The Definitive Guide to Living in the Capital , Cairo , Egypt

تسوق

5 أماكن تشتري منهم ملابس شتاء للبيت في القاهرة

5 أماكن تشتري منهم ملابس شتاء للبيت في القاهرة
بواسطة
Dina Mokhtar

تقلبات جو مصر موضوع محير جدًا بالنسبة لنا؛ لأن فيه فترات كثيرة في السنة –من ضمنها الفترة اللي مكتوب فيها المقال ده- بـ تلاقي كل يوم… كل ساعة بجو شكل: شوية حرّ وشوية برد وأمطار في أوقات غير متوقعة، إلخ، إلخ… المهم، بما أن وارد جدًا نلاقي نفسنا دخلنا رسميًا في الشتاء قلنا نكتب لكم مقال عن الأماكن اللي ممكن تروحوا تحصنوا نفسكم من سقعة البيت بمجموعة بيجامات وملابس بيت، وخصوصًا أن بيوتنا معظمها مش مجهزة أنها تعزل برد الشتاء، هو صحيح معظم المحلات الموجودة في المقال دي حريمي، بس ده ما يمنعش أننا حاولنا أن يكون للرجالي نصيب.

 

أويشو – Oysho:

من أول المحلات اللي ممكن نكتب عنها؛ لأنه ببساطة من أشهر وأحسن الأماكن اللي ممكن تروحيها لو عاوزة بيجامات أو لبس بيت، أويشو بـ يجمع ما بين أن الحاجة ذوقها حلو، الـ Collection كبير، ومتنوع من حيث درجات ثقل خامة القطع، وبالتالي أيًا كان تخن البيجاما اللي بـ تدوري عليها هـ تلاقيها هناك، ده غير مجموعة الأرواب (250: 350 جنيه) وشباشب شتوية "لكاليك" (219 جنيه). أما البيجامات فالقطعة الواحدة فيها عادة مش بـ تعدي الـ 259 جنيه، إحنا عارفين أن أسعار القطع ممكن تكون غالية حبتين ولكن هي الحقيقة تستاهل. 

ويمن سيكريت – Women’s Secret:

من أوائل سلاسل محلات ملابس البيت الحريمي العالمية اللي فتحت في مصر، ويمن سيكريت بـ يتميز بأنه كل فترة بـ ينزل عروض حتى لو مش في موسم أوكازيون، وبالتالي ممكن الواحد يلاقي حاجة مناسبة بسعر مناسب، سعر القطعة الواحدة من البيجاما عادة ما بـ يقلش عن 299 جنيه، وهو مناسب أكثر للناس اللي بـ تدور على بيجامات ثقيلة بجد، عيبه الوحيد –بغض النظر عن الأسعار- أن الـ  Collectionمش كبير، أو على الأقل مش في معظم الفروع.

 

إيف – Eve:

من الحاجات اللي بـ تبسطنا فعلًا أننا نلاقي محلات بـ تبيع منتجات مصرية 100%، لأن مع كل سلاسل المحلات اللي موجودة في القاهرة بقى الموضوع نادر أنك تلاقي حاجة مصنوعة في مصر، إيف بـ يتميز أن منتجاته مصرية من الألف للياء، ميزة ثانية لإيف أن البيجامات بـ تباع على بعضها وسعرها عادة مش هـ يزيد عن سعر قطعة واحدة في محلات ثانية؛ بمعنى أن بيجاما مكونة من سويت شيرت وبنطلون بـ توصل لـ 270 جنيه، الشباشب الشتوي مثلًا بـ 60 جنيه –دي في حد ذاتها أسعار معقولة جدًا، أحلى حاجة كمان أنهم عندهم شحن وتوصيل حتى بره القاهرة في خلال أسبوع، عيبه الوحيد أن أحيانًا التصميمات بـ تبقى مش قد كده.

 

شارمين – Charmaine:

ده بقى فخر الصناعة المصرية؛ لأنه من أقدم المحلات المصرية اللي متخصصة في ملابس البيت، والداخلية وحتى الشرابات الحريمي، شارمين يميزه عن مجموعة المحلات اللي موجودة في المقال ده أنه بـ يقدم تشكيلة كبيرة لجميع أفراد الأسرة؛ يعني العائلة كلها ممكن تتكسي من هناك، وخصوصًا أنه من ضمن الأماكن اللي أسعارها مناسبة، بيجامات الأطفال بـ توصل من 130: 159 جنيه، الرجالي والحريمي على حسب التصميم، المقاس وثقل الخامة طبعًا، ولكن بـ تتراوح من 230: 330 جنيه.

 

فابيولوس – Fabulous:

فابيولوس كان في الأول مشهور بملابس الخروج بعدها دخل في مرحلة الملابس القطنية الرياضية، ولكن الثابت عنده أنك ممكن تلاقي بيجامات وملابس بيت، واللي عادة مش بـ تخرج عن 250: 300 جنيه للبيجاما الكاملة، ده غير أنه مش شرط تلاقي بيجامات تقليدية موحدة، أنت ممكن تلاقي قطع متفرقة وتبني بيجامتك بنفسك، وعادة القطعة مش هـ تخرج عن 75: 150 جنيه، عيب المكان الوحيد هو أن التصميمات بحالات، ولكن تصميماته متطورة نوعًا ما عن تصميمات المحلات المصرية الثانية.

 

طبعًا هي حاحة حلوة أن الواحد يبقى قاعد في البيت بكامل شياكته حتى لو بالبيجاما، إنما إحنا برضه مدركين أن لبس الشتاء لوحده ميزانية، علشان كده بـ ننصحكم أنكم تنوعوا من المحلات الموجودة في المقال، وفي النهاية أهم حاجة أنكم تكونوا "دفيانين" ومرتاحين. 

مقترح