The Definitive Guide to Living in the Capital , Cairo , Egypt

تليفزيون

أفضل وأسوأ الإعلانات المصرية في رمضان 2021

أسوأ إعلانات رمضان 2021 أفضل إعلانات رمضان 2021 إعلانات رمضان الأفضل والأسوأ في رمضان
أفضل وأسوأ الإعلانات المصرية في رمضان 2021
    بواسطة
    Cairo 360

    نقلًا عن موقع كلام القاهرة

    رمضان مش مجرد موسم دراما ومسلسلات بس، هو كمان سوق مهم للإعلانات، اللي المنافسة بينها بتكون قوية، وبنحس بوجود حرب حقيقية بين شركات الاتصالات والعقارات والبنوك وغيرهم على جذب انتباه المصريين. وبعد مرور أول أسبوع من رمضان، تعالوا نعرف أكتر إعلانات حققت تأثير ونجاح، وكمان أكتر إعلانات خسرت في المنافسة اللي كانت مليانة نجوم بدرجة غير مسبوقة.

    إعلانات حققت نجاح كبير:

    شريهان – مع بعض أقوى

    من النادر إن وسائل الإعلام سواء المحلية أو العربية تهتم بإعلان تجاري، لكن ده حصل مع إعلان شريهان أقوى من بعض، واللي وصل نجاحه لدرجة إن موقع بي بي سي عمل عنه تقرير صحفي. نقدر نقول إنه أجمل إعلان شوفناه السنة دي في رمضان، حالة فرحة وبهجة خطفت قلوبنا كلنا، شريهان وجمالها ورقصها وشعرها، كل دي عوامل خلت رجوعها للشاشة مميز جدًا.

    حسين الجسمي – رمضان في مصر حاجة تانية

    حب الجسمي لمصر باين في صوته، ودي حاجه تخلينا نحب بلدنا أكتر، ده غير شوارع مصر وهي متزوقة بالزينة والفوانيس في منظر مش هتلاقيه غير بس في مصر، ومش هننسى الطبق اللي بينتقل بين الجيران طول الشهر، إعلان معجون برمضان مصري أصلي.

    آسر يس وأمينة خليل – مشوار مكمل

    الإعلان ده خلى المرتبطبن يحبوا بعض أكتر، والسناجل حسوا إنهم عايزين يعيشوا قصة حب حالًا، وعلى صوت الفنانة شيرين عيشنا حالة رومانسية وعشق خدتنا في حتة تانية خالص.

    دينا الشربيني وروبي- فريش وفرافيش

    ميكس لذاذة وشقاوة، مش هتلاقيه في ثنائي تاني غير روبي ودينا الشربيني، مش بس كده أغنية الإعلان معلقة مع ناس كتير، والكل ماشي يغنيها، حقيقي نفسنا في ميكسات عظيمة كده الفترة الجاية.

    إيمي ودلال عبد العزيز وسمير غانم- فرحنا به

    المصرية للاتصالات حاولت اللعب على الكوميديا العائلية في رمضان، من خلال حملتها اللي جمعت الفنان سمير غانم وزوجته دلال عبد العزيز مع بنتهم إيمي، حبينا في الإعلان خفة دم الفنان الكوميدي وهو بيقلد طريقه كلام إيمي، حركة لذيذة منه، وماننساش طبعًا إن ظهور “سمور” في رمضان له طعم تاني، وبيفكرنا برمضان زمان.

    النجوم- زيد

    حملة “زد” الإعلانية نقدر نعتبرها الأضخم، بعد ما بقت المشروعات العقارية قادرة على جذب النجوم في السنوات الأخيرة، بشكل أكبر حتى قطاع الاتصالات. وبيظهر في الإعلان مجموعة كبيرة من النجوم من سكان مجمع زد السكني في الشيخ زايد والقاهرة الجديدة، وهم بيتخانقوا حوالين مين هيزور التاني.

    بيظهر في الإعلان نيللي كريم، وكريم عبد العزيز، ويسرا، ودينا الشربيني، وشيرين رضا، وكارين فهمي، وتارا عماد، وسلمى أبو ضيف، وهدى المفتي، وكمان نجوم كرة القدم زي أحمد حسام ميدو، وحازم إمام، وسيف زاهر، ومحمد زيدان، وللمرة الأولى بيختتم نجيب ساويرس الإعلان بصوته.

    إعلانات ما حققتش نجاح كبير:

    ليلى علوي – لمتنا

    الإعلان ده بقى، ناس كتير اختلفت عليه، فيه اللي فرح بظهور ليلى علوي بكل رشاقة على الشاشة، وفيه اللي شاف إنه إعلان دمه تقيل وألحن أغنيته مش ناجح، ده غير إنه مش مناسب لمنتج مكرونة، كنا نتمنى القائمين على الفكرة يقدموها بطريقة مختلفة شوية، وتكون الإغنية أجمل من كدة علشان تعلق مع الناس.

    محمود العسيلي ومدحت صالح ودياب – أنا الممكن

    ناس كتير شافت إن الإعلان متكرر، نفس الفكرة اللي بتدور حوالين التشجيع والطاقة الإيجابية، ورغم إن ده جميل لكن بنك مصر قدمه في أكتر من سنة فاتت بنفس الشكل تقريبًا، كمان تكرار ظهور العسيلي بصوته المميز في كل إعلانات البنك كان نقطة ضعف.

    حملة قطونيل

    إعلانات قطونيل لازم تعمل قلق كل سنة، بس السنة دي عملوا إعلان غريب، مليان شباب وبنات كالعادة، والعجيب إن بطلة الإعلان بتغني بالإنجليزي وكأنه إعلان أجنبي مدبلج مصري، وشوفنا إعلان تاني تبع الحملة ظهر فيه حسن شاكوش وعمر كمال ومعاهم كابتن مدحت شلبي علشان يقول جملته الشهيرة “هالله هالله على الفانلة” ويمشي!

    أحمد زاهر وبناته- مونجيني بيكمل فرحتنا

    فنانين كتير عوضوا غيابهم في رمضان بالإعلانات، ومنهم أحمد زاهر اللي مبيشاركش في أي عمل فني، بعض الناس شافت إن أدائه أوفر مع ليلي وملك حبتين، وتنفيذ الإعلان ماكنش مبهر أو فيه مجهود كبير، وحقيقي مابقيناش عارفين هو عاوز يقولنا إيه هو وبناته من خلال الإعلان. كمان شعار “بيكمل فرحتنا” مستهلك جدًا وقريب من شعارات شوفناها في إعلانات كتير السنين اللي فاتت.

    عمرو دياب – باديا

    نجح قطاع العقارات في جذب عمرو دياب اللي شارك في أغنية لحملة “باديا” بالم هيلز الإعلانية، واللي بنشوف فيها بنوتة من ضهرها وهي بتتحرك في أرجاء المجمع السكني اللي مليان بجميع وسائل الراحة والترفية. لكن الأغنية ماكنتش قوية، والتصوير بيشبه تصوير إعلانات كتير، وماحسناش إننا حبينا الإعلان أو حسينا إن لحن الأغنية معلق معانا.

    محمد صلاح – بنك الإسكندرية

    إعلانات رمضان نجحت كمان في جذب نجوم الكرة العالمية، ورغم عشقنا الكبير للكينج المصري محمد صلاح، لكننا ماحسيناش بانبهار من الإعلان اللي جمعه بزملائه في ليفربول جوردان هندرسون وأليكس أوكسلايد شامبرلين، وهو إعلان بنك الإسكندرية، واللي كان بارد ومش مبهر وماحققش أي نجاح يذكر وسط منافسة الإعلانات السنة دي.

    مقترح