The Definitive Guide to Living in the Capital , Cairo , Egypt

الأمهات عادة بـ يكون أمامهم طريقتين يشيلوا بها أولادهم البيبي لما يخرجوا، يا إما في عربية أو كرسي يا إما يشيلوهم بالشيّالة أو الـ Baby Carrier، الأمهات اللي اختاروا يشيلوا أولادهم بالشيالات أخدوا القرار ده لسبب من اثنين: إما أنهم عاوزين يشيلوا البيبي في حاجة خفيفة جدًا لأنهم مثًلا ما عندهمش عربية، أو مش حمل أنهم يشيلوا 100 حاجة، أو أنهم قرروا يمشوا على منهج التربية الحميمية Attachment Parenting حتى من غير ما يعرفوا أنهم بـ يعملوا ده (يعني اختاروا يكونوا قريبين أوي من ولادهم وبـ يحضنوهم طوال الوقت).

منهج التربية الحميمية ده باختصار بـ يهدف أن الأم تكون دايمًا قريّبة من البيبي، يشم ريحتها، ويسمع صوتها، ويشوف اللي بـ تشوفه، ويعيشوا سوا كل حاجة، شيل البيبي في شيالة مش بس بـ يفيده في أنه يقرب من مامته ويرتاح ويتطمن، لأ وكمان بـ يفيد الأم في أنها تخسر وزن كثير من وزن الحمل بسبب أنها شايلة وزن وبـ تمشي وبـ تتحرك به، المهم في القصة دي كلها: إيه الشيالة الكويسة اللي بـ ننصح بها وإيه الشيالات المضرّة؟ وتشتري منين الشيالات الكويسة؟ ده اللي هـ تعرفيه في الموضوع ده.

 

الشيالات حول العالم أنواع كثير مختلفة هـ نركز هنا على اللي موجود ومنتشر في مصر وهـ تقابليه في المحلات:

. الشيالات التقليدية القديمة:

دي أكثر شيالات مضرّة مش بـ ننصح بها، بـ يكون البيبي فيها كأنه واقف تمامًا وفيه حتة قماش ما بين رجليه، الشيالات دي متوفرة في كل محلات الأطفال وسعرها بـ يبدأ من 150 ولحد 800 جنيه ودي مشكلتها أنها ممكن تسبب تشوهات في عضم الفخد للبيبي ده غير أنه مش بـ نعرف نستخدمها غير لما البيبي يكبر شوية ويسند راسه تمامًا (حوالي الشهر الرابع) فدي مش بـ ننصح بها إطلاقًا.

 

. الشيالات التقليدية المعدّلة:

ودي نفس فكرة الشيالة العادية التقليدية لكن البيبي بـ يكون كأنه قاعد على كرسي بحر قماش، يعني ساند على مقعدته، ودي مش بـ تسبب مشكلة التقوس وتشوه الفخد لأن البيبي محمّل على مقعدته مش على عضم رجليه، لكن برضه مش مناسبة غير لما البيبي يكبر ويسند راسه.

دي هـ تلاقيها بـ تبدأ من 500 وحتى 2000 جنيه ومتوفرة في محلات هدية وغيرها.

 

. البوتش سلينج Pouch Sling:

دي شيالة قماش على شكل شبه الموزة، الأم بـ تلبسها بطريقة معينة والبيبي بـ يتشال جواها، مصنوعة من خامات معينة متينة تستحمل وزن البيبي، وفيها نسبة مطاط، من أكثر الطرق الصحية لشيل البيبي ومن أكثر طرق الشيل أمانًا لأن البيبي قاعد جوّه جراب مقفول عليه.

من مميزاتها أن ممكن البيبي يتشال فيها من أول 3.5 كيلو جرام (الشهر الأول تقريبًا) وبـ يكون نايم في وضع الجنين ولحد 3 سنين (حوالي 13 كيلو)، من عيوبها أنها بـ تحتاج تجربة وممارسة علشان تقدري تلبسيها بسرعة وبسهولة على طول لكن بمجرد ما بـ تشوفي الفيدوهات التوضيحية وبـ تجربي بـ تتعلمي، وكمان لها مقاسات ولازم المقاس يكون مضبوط عليكي علشان تستريحي أنت والبيبي.

أوّل ناس دخّلوا البيبي سلينج مصر كانوا Comfy Mom وهو مشروع مصري مبني على أسس ومعايير دولية بـ يعمّل السلينج من خامات مستوردة وأثبتت كفائتها من 2009 وسعرها حوالي 250 جنيه.

 

. بيبي راب Baby Wrap:

البيبي راب طريقة قديمة عالميًا في شيل البيبي بـ تعتمد على لف قماشة مستطيلة بطريقة معينة حول جسم الأم ووضع البيبي جواها، طبعًا القماشة لها معايير ومقاييس معينة وخامات معينة برضه وهي مناسبة من الشهر الأول وحتى عامين أو أكبر حسب الوزن والتحمل.

من عيوبها أن الأم بـ تحتاج للممارسة والفرجة على الفيديوهات علشان تقدر تستخدمها بسهولة وده الحال في كل الشيالات الصحية المستوحاة من القبائل والطبيعة، من مميزاتها عدم وجود مقاس معين للأم لازم تلتزم به، هي مقاس واحد لكل الأمهات، من المتميزين في تقديم النوع ده من الشيالات بسعر معقول (حوالي 250 جنيه) مشروع مصري اسمه Makameek – مكاميك.

دي أبرز أنواع الشيالات إللي هـ تلاقوها في مصر، ممكن تتفرجوا وتتابعوا الأسعار والأنواع وتختاروا المناسب لكم.. أهم حاجة تعرفي أنه شيل البيبي طريقة ممتازة للتواصل معاه وهـ يحافظ على جسمك ورشاقتك وأي أم تقدر تشيل ولادها لحد فوق السنتين بسهولة طالما مافيش إصابات في الظهر.

 

تقدرى تلاقى كل أشكال الشيالات على الصفحات أو المواقع: هدية ستور – Hedeya Store، وبيبي بوش – Baby Posh، وزيرو تو فايف – Zero2Five، وبيبي كارت – Baby Cart، وأور كيدز – Our Kids، وصفحة شيالات مكاميك – Makameek، وصفحة شيالات كومفي مام – Comfy Mom.