The Definitive Guide to Living in the Capital , Cairo , Egypt

تليفزيون

أفضل 5 ممثلين صاعدين في مسلسلات رمضان 2018

أحمد خالد صالح أحمد داش أسماء أبو اليزيد محمود الليثي محمود حجازي مسلسلات رمضان وجوه جديدة
أفضل 5 ممثلين صاعدين في مسلسلات رمضان 2018
بواسطة
Mohamed Adly

الموسم الرمضاني كل سنة بيبقى بداية مختلفة وجديدة لعدد من الممثلين الشباب الموهوبين واللي عندهم رغبة كبيرة في إثبات حضورهم، مهما قدم الممثل أعمال خارج موسم رمضان، شغله لو كان مميز في رمضان بيحقق له نجاح كبير.

عندنا السنة دي ممثلين شباب هيكون ليهم اسم كبير في مجال التمثيل خلال السنوات اللي جاية لو قدروا يطوروا من أدائهم أكتر ويركزوا في اختيارتهم للأدوار اللي هيقدموها، ومن أهم الملاحظات في السنين الأخيرة هو ظهور صناع فن سواء سينما أو دراما أو مسرح مؤمنين بالعمل الجماعي وبيدوا فرص لشباب موهوبين، بقى فيه إيمان إن البطولة المطلقة بقت عاملة زي العربية القديمة اللي مش قادرة تنافس أو تسابق العربيات اللي أحدث منها.

آخر كام سنة معظم الأعمال اللي حققت نجاح فني وجماهيري كانت أعمال جماعية فيها أكتر من شخصية رئيسية وبتقدم أفكار وخطوط درامية متنوعة، الناس رغم حبها لعدد كبير من النجوم إلا إنهم بيميلوا للعمل المبذول فيه جهد وفيه تفكير وبيشاورا عليه وعلى صناعه حتى لو لسه شباب.

وإحنا شايفين أن الزمن ممكن يعيد نفسه تاني، وزي ما زمان تراجعت شعبية مسرح فؤاد المهندس وعبد المنعم مدبولي لصالح مسرحية مدرسة المشاغبين اللي بيقدمها شباب جداد وقتها، ممكن أوي نشوف الفترة الجاية تراجع واضح لنجوم كتير لصالح العمل الجماعي والفنانين الشباب.

المركز الخامس: أحمد خالد صالح – مسلسل نسر الصعيد

قليل لما تلاقي ممثل منور في مسلسل بيقدمه محمد رمضان، لأنه ببساطة مسيطر جدًا، لكن الملفت هنا ظهور الممثل الشاب أحمد خالد صالح اللي مقدم دور ظابط قوات مسلحة بشكل ملفت، أحمد خالد صالح هو ابن واحد من أهم وأقوى ممثلي السينما والدراما المصرية، الفنان الراحل خالد صالح، بدء تمثيل من مدة قليلة وقدم السنة اللي فاتت شخصية أخو آسر ياسين في مسلسل 30 يوم ومن المتوقع نشوفه الفترة الجاية في أعمال أكتر، أحمد خالد صالح خريج الجامعة الأمريكية وقدم عدد من المسرحيات في مسرح الجامعة.

المركز الرابع: أسماء أبو اليزيد – مسلسل ليالي أوجيني

 

من وقت ظهورها السنة اللي فاتت وهي واضح إن رغم صغر سنها تمتلك موهبة كبيرة، ظهر ده في دور “تقى” السنة اللي فاتت في مسلسل هذا المساء، وكمان السنة دي بتقدم دور المطربة “جليلة” اللي بتغني في تياترو أوجيني وبتدور على الشهرة ومقابل ده سابت بيت أهلها  اللي من الصعيد وسافرت بورسعيد تدور على حلمها.

الشخصية ليها أبعاد كتير أهمها حالة الصراع الداخلي اللي بتعاني منه الشخصية ومحاولتها الدائمة لإخفاء الحزن النابع من مشاكلها مع خطيبها ومع أهلها في الضحكة على المسرح والغنى، والجميل كمان إن أسماء بتكشف عن موهبتها في الغناء لما قدمت الأغاني في مسلسل ليالي أوجيني بصوتها وده اللي عجب الجمهور السنة دي.

أسماء اتخرجت من كلية الفنون الجميلة، وشاركت فى عدد كبير من العروض المسرحية منها مسرحية “خلطة السعادة السحرية” اللي اتعرضت على مسرح الهناجر ونجحت وقتها جدًا.

المركز الثالث: محمود حجازي –  مسلسل عوالم خفية

 

آخر سنتين محمود حجازي قدر يقدم أدوار في أعمال كان ليها حظ كبير من المشاهدة بالإضافة إلى أنه قدم أدوار متنوعة في كل عمل فيهم، ماتلاقيش ليه دور شبه التاني، وده من أهم أسباب وجوده معانا في الترتيب،  نجح قبل رمضان حجازي في مسلسل “أبو العروسة” لكن النجاح في رمضان وكمان في مسلسل لعادل إمام له طعم تاني مختلف، بيقدم حجازي شخصية “عصام” مدرس الكيميا اللي بيتحرش بالطالبات عنده، محمود حجازي ليه أكتر من عمل بيشارك فيه السنة دي زي مسلسل أبو عمر المصري لكن دوره في  مسلسل “عوالم خفية” لاقى رد فعل كبير عند الناس، محمود حجازي خريج المعهد العالي للفنون المسرحية.

المركز الثاني: محمود الليثي – مسلسل أبو عمر المصري

 

رغم سنه ومشواره اللي لسه بيبدأ، إلا أن الممثل الشاب محمود الليثي قدر يصنع لنفسه شخصية وشكل سواء في الكوميدية اللي قدمها واتشهر بيها من خلال برنامج SNL بالعربي، أو حتى دوره السنة اللي فاتت في مسلسل “حتى لا تطفيء الشمس” ، المختلف السنة دي إن الليثي بيقدم دور بعيد عن الكوميدية.

ورغم إن ده تحدي بيخاف منه نجوم كبار وبيقدموا الحاجة اللي ناجحين فيها بس، إلا إن الليثي نجح وأثبت نفسه كممثل يقدر يقدم أي لون مش بس الكوميدية والضحك، محمود الليثي بيقدم في مسلسل ” أبو عمر المصري”  شخصية سيد أبو الخير، الصحفي الوصولي الانتهازي اللي كان صديق البطل من أيام الجامعة وفجأة ظهر في حياته تاني وبدأ يلاحقه علشان يعرف تفاصيل القضية اللي متورط فيها.

الليثي خريج كلية الهندسة جامعة قناة السويس ودرس التمثيل والارتجال في مركز الإبداع الفني بدار الأوبرا تحت إشراف المخرج خالد جلال.

المركز الأول: أحمد داش – مسلسل طايع

 

إحنا أمام حالة مختلفة، ممثل عمره 18 سنة تفوق السنة دي على عدد كبير من الفنانين اللي ضعف عمره ومعظم السوشيال ميديا بتتكلم عنه وبتشيد بدوره وبالمجهود اللي قدمه في مسلسل “طايع”، أحمد داش هو اكتشاف المخرج عمرو سلامة اللي قدمه في فيلم “لامؤخذة”، نجح بعدها وقدم أدوار كتير مناسبة لسنه.

لكن السنة دي داش بيقدم دور فيه حاجتين أصعب من بعض، وده اللي خلاه يكون في المركز الأول، أول حاجة هي اللهجة الصعيدية اللي أتقنها وقدمها كأنه متربي في صعيد مصر، تاني حاجة هو المجهود البدني على شاب في عمره خصوصًا إن تصوير المسلسل معظمه في صحرا وفيه تصوير في أماكن ضيقة زي المقابر الفرعونية وده مجهود كبير يحسب له، داش أثبت إن الموهبة مش كفاية لكن لازم تشتغل عليها وتطورها وده اللي عمله بمساعدة المخرج عمرو سلامة.

مقترح