكن القليلة جدًا في القاهرة اللي لسه بتقدم شنط ومحافظ رجالي وحريمي مصنوعة من الجلد الطبيعي، بعدما اكتسح الجلد الصناعي الساحة بقوة. وبعكس غالبية الأماكن اللي بتقدم منتجات من الجلد الطبيعي، تويا موديلاته حديثة ومناسبة لكل الأذواق.