The Definitive Guide to Living in the Capital , Cairo , Egypt

تسوق

دليلك المُبسط لمعرفة الفرق بين الـ “كريديت كارد” والـ “ديبت كارد”

الفرق بين الكريديت كارد والديبت كارد ديبيت كارد فيزا كارد كروت ائتمان كروت بنكية كريديت كارد ماستر كارد
دليلك المُبسط لمعرفة الفرق بين الـ “كريديت كارد” والـ “ديبت كارد”
    بواسطة
    Mohamed Talaat

    كتير مننا بيتلخبطوا ما بين البطاقات البنكية المختلفة، خصوصًا الـ”Debit Card” و”Credit Card”، وأحياناً مابنكونش عارفين إحنا محتاجين إيه منهم أكتر في تعاملاتنا اليومية، وإيه الأفضل لينا، وعلشان نتعرف أكتر على الاختلافات بين النوعين دول من البطاقات البنكية، اتكلمنا مع الأستاذ خالد عمار، المسؤول في بنك الإمارات دبي الوطني، واللي وضح لنا أهم 5 اختلافات بين الـ “ديبت كارد” والـ “كريديت كارد”.. تعالوا نعرفهم مع بعض:

    1- الـ”Debit card” ببساطة هي بطاقة للخصم الفوري من رصيد الحساب البنكي، وبيكون الحد الأقصى للدفع بيها هو رصيدك الفعلي في حسابك، لكن الـ”Credit card”‏ بتوفر رصيد زيادة على هيئة قرض بحد أقصى للمبلغ طبقًا لاتفاقك مع البنك وبيتم سداده خلال 45 يوم وحتى 58  يوم بدون فوائد حسب البنك المصدر للبطاقة.

    2- الـ”Debit card” تقدروا تستلموها بعد عمل حساب في البنك سواء جاري أو توفير، ومالهاش شروط صعبة، ولكن الـ”Credit card” لها شروط معقدة أكتر، وغالبًا البنك بيطلب منكم أوراق أكتر، وفي بعض الأحيان المبلغ اللي مرتبط بالحد الأقصى فيها مرتبط بدرجة كبيرة بقيمة الدخل الشهري.

    3- الـ”Debit card” تقدروا تسحبوا من خلالها فلوس من ماكينات الصرف المختلفة، أو تشتروا منتجاتكم مهما كانت بدون أي عمولات، ولكن الـ”Credit card” لو سحبتوا منها فلوس من ماكينات الصراف الآلي هيتم حساب فوائد عليكم حسب الوقت اللي بتسحبوا فيه المبلغ المالي من خلالها، أما في حالة استخدامها فقط في الشراء من المتاجر المختلفة بيكون فيه فترة سماح 45 يوم.

    4- ممكن تكون خدمة الشراء عبر الإنترنت غير متاحة في بعض البنوك اللي بتقدم الـ”Debit card” علشان خطورة سرقة البيانات ولازم الشخص يبلغ البنك من خلال خدمة العملاء بتوفير الخدمة، وده عكس الـ”Credit card” اللي متاح إنكم تشتروا بيها من على الإنترنت بدون قيود بنكية.

    5- الـ Credit card فيها ميزة التقسيط المباشر مع البنك طبقًا للشروط، وأوقات بتكون بدون فوائد، بعكس الـDebit card، اللي ماتقدروش تقسطوا مباشرة مع البنك من خلالها.

    وفي النهاية لازم تتأكدوا دايمًا من الشروط والأحكام الخاصة بالبنك الخاص بيكم قبل أي معاملات، لأنها بتختلف كتير من بنك للتاني، والشروط للكروت البنكية سواء “Debit card” أو Credit card، بتخضع لمعايير كل بنك ومش عامة في كل البنوك

    مقترح