The Definitive Guide to Living in the Capital , Cairo , Egypt

تسوق

هتشتري موبايل جديد؟ 9 نصائح مهمة لازم تبقى عارفها

شراء موبايلات نصائح
هتشتري موبايل جديد؟ 9 نصائح مهمة لازم تبقى عارفها
    بواسطة
    Cairo 360

    محلات الموبايلات في القاهرة مليانة أشكال وأنواع، ولازم قبل ما تشتري موبايل جديد تبقى عارف كويس إنت عاوز تشتري موبايل ليه بالظبط! لإن كل ما كان النوع اللي هتختاره مناسب لإحتياجاتك وميزانيتك كل ما كان أحسن، في السطور الجاية هنقدم لكم مجموعة نصائح مهمة نشرتها مجلة لغة العصر، النصائح دي مفيدة فعلًا.

    اختيار النظام الأنسب

    كلنا عارفين إن أشهر أنظمة تشغيل هما Android و  iOs و windows phone ، ومهم تبقى عارف مميزات كل نظام، وهل النظام ده هيديك اللي أنت محتاجه ولا لأ، لأن مثلًا بعض الموبايلات زي الآيفون بيستخدم نظام تشغيل iOs. والنظام ده مش بنفس سهولة الأندرويد، ومش كل البرامج والتطبيقات بتشتغل عليه.

    عاوز إيه من الموبايل

    قبل ما تشتري الموبايل لازم تحدد أنت محتاجه في إيه؟ لأن ناس كتير بيشتروا موبايلات  بأسعار مرتفعة جدًا، ومش بيستفيدوا بإمكانياتها لأنهم مش محتاجين كل الإمكانيات دي، والعكس صحيح فيه ناس بيشتروا موبايلات  بأمكانيات قليلة وبعدين يحتاجوا  يغيروا الموبايل ويجيبوا حاجة أحسن منه. فحدد احتياجاتك من الموبايل  قبل ما تشتريه.

    خليك ذكي

    اسأل عن سعر الموبايل في أكثر من مكان علشان تلاقي  أقل سعر لأن فيه كثير من أماكن البيع بتقدم عروض وتخفيض علي أسعار الموبايلات، علشان تجيب  زبائن جديدة، فحاول تدور وتسأل عن الأسعار قبل ما تشتري وأختار  أقل سعر ممكن، وممكن برضه تدور على الإنترنت علشان تعرف الأسعار ومواصفات الموبايل بالكامل وصور ليه.

    السعر أهم ولا الماركة؟

    ممكن تستغنى عن اسم الماركة علشان تلاقي سعر أفضل؟ يعني مثلًا لو لاقيت موبايل ماركة مشهورة بمواصفات معينة بس سعره غالي، دور على نفس الإمكانيات دي من ماركة تانية منافسة، أو ماركة أقل شهرة، المهم تكون ماركة مضمونة، في الحالة دي هتقدر تشتري  الأرخص وتوفر فرق السعر.

    المعالج.. ثم المعالج

    لازم تعرف المعالج اللي في موبايلك ، لأن اختيارك للمعالج المناسب هيحدد طريقة استخدامك للموبايل، مثلًا فيه معالج ثنائي النواة أو رباعي النواة، فلو كنت من  محبي ومدمني الألعاب وبتستخدم تطبيقات كثيرة فلازم تختار المعالجات الحديثة والقوية، لكن لو كان استخدامك بسيط مجرد تصفح  على الإنترنت وتطبيقات زي يوتيوب وفيسبوك وبتستخدم تطبيقات أقل، تقدر تختار معالج متوسط، وخلي بالك لازم  تعرف أن سرعة المعالج بتتقاس بالجيجا هيرتز  GHz وكل ما زادت حجمها زادت السرعة وزاد سعر الموبايل معاها.

    لا خاب من استشار

    اسأل ناس تعرفهم استخدموا النوع اللي أنت عاوز تشتريه الأول، واقرأ تعليقات المستخدمين اللي قبلك على الإنترنت.لأن دي حاجة مهمة جدًا هتساعدك تاخد قرار صح، ولو ينفع تجرب الموبايل قبل ما تشتريه يبقى أحسن.  

    الكاميرا مهمة

    لو بتحب التصوير يبقى لازم تركز مع الكاميرا، اعرف جودة الكاميرا كويس، وبيتم تحديد جودة الكاميرا بالميجا بيكسل وكل ما زادت بتزيد جودة الصورة. وفيه كمان حاجات تانية  بتحدد جودة الكاميرا زي فتحة العدسة وسرعة الغالق والتصوير الليلي وغيرها. وكل ما زادت جودة التصوير ارتفع سعر الموبايل.

    والبطارية كمان..

    خلي بالك جدًا من نوع بطارية الموبايل، ودي بتتقاس بقيمة mAh  وكل ما زادت بتكون أقوى وأحسن . وفيه منها نوعان، النوع الاول Li-Po أفضل من ناحية طول العمر والاستخدام لكن بيحتفظ بالطاقة أقل. والثاني Li-Ion وهو أفضل من ناحية الاحتفاظ بالطاقة.

    بص على شهادة الضمان

    اقرأ كويس  شروط الضمان للموبايل لأن كثير من الموبايلات بتكون شروط الضمان في صالح الشركة المصنعة أكتر من المستخدم ولو لاقيت عيوب صناعة ممكن تلاقي نفسك من غير ضمان لأن شروط الضمان في صالح الشركة المصنعة.

    كمان ماتنساش تسأل عن مدة الضمان للموبايل وأماكن وعناوين وكلاء الموبايل ده. لأن كثير من الناس بيشتروا الموبايل وبيكون له ضمان لكن غير متوفر أماكن الصيانة والوكلاء للموبايل ده في مكان قريب منهم، ودي طبعًا مشكلة لو حصل عطل مفاجئ للموبايل ومكان الصيانة بعيد عنكم.

     

    مقترح