The Definitive Guide to Living in the Capital , Cairo , Egypt

الصورة الرئيسية: engin akyurt on Unsplash

من سنة 2020، ومهرجان القاهرة للتمور بقى طقس سنوي أساسي ما ينفعش نفوتّه، خصوصاً إنه دايمًا بييجي في التوقيت المثالي قبل شهر رمضان المبارك، السنة دي المهرجان راجع في نسخته السادسة ومجهز مفاجآت كتير لعشاق التمور والتجار وفرص هايلة للي بيحبوا يجربوا أنواع جديدة من بلاد مختلفة، في السطور الجاية كايرو 360 هتقولك كل التفاصيل اللي محتاجين تعرفوها قبل ما تزوروا المهرجان.

إيه اللي مستنيك في المهرجان؟

المهرجان السنة دي مش بس “بلح”، ده تجربة كاملة. هتلاقي مشاركات متميزة من “أسوان، الوادي الجديد، والواحات”، بالإضافة لأقسام خاصة بتمور “السودان، ليبيا، والأردن” والمعروضات بتوصل لأكتر من 70 صنف، أشهرهم طبعاً “المجدول”.

مش بس كده، المعرض بيقدم حاجات تانية كتير، ركن ياميش رمضان واللي فيه “مكسرات، فواكه مجففة، قمر الدين”، منتجات التمر التحويلية “سكر التمر، خل التمر، الكوكيز، والمعمول”، الحلو والحادق: “شيكولاتة دبي”، والقهوة العربي اللي تظبط الدماغ.

معرض خيرات رمضان اللي هتلقوا فيه كل السلع الغذائية اللي هتحتاجوها لشهر الصيام، وعشان التجربة تكمل، المهرجان عامل برنامج ثقافي وترفيهي، ورش عمل لتطوير زراعة النخيل للمهتمين بالتجارة، ومسابقات للزوار.

الموعد والتذاكر

المهرجان هيبدأ يوم 4 فبراير ويستمر لحد 9 فبراير 2026، ومتاح للزيارة يومياً من الساعة 10 صباحاً ولحد 9 مساءً، وتذكرة الدخول بـ 20 جنيه بس، والمميز إنها بتشمل زيارة كاملة لكل المتاحف الداخلية جوه المتحف الزراعي (فرصة تتفسح وتشتري في نفس الوقت).

إزاي أروح مهرجان التمور؟

زي ما وضحنا أن المهرجان هيكون في المتحف الزراعي بالدقي، ولو معاكم عربية المتحف في شارع المتحف الزراعي بالدقي، قريب جداً من كوبري الدقي (اتجاه شارع البطل أحمد عبد العزيز). والميزة إن فيه “ركنة” متوفرة قدام المتحف وكمان جواه، ولو جايين مواصلات، أي مواصلة بتعدي من شارع البطل أحمد عبد العزيز هتنزلّكم قدام شارع المتحف على طول.

أما لو جايين بالمترو: انزلوا محطة “الدقي”، وهتمشوا حوالي 8 دقايق بس من تحت الكوبري لحد ما توصلوا لبوابة المتحف.

نصائح “كايرو 360” لزيارة مميزة

عشان تطلعوا بأكبر استفادة وتنبسطوا من غير تعب، جمعنا لكم الخلاصة لزيارة مهرجان التمور 2026، أول حاجة حددوا الهدف من الزيارة، لأن الأنواع كتير جداً ومغرية، اكتبوا  في ورقة محتاجين إيه وبكميات قد إيه عشان الميزانية ما تفتحش منكم، وخدوا لفة الأول  وماتشتروش من أول بائع يقابلكم،  لفوا على العارضين، دوقوا المنتجات  (Test)، وقارنوا الأسعار والجودة، وبعدين قرروا.

البسوا خفيف، لأن المشي واللف هياخد وقت ومجهود، فبلاش لبس تقيل زيادة عن اللزوم عشان ما تحروش، ويفضل طبعاً “كوتشي” مريح.

اعملوا حسابكم وخدوا معاكم مياه وسناكس خفيفة (أو استمتع بتذوق عينات التمور والمكسرات هناك).

نتمنى لكم خروجة مميزة وتجهيزات رمضان سعيدة، ومستنيين تقولوا لنا في التعليقات إيه أكتر نوع تمر عجبكم هناك.