The Definitive Guide to Living in the Capital , Cairo , Egypt

8 صفحات على الفيسبوك لمنتجات هاند ميد تنفع هدايا مميزة

8 صفحات على الفيسبوك لمنتجات هاند ميد تنفع هدايا مميزة
written by
Nagla Ashraf

كل إنسان جواه مواهب مدفونة وقدرات خاصة جدًا محتاج أنه يكتشفها، فيه ناس اكتشفت ده وأبدعت حاجات جميلة، وفيه ناس لسه بتكتشف، ومن ضمن الناس اللي اكتشفت هي  بتحب تعمل إيه ونجحت أنها تحول الحاجة دي لمشروع مستقل يجيب لها فلوس 8 صفحات على الفيسبوك لناس مختلفة جمعهم أنهم عرفوا قدراتهم وسعوا بكل قوتهم لتحويل الموهبة دي لعمل قوي يشوف النور ويسعد غيره.

 

Little Miss Crafts

المكان ده مثال حي أنك بموهبتك تقدر تسعد غيرك بأنك تعمل حاجات صغيرة جميلة مبهجة من أول الماج اللي يبقى عليه صورة درويش أو باندا معمولة بعجينة السيراميك، لغاية أشكال ميداليات مختلفة عمرك ما هتشوف زيها على أشكال شخصيات كارتون زي المنيونز أو دباديب مضحكة أو عروسة كرومبة بتاعة زمان.. فاكرينها؟

 

Knottellaa

بدأتها سيدة وأم  بتحب العرايس جدًا وبتعرف تطرزها، وهى نوع عرايس اسمها Amigurumi Dolls لدرجة أنك لما هتشوف عرايسها اللي من ؟؟ مش هتصدق دقة التفاصيل، من الشعر للعيون للوش اللي بيعبر عن جمال الشخصية اللي عملت العرايس دي، وتنفع هدايا للكبار والصغيرين.

 

Batro puppets

كثير بنشوف العرايس الماريونت ونبقى نفسنا نعرف هي معمولة إزاي، أو نشوف شخصيات بتمثل ناس في مجتمعنا ومن ثقافتنا بينشروا البهجة والحاجات الحلوة، وده اللي بتعمله سارة البطراوى فى باطرو بابيتس اللي بتعمل عرايسها بنفسها من الألف للياء، وممكن تعمل لك عروسة خاصة بالشكل اللي تحبه سواء Look alike أو شكل جديد أو شخصية مشهورة.

 

Ree For Handmade & Personalized Greeting Cards

أما لو عاوزين تشتروا كروت مبتكرة بأشكال مختلفة ومفرحة، الصفحة دي عندها أشكال كتيرة ومتنوعة جدًا، لدرجة أنك هتحتار تختار إيه، وممكن تختار التصميم اللي يناسبك، أو تطلب الشكل اللي تحبه.

 

Sadu

انتشرت في الفترة الأخيرة الشنط المزخرفة الجميلة الملونة، واللي فيه منها بتتلبس بالورب أو على الظهر أو بأيد واحدة، وكل ده موجود بتصميمات مبتكرة وأسعار معقولة عند سادو.

 

Cactus Crafts

أما لو بتحبوا الأجندات البسيطة اللي مليانة ألوان وحركات وأفكار مجنونة بحيث أن اللي بيتكتب فيها يبقى بيعبر عنك أو عن الأفكار اللي بتمثلك من جمال وتفاؤل في الحياة، ألوان كاكتوس هتناسبك أكيد.

 

Tombokka

دول بقى متنوعين جدًا لأنهم بيعملوا تصميم واحد ممكن تاخده أو تطبعه على أكثر من حاجة: تي شيرت، أو ماج، أو حتى مخدة صغيرة، وطبعًا تصميماتهم مختلفة ومتنوعة، وكل فترة بيعملوا تخفيض في المناسبات، وبرضه تقدر تعمل تصميمك الخاص.

 

Kaprun

دول بقى مثال حي أن الصوف ده منتج مبهج ممكن تعمل منه كل اللي أنت عاوزه علشان يدفيك بشكل شيك وأنيق في الشتاء، مش بس هتلاقي عندهم كوفيات وتصميمات للبس حلو، دول كمان بـ يصمموا Coffee Holder من الصوف وللماج كمان.

 

دائمًا الأحلام بتبقى صعبة في بدايتها بس بالتصميم على تحقيقها وتوفيق ربنا بتحصل المعجزات، ثقوا في أحلامكم وما تضيعوش فرصة تحقيقها.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح