The Definitive Guide to Living in the Capital , Cairo , Egypt

المسلسلات أصبحت علامة من علامات شهر رمضان، وكمية المسلسلات اللي بيتم تقديمها في الشهر ده تقريبًا بتكفي المشاهدين لحد رمضان القادم!

علشان كده قررنا النهارده نختار لكم أفضل 5 بروموهات لمسلسلات رمضان، والحقيقة قبل ما نحكي لكم عن البروموهات نحب نقول لكم أن صناعة البرومو فن أصيل بحد ذاته، ما يقلش أهمية عن صناعة المسلسل أو الفيلم نفسه! والنهارده في هوليود بنشوف شركات كاملة متخصصة فقط في إنتاج بروموهات قوية ومؤثرة.

الأمر الصعب في صناعة البرومو هو أنك -كصانع بروموهات- مطالب في حوالي دقيقة أنك تقدم ماده تجذب المشاهد وتجبره على متابعة المسلسل أو العمل السينمائي، ودي مهمة صعبة ومش سهلة زي ما بيبدو للناس.

دلوقتي مع أفضل بروموهات مسلسلات رمضان مرتبة من الأقل جودة للأعلى حسب رأينا، ونحب نسمع منكم في التعليقات رأيكم أنتم.

 

5. القيصر

مسلسل يوسف الشريف السنوي اللي بنستناه وبنتراهن مع بعض على سياق أحداثه.. يوسف قدر يخلق لنفسه منطقة جديدة من الأعمال الدرامية قائمة على التشويق والإثارة والأكشن، وألعاب الذكاء والتشويق واللي بتستمر من المشهد الأول للحلقة الأولى وحتى نهاية المسلسل، بدأ يوسف مع (رقم مجهول) لحد ما وصل لمسلسل العام الماضي (لعبة أبليس)، كل مسلسلاته مبنية على الأكشن والتشويق والمغامرة.

على الرغم من كل اللي قولناه إلا أن برومو مسلسل (القيصر) فى رأينا هو الأضعف من بروموهات مسلسلات رمضان، لاهتمام صناعه بمشاهد الأكشن السريعة والمتلاحقة بدون أي تركيز على الأحداث نفسها أو الخيوط الدرامية اللي بتجمعها، يعني إيه اللي فهمناه أو خرجنا بيه من برومو (القيصر)؟ لا شيء! مجرد أشخاص بتضرب بعض ومشاهد قتال يدوي.. ناهيك عن أن إخراج المشاهد دي كان سريع جدًا لدرجة إننا أحيانًا ما كناش بنقدر نفهم إيه اللي بيحصل بالضبط!

 

4. بنات سوبرمان

من الأكشن للكوميديا.. برومو مسلسل بنات سوبرمان كان فيه أكتر من ميزة، أولًا أنه بيعرفنا الخيط الرئيسي للأحداث، وهو عن مجموعة من البنات عندهم قدرات خارقة، وفي نفس الوقت المسلسل بيعرفنا بالتيمة الرئيسية له: الكوميديا المُطلقة، لكن نعيب على البرومو كثرة استخدام الإيفيهات خاصة إيفيه (أقسم بالله ما ولادي) واللي بنعتبره إيفيه مش ظريف خاصة أنه مرتبط بقضية نسب، شيء مش كوميدي خالص الصراحة!

برومو بنات سوبرمان مانساش يسيب لنا (تكة) تشويق، لما هتشوفوا البرومو أكيد هتسألوا نفسكم إيه هي ياترى القدرة الخارقة اللي بتتمتع بيها شيري عادل؟ إحنا كمان بنسأل نفس السؤال.

 

3.المغني

في المرتبة التالتة بنستريح شوية من الأكشن والكوميديا وبننتقل للطرب، قصة حياة المطرب المتميز محمد منير في مسلسل رمضاني، التوليفة دي أكيد هتكون ناجحة ومؤثرة، برومو المسلسل كان بيضرب على الحديد وهو سخن، وعارف بالضبط نقطة قوة المسلسل وبيلعب عليها، البرومو كان مختصر وبيوصل تقريبًا رسالة واحدة : إحنا جايبين محمد منير في أول مسلسل له في حياته الفنية اللي تنوعت بين الغناء والتمثيل، علشان كده البرومو ركز على ظهور محمد منير وغناؤه… وإحنا بنعتبر ده نوع من التركيز في توصيل رسالة البرومو للمسلسل، علشان كده يستحق المركز الثالث.

 

2. سقوط حر

في المركز الثاني بنشوف مسلسل نيللي كريم، اللي قدرت -زي يوسف الشريف- تخلق لنفسها منطقة من التمثيل وفريق عمل متميز بيقدم قضايا نسوية بالمقام الأول، شوفناها قبل كده في سجن النسا اللي كان بيقدم قصص عن سيدات سجينات، بعد كده شوفناها في تحت السيطرة اللي اقتحمت فيه عالم الإدمان والمخدرات بشكل جديد ومتميز.

في مسلسلها الجديد اعتمد البرومو على فكرة التشويق للحد الأقصى، مشاهد متقطعة بتقول لنا بعض تفاصيل القصة، لكن في نفس الوقت مش بتقول لنا كل حاجة علشان نفضل على نار لحد ليلة أول يوم في رمضان مع بداية عرض المسلسل، البرومو ده مثال على فكرة التشويق للمنتهي و(جر رجل) المشاهد وإجباره على مشاهدة المسلسل علشان يعرف إيه اللي هيحصل.

 

1.ونوس

المركز الأول وبلا منازع بيحتله العبقري يحيى الفخراني، واللي بنعتبره أفضل ممثل في مصر حاليًا، والحقيقة أن برومو مسلسل ونوس لا يقل عبقرية عن بطل المسلسل نفسه، لأن البرومو لعب على جانب التشويق إلى الحد الأقصى، وقدر يعمل أكتر من نقلة فى زمن قصير جدًا.. بحيث نبدأ نشغل مخنا ونفكر هو إيه بالضبط اللي هيقدمه الفخراني السنة دي؟ هل مجرد مسلسل عن أسرة مصرية عادية؟ ولا هياخدنا في رحلة لعالم المنشدين وأهل الخطوة؟ ولا بيحكي عن قصة غواية (إبليس) لبني أدم عادي؟ كل جملة في البرومو كانت محسوبة، وكل مشهد كان بيزود التساؤلات عندنا، في رأينا لو فيه برومو قدر يحقق 100% من أهدافه هيكون أكيد برومو مسلسل ونوس.

ده كان ترتيبنا لأفضل بروموهات مسلسلات رمضان، وكل سنة وأنتم بكل خير وسعادة.