The Definitive Guide to Living in the Capital , Cairo , Egypt

الستات المتزوجة خاصة اللى بـ تشتغل بـ يكون عندها دائمًا صراع مع الوقت، فى التوفيق بين الشغل والبيت خاصة لو فيه أطفال، ما بـ تبقاش عارفة تروح تشترى أى حاجة بهم، ده غير أن زحمة القاهرة بـ تضيع وقت أى حد وبـ تكره الواحد أنه ينزل من بيته أصلاً، ولأن الزمن بـ يتغير والحياة بـ تتغير وفيه أفكار بـ تطلع بها ناس علشان تخلى الدنيا أحسن، دلوقت ممكن تطلبى بقالتك وخضرواتك وفاكهتك حتى اللحمة أونلاين، ده حقيقى، فيه مجموعة مواقع على الإنترنت وخدمات تقدرى من خلالها تطلبى اللى أنت عاوزاه ويوصل لك لحد باب البيت وبـ تدفعى عند الاستلام سواء أونلاين أو من خلال خط ساخن، خلونا نشوف سوا بعض من المواقع دي:

 

Gourmet Egypt

معروفين من سنة 2006، وموجود له Stores فى المعادى والزمالك والشيخ زايد بـ تروحها يا إما بـ تطلب اللى أنت محتاجه أونلاين من خلال موقعهم الإلكترونى، من اسمه جورميه بـ يقدم أفضل المكونات والمنتجات بجودة عالية من باستا، خضروات، سي فوود، شوكولاتة، لحوم خاصة الأسترالى، ودواجن، وألبان.. إلخ، إلى جانب تقديم وصفات أكل لشيفات معروفين على صفحة الفيسبوك أو الموقع.

جورميه عندهم جدول لمواعيد الدليفري لكل منطقة، اتصل بخطهم الساخن 19339، والموضوع مش بس مقتصر على الأكل، ده كمان ممكن تلاقى فى كل قسم بـ يبيعوا الأدوات اللى بـ تستخدم لتحضير اللحم زي الشوايات، وماكينات القهوة، وأدوات المطبخ وغيرها من البراندات الشهيرة.

 

بقالة.كوم

الموضوع ببساطة بـ يخلص فى 3 خطوات: اختار المنتجات اللى أنت عاوز تشتريها، سجل بياناتك وحدد إمتى وفين، وأخيرًا حدد طريقة الدفع اللى تفضلها، والظريف فى الموقع أنهم برضه عاملين وصفات أكلات ومكوناتها لو عجبتك تطلبى المكونات بتاعتها من عندهم.  

لو مش حابين تعملوا الطلب أونلاين ممكن تطلبوه من خلال الخط الساخن بتاعهم 16237.

 

Awfar market

الموضوع هنا بقى مختلف، "أوفر ماركت" بـ يقدم خدمة أنه ممكن يجيب لك الحاجة اللى طلبتيها من السوبر ماركت اللى أنت عاوزاه داخل القاهرة، بمعنى أنك بـ تختارى ما بين: سوبر ماركت "المحمل، سعودى، أولاد رجب، سبينيس، كارفور، ومزارع دينا"، وبعد اختياره بـ تملأ سلة المشتريات بالمنتجات اللى عاوزها وبـ تحدد ميعاد التوصيل وبـ تدفع عند الاستلام، والجميل أن التوصيل مجانى لفترة محدودة.

الموقع نسخة تجريبية والافتتاح الرسمي قريب، ممكن تطلب من خلال الموقع، أو من خلال تطبيق "أوفر ماركت" للأندرويد والـ IOS.

 

Butcher House

نيجي بقى للتخصص، ومش فى أى حاجة، ده تخصص لحوم بالأخص ودواجن، وقطعياتهم من اللحم نظيفة جدًا وجودتها عالية، لهم محل فى المعادى فى شارع 9 لكن بـ يوفروا خدمة توصيل لكل المناطق وفقًا لجدول برضه ممكن تعرفوه من هنا.

دى المنيو بتاعتهم فيها الأسعار، من الحاجات الحلوة على صفحة الفيسبوك بـ ينشروا نصائح للى بـ يحبوا الطبخ عن تسوية اللحم وتتبيلها حلوة جدًا، ومش بس كده هما كمان بـ يبيعوا الصوصات اللى ممكن تحطها على اللحم، أو برطمانات هالوبينو أو زيتون مهروش أو هريسة فلفل حار، شوفنا كمان على صفحتهم بـ يبيعوا بيض بدون هرمونات وعسل طبيعي.

تابعوا صفحة الفيسبوك لأن الموقع فيه تجديدات دلوقت، لأن كل فترة بـ يعملوا عروض توفير زي اشترى 2 كيلو Meatballs أو برجر أو سجق وخد الكيلو الثالث مجانًا. 

 

Food Works

هنا بقى الموضوع مختلف، "فوود ووركس" بـ يقدموا لكم تشكيلة من أغذية مجمدة ومحفوظة مكوناتها طبيعية 100% ممكن تختاروا منها من على الموقع الإلكترونى أو صفحتهم على الفيسبوك زي المقبلات (سبرنج رولز خضار وفراخ وفطاير جبنة ولحم وسمبوسك) وأنواع الفراخ (بانيه، كوردون بلو، شاورما)، مش كده وبس، عندهم كمان تشكيلة من الباستا (رافيولى ولازانيا، ونجرسكو جاهزة على الطبخ وإضافة صوص من اختيارك) والحلويات الجاهزة (زي فطيرة التفاح ومافن البلوبيرى ومافن التشوكليت شيب).

على الموقع بعض وصفات لأكلات، ممكن تطلب اللى أنت عاوزه من خلال خدمة التوصيل المجانى، اتصل بـ 01017050040.

 

أوليو – Olio

نفس الشيء فى مجمدات أوليو اللبنانية والعالمية اللى كتبنا لكم عنها قبل كده مقال نقدي، الفرق عن اللى قبله أن لهم فروع بيع فى كذا مكان إلى جانب خدمة التوصيل، هـ تلاقيه فى المهندسين، وفى داندى مول طريق مصر إسكندرية وغيرها، حتى فيه فروع خارج القاهرة منها المنصورة والغردقة وشرم الشيخ.

مش شرط تروح الفروع علشان تشترى، ممكن تتصل بالخط الساخن 16905 ويوصل لك لحد البيت، اعرف العروض والأصناف من خلال صفحتهم على الفيسبوك، وكمان ممكن تطلب الأوردر من خلال الصفحة، من مميزات "أوليو" أن كل أصنافه خفيفة على المعدة، الاختلاف اللى ممكن تلاقيه فيه عن أي منتجات ثانية هى أنها مش لبنانية بالاسم فقط الطعم كمان لبنانى.

 

NGS

لهم مزرعة خاصة بـ يبيعوا منتجاتهم وكلها خالية من الكيماويات والهرمونات، منتجات عضوية وصحية، ومحفوظة بشكل جيد، ودى أهم وأحلى حاجة، هـ تلاقيها يا إما على الموقع، أو صفحة الفيسبوك، وموجودين على أنستجرام كمان.

فيه جزء عندهم فى الموقع مالوش علاقة بالأكل أو المشروبات، زي علب الـ Lunch Box وزجاجات المياه وعصارة الفاكهة الطبيعية، ومنتجات التجميل زي الـ Body Butter والسكرب والشامبوهات. 

خدمة التوصيل متاحة جميع أيام الأسبوع ماعدا الجمعة من الساعة 12 الظهر لحد الساعة 9 مساءً، ولو أنت خارج القاهرة اتصل بهم علشان تضبط موضوع التوصيل من خلال 01020 888 046 أو info@ngs-egypt.com.

 

Spilanda Box

خبراء الجودة الألمانية، متخصص فى الخضار والفاكهة فقط، بـ يشجعوا الناس أنهم يحولوا حياتهم من الـ Junk Food للأكل الصحى المفيد، سبب تسمية "سبيلاندا بوكس" أنهم بـ يوفروا عبوة عائلية تكفى 100 فرد فيها خضار وفاكهة بمواصفات عالية الجودة، والعبوة دى خاصة للمنازل فقط، سعرها 120 جنيه، ممكن تتصل بـ 01155539795 وتطلبها، أو تدخل على صفحة الفيسبوك وتقرأ شوية معلومات عامة عن الأكل اللى ممكن يحرق سعرات أو العناية بالبشرة.. إلخ.. بس هو ده الموضوع كله بكل بساطة.

 

مزارع دينا – Dina Farms

"مزارع دينا" مرتبطة معانا بالسفر على الطريق الصحراوى لما كنا بـ نعدى عليها علشان نجيب منتجاتها الطازجة، من فترة قريبة بدأنا نلاقى محلات شيك ومعمول لها Branding جديد ومميز وتشد العين من بعيد باللون الأخضر المميز واللوجو الأزرق فى أبيض (صفحة الفيسبوك لسه ما نزلش فيها اللوجو الجديد)، الفروع كثيرة فى أنحاء القاهرة ممكن تعرفها من هنا، ده غير أنهم فتحوا فروع فى إسكندرية كمان.

مزارع دينا بـ يعملوا خصومات كل فترة وعروض خاصة مغرية بـ ينشروها على صفحتهم على الفيسبوك على المنتجات العادية، ده غير طبعًا المنتجات اللى بـ تحمل اسمهم واللحوم اللى من مزارعهم الخاصة.