The Definitive Guide to Living in the Capital , Cairo , Egypt

بما أن رمضان خلص والشهرين الجايين هيبقوا جحيم في القاهرة –من كثر الحر، مش من حاجة ثانية- قررنا أننا نجمع لكم في مقال مجموعة من الحاجات اللي ما ينفعش تروح البحر من غيرهم.

 

1 – كريم واقي من الشمس… أو زيت تسمير لو بتحب تاخد لون:

الناس على الشط نوعين؛ واحد لابد تحت الشمسية، والثاني ممدد في الشمس وبيتقلب كل 10 دقائق. فبديهي الأول يستعمل كريم واقي من الشمس (صن بلوك)، والتاني بيستعمل زيت تسمير Tanning oil.

الصن بلوك أنواع وأشكال، ولكن باختصار شديد فاعلية الصن البلوك وقدرته على حمايتك من أشعة الشمس بتعتمد على حاجة اسمها معامل الحماية من الشمس – Sun Protection Factor ، واللي هي ببساطة نسبتها ملخصة في الرقم اللي بيبقى موجود على العلبة؛ وبما أننا في مصر، ننصحك أنك تختار نوع الـ SPF بتاعه عالي، وإحنا شخصيًا لاقينا كريمات وصلت لـ SPF 100، واللي هتوفر لك حماية أكبر من الأرقام الأقل. الأنواع عندك لونا –  Luna مثلًا الصن بلوك SPF 27 سعره (35 جنيه) أما الـSPF 62  سعره (60 جنيه)، وفيه نوع ثاني لا روش بوزاي – La Roche-Posay، واللي عنده مجموعة كبيرة تقدر تختار منهم درجة ثقل قوام الكريم من الأثقل للأخف، ده غير أن فيه أنواع ملونة ممكن البنات تستعملها ككريم أساس (169 جنيه)، وأسعار النوع ده مش هتخرج من (169 لـ 275 جنيه) شوف المجموعة هنا.

أما زيوت التسمير فهي العكس تمامًا، ممكن تلاقي فيهم الـ SPF يوصل لـ 15 وممكن ما يكونش فيه من الأساس علشان تاخد لون، عندك أشهر ماركة هي بانانا بوت – Banana Boat، وسعره مش هيقل عن 89 جنيه، وعندك لونا بـ 35 جنيه.

خد بالك أن الأسعار بتختلف من صيدلية للثانية بشكل كبير، أهم حاجة بس تجيب الحاجتين دول من صيدلية موثوق فيها لأن حتى الحاجات دي كمان بقى منها الأصلي والتقليد.

 

2 – مبردات / مجات حرارية:

برضه علشان فيه ناس مزاجهم حاجة ساقعة مشبرة، وناس ثانية كوباية قهوة/شاي على البحر، وطبعًا سعر كل حاجة على حسب الحجم. زجاجات حفظ المياه والحاجات الساقعة ممكن تبدأ من 35 جنيه (0.75 لتر)، ولحد 300 جنيه (45 لتر) ودول ماركتهم تانك وتقدر تلاقيهم في أي هايبر ماركت موجود في مصر.

أما لو بتحب مشروبك سخن، فأسعار المجات الحرارية اللي بتكفي شخص واحد مش هتقل عن 35 جنيه وممكن توصل لحد 500 جنيه  -ده بجد- مش هنقول لك تدفع 500 جنيه عشان تشرب قهوة على البحر، بس حاول تنقي حاجة تتقفل كويس، تعزل الحرارة عن إيدك وفي نفس الوقت تحافظ على مشروبك سخن لمدة طويل. شوف هنا، وعند أي فرع من فروع تيوليب – Tulipe.

 

3 – شنطة بحر:

للبنات فيه مجموعة من شنط البحر اللي عجبتنا جدًا أون لاين على صفحة Seashell Egypt، واللي أسعارهم كالآتي: الشنط الخوص سعرهم غالبًا بيبقى 260، والقماش 280 جنيه والاثنين بيمتازوا بحجمهم المثالي اللي بيلم أي حاجة أنت محتاجاها. ولو أنت بتحبي الشنط اللي بتتشال على الضهر ممكن تلاقي في ناس – Nas مجموعة مش بتخرج أسعارها عن 300 – 375 جنيه، بصي عليهم هنا.

مش قادرين نعرف ليه الأسماء المحلية مش منزلة شنط للشباب، لكن ده ما يمنعش أنك ممكن تلاقي في زارا – Zara  بـ 399 لحد 599 جنيه، أو بول أند بير وسعرهم أحسن شوية –من أول 139 جنيه وأنت طالع.  

 

4- فوط أو بشاكير:

ما فيش شط من غير بحر، وما فيش بحر من غير غطس عالماشي، وما دام فيه غطس يبقى لازم يبقى فيه بشاكير. كومفورت هوم كوليكشن  –  Comfort Home Collection  هتلاقي عنده المفيد؛ الوسط  100×50 سم بـ 98 جنيه، أما البشكير الكبير فبـ 193 جنيه وحجمه 140×70 جنيه ومتوفر منهم ألوان كثيرة، بص هنا.  

وفيه في نفرتاري – Nefertari  مجموعة الوسط منها بـ 40 جنيه، والأكبر 104 جنيه، وده على حسب آخر زيارة لنا.

 

5-  الشبشب:

مجموعة الشباشب الموجودة على Flipflops Egypt، واللي تقدر تشتري من مجموعتهم الكبيرة أون لاين. هتلاقي على موقعهم الإلكتروني مجموعة كبيرة من الشباشب البرازيلي ماركات جريندا، أيبانما وأزاليا، والأسعار بتبدأ من 99 جنيه وأنت طالع . المجموعة الموجودة هناك كبيرة ومناسبة لجميع الأعمار سواء الحريمي أو الرجالي.