The Definitive Guide to Living in the Capital , Cairo , Egypt

تسوق

“كايرو بوليتان”.. مكان في جاردن سيتي بيبيع “تراب القاهرة” بـ500 جنيه

القاهرة تذكارات من القاهرة تراب القاهرة زجاجة تراب القاهرة كايرو بوليتان منتجات كايرو بوليتان
“كايرو بوليتان”.. مكان في جاردن سيتي بيبيع “تراب القاهرة” بـ500 جنيه
    بواسطة
    Mohamed Talaat

    شوارع القاهرة مليانة تراب.. حقيقة ماحدش يقدر ينكرها، لكن هل تعرف إن فيه محل منتجات فنية في القاهرة قرر تحويل التراب اللي في شوارعنا لمنتج فني وقرر عرضه للبيع؟ “كايرو بوليتان” هو مكان أقرب لمعرض فني، هتلاقي عندهم تصميمات فنية بتوثق تفاصيل الحياة في القاهرة، يعني عندهم مثلًا مقلمة على شكل علامة التاكسي، ودفاتر على شكل تذاكر أتوبيس وغيرها من التفاصيل.

    من ضمن المنتجات اللي بيوفرها المكان زجاجة فنية فيها تراب القاهرة، والمنتج اللي بيحمل اسم “تراب القاهرة” سعره 500 جنيه. تعالوا نعرف التفاصيل.

    “القاهرة مدينة متربة.. هذا التراب بعد مرور أزمنة سيكون آخر شيء تبقي مننا”.. بالوصف ده، عرض محل “كايرو بوليتان” المهتم بالمنتجات المتعلقة بالثقافة المصرية بشكل عام وثقافة الحياة في القاهرة بشكل خاص، عبر موقعه الإلكتروني، زجاجات بتحمل اسم “تراب القاهرة” للبيع، مقابل 500 جنيه.

    وفي الوصف المصاحب للمنتج، وضح الموقع أن “تراب المدينة يدور في حلقات عبر السنين ليعود إلينا من جديد محملًا بتاريخ العصور السابقة؛ فالاحتفاظ به فرصة لمعرفة تكوين الحياة والأرض بعد مرور سنوات”.

    وبيضيف القائمين على الفكرة: “من الصعب معرفة آخر مكان مر به التراب الذي نصادفه يومياً، هل كان على إحدى كباري القاهرة، أم كان بالأمس على سطح منزل؟ وهل كان في أول المدينة أم في وسطها أم في آخرها؟ وأين هو الآن؟”.

    زجاجات “تراب القاهرة” بتحتوي على زلط ولب وحشرات

    وبتحتوي زجاجات “تراب القاهرة” على زلط، ورمال، وبقايا عضوية، وبقايا أكل ومشروبات (كشري، قشر لب، شاي)، وحشرات، وأعقاب سجائر، ومسحوق عظام، ونباتات متحللة، وورق، وجير، وفضلات المواشي والحيوانات، وشعر آدمي وحيواني، ودهانات جافة، وفخار، وعيدان خشبية، وغيار معدني، وثاني أكسيد الكبريت، وقش، وحصى، وفلين.

     

    وبيقول فريق “كايرو بوليتان” إن الزجاجة دي موجهة فقط “لمن يفهم ويقدر معني توثيق الذكريات وأرشفة حالة معينة من خلال جمع شيء من محيط هذه الحالة”، وأن “هذا المنتج لهواة الجمع الذين يقدرون قيمة الشيء مهما كانت، وصنع في حب تراب القاهرة الذي لا نهاية له”.

    تقدروا تشتروا “تراب القاهرة” من اللينك ده، وتقدروا تتعرفوا على منتجات فنية أكتر من “كايرو بوليتان” من هنا.

    مقترح