The Definitive Guide to Living in the Capital , Cairo , Egypt

تسوق

3 أماكن في القاهرة بيوفروا مستلزمات المدارس بأسعار معقولة

أماكن بيع كشاكيل الفجالة سور الأزبكية شوادر كلنا واحد كشاكيل المدارس مستلزمات مدارس بسعر مخفض
3 أماكن في القاهرة بيوفروا مستلزمات المدارس بأسعار معقولة
    بواسطة
    Cairo 360

    رنا شرف

    فيه أماكن كتير في القاهرة ممكن تشتري منها كشاكيل وأقلام وباقي مستلزمات المدرسة، لكن المشكلة إن الأسعار السنة دي غير كل سنة، كل حاجة أصبحت غالية بشكل واضح ماحدش يقدر ينكره. لكن في كواليس العاصمة المصرية فيه أماكن لسة بتبيع منتجات المدارس بسعر معقول مقارنة بأماكن تانية.

    في الموضوع ده هنعرفكم على أفضل 3 أماكن بيوفروا مستلزمات المدارس المكتبية من كشاكيل عادية أو سلك، وأقلام، ومستلزمات أكتر، بأفضل سعر مقارنة بباقي الأماكن. يلا نعرف الأماكن دي فين.

     

    الفجالة

    نقدر نقول إن الفجالة هي المكان رقم واحد في بيع الكشاكيل والأقلام والكراسات وباقي المستلزمات المكتبية، وهتلاقوا هناك أسعار متباينة، لكن مقارنة بباقي الأماكن في القاهرة الفجالة هي أرخص مكان.

    المكان دائمًا زحمة، وهتحتاج تلف كتير الأول قبل ما تختار المكان اللي هتشتري منه علشان تعرف تقارن بين الأسعار بشكل صح وتشوف العروض الأفضل والأنسب لميزانيتك.

    مش بس أولياء الأمور اللي بيروحوا يشتروا من الفجالة، ده كمان أصحاب المكتبات بيشتروا مستلزماتهم من هناك بسعر الجملة.

    شوادر “كلنا واحد”

    “كلنا واحد” هي مبادرة بتقدمها وزارة الداخلية المصرية تحت رعاية رئيس الجمهورية، والمبادرة ليها شوادر كتير في أماكن مختلفة من القاهرة، وبدأت رسميًا من يوم 1 سبتمبر، وهتنتهي نهاية الشهر ده.

    شوادر “كلنا واحد” بتوفر كافة المتطلبات المدرسية بأسعار مخفضة مقارنة بباقي الأماكن، والقائمين على الشوادر بيقولوا إن التخفيضات بتوصل هناك لـ30%.

    تقدروا تعرفوا أقرب شادر ليكم من هنا.

     

    سور الأزبكية

    كلنا نعرف إن منطقة سور الأزبكية هي مملكة عشاق الكتب، وهناك فيه مجموعة ضخمة وكبيرة من الكتب في كل المجالات. لكن مش كتير يعرفوا إن سور الأزبكية فيها كمان مكتبات كتير بتبيع مستلزمات المدارس، والأسعار هناك معقولة مقارنة بباقي الأماكن. هتلاقوا هناك كشاكيل وباقي الأدوات المكتبية بسعر كويس.

    عيب المكان إنه زحمة والممرات ضيقة جدًا فمش هتحسوا براحة وأنتم بتتحركوا في المكان.

    تقدروا توصلوا للمكان عن طريق مترو الأنفاق، وهتنزلوا محطة العتبة، والسور فوق المحطة على طول.

    مقترح