The Definitive Guide to Living in the Capital , Cairo , Egypt

تليفزيون -

إعلانات وبرامج رمضان 2016: إمسك حرامي

إعلانات وبرامج رمضان 2016: إمسك حرامي
بواسطة
Omar Mossad

رمضان من فترة مش قليلة بقى موسم التليفيزيون بامتياز.. البرامج، والمسلسلات، ومؤخرًا كمان الإعلانات دخلت عالخط.. وبيقولوا دايمًا أن التاجر الشاطر هو اللي يحضر للموسم كويس علشان يطلع منه بأكبر فايدة.. لكن واضح أن أصحاب سوق التليفزيون في رمضان لسه مابيفتكروش يذاكروا غير ليلة الامتحان.. فبيضطروا وقت الامتحان يغشوا وينقشوا !

هنعدي معاكم كده على نماذج مختلفة من كل المنتجات التليفزيونية في رمضان السنادي علشان نفهمكم قصدنا إيه بالكلام اللي قلناه ده.. لما نلاقي أنه بعض المنتجات دي منقوشة بأدق تفاصيلها من منتجات أجنبية مختلفة، لدرجة أنه البرنس دلوقتي بقى اللي يروح ياخد الفكرة بس من حد ويطبقها بشكل مختلف شوية.. إنما أننا نلاقي حاجة من أولها لآخرها أوريجينال مش متقلدة دي بقت حاجة نادرة جدًا جدًا في الوسط الفني والإعلاني المصري الكسول!

هاني في الأدغال
برنامج المقالب اللي بيقدمه الفنان هاني رمزي واضح أنه مقلوب عالآخر ومتحضر في الوقت الضايع يعني.. لكن ما علينا، كله كوم وفيديو تتر البرنامج اللي متاخد بكل تفاصيله من كليب أغنية "Roar" لـ "Katty Perry" كوم تاني خالص!
الموضوع تعدى مرحلة أخد الفكرة أو تقليد بعض المشاهد لمرحلة أصعب من كده بكتير.. أنت هتحس وأنت بتقارن بين الفيديوهين أن اللي عملوا التتر أخدوا الفيديو كليب بتاع الأغنية ولعبوا فيه بشوية برامج وشالوا "كاتي بيري" وحطوا مكانها "هاني رمزي" وهوبا يللا نبيع!

جهينة والدوندو

بعد ما كل الناس اتكلمت على الحوارات اللي دايرة بين الأطفال الصغيرين في مجموعة إعلانات جهينة السنادي وأد إيه هي سخيفة أصلًا جنب مشكلتنا الأخلاقية معاها ومتنفذة بشكل غير احترافي بالمرة.. بعد كل ده كمان تطلع الفكرة مش أصلية ومتاخدة كوبي-بيست من مجموعة فيديوهات "Top E-Trade baby Commercials" مع فارق كبير جدًا في جودة التنفيذ لصالح الفيديوهات دي طبعًا.. يعني لا محتوى ولا تنفيذ ولا أصالة، طب إيه طيب؟

 

رامز بيلعب بالنار
هو رامز مش بيلعب بالنار الحقيقة أد ماهو بيلعب بدماغاتنا! .. مش كفاية عليه أنه بقى بيكرر نفسه بشكل مزعج جدًا وأنه برامجه دايمًا بيكون فيها غشومية زايدة مع ضحاياه؛ لأ كمان بعد الميزانية الضخمة للإنتاج نلاقي العمل مايطلعش أصلي بالكامل، ونلاقي لحن تتر النهاية منحوت النحتة التمام من الأغنية الهندية "World Dance Medley" في فيلم "Happy New year" ومن الجزء اللي غناه الفنان الهندي الشهير "شاروخان" تحديدًا.. وبعدين معاك يا رامز؟

 

إعلان مان لوك
هو الإعلان ده أصلًا مانعرفش اللي قرر أنه كده تمام ويللا ننشره على كده، ده كان راضي عنه وعن نفسه ازاي! .. الإخراج غريب والفكرة مالهاش علاقة بالمنتج وحاجة جميلة عالآخر يعني، ولما هنقولكم أنه متاخد من إعلان قديم لـ "Nike" هنقولهالكم واحنا مش مصدقين نفسنا أوي يعني الحقيقة.. لأنه مافيش أي مقارنة في الجودة بين الإعلانين رغم الفرق الزمني الكبير بينهم واللي المفروض يكون في صالح الإعلان الجديد وأنه يتعمل بصورة أفضل وكده.. لكن لأ، المصري معروف بجبروته زي ما بيقولوا !

 

إعلان مؤسسة مجدي يعقوب
يعني الحال هنا أخف بكتير من بقية النماذج اللي عرضناها الحقيقة، لأنه الموضوع لم يتعدى أخد فكرة الإخراج بس والشغل عليها واللعب فيها علشان يطلع منتج مناسب للحالة المطلوبة، وده يخلينا نتسامح يعني مع الموضوع بالإضافة إلى أنه الإعلان نجح في أنه يوصل رسالته بشكل كويس ونضيف.. فكرة الإخراج متاخدة من الكليب الإنجليزي اللي أنتجته بي بي سي ميوزيك: "God Only Knows".

مقترح