بيومي فؤاد: جوكر دراما رمضان وأفلام العيد
Mohamed Hamdy
"حالة من السخرية والجدل" يمكن يكون ده الوصف الوحيد المناسب للحالة اللي أثارها الظهور المتعدد للفنان بيومي فؤاد فى عدد كبير من المسلسلات فى سباق رمضان 2016، ويمكن اللى زاد وغطي أن بيومي ماظهرش بس فى المسلسلات، أيضًا ظهر في برامج المقالب والإعلانات، وده جعل بعض الناس تحس أنها محاصرة ببيومي فؤاد.
بيومي مين؟!
بيومي فؤاد هو ممثل مصري، من مواليد القاهرة سنة 1965. تخرج ضمن الدفعة الأولى لمركز الإبداع الفني، قسم إخراج، بدأ العمل سينمائيًا بأدوار صغيرة في أفلام منها: إحكي يا شهر زاد، 678، وأسماء. بالإضافة إلى أعمال تليفزيونية، زي: (أبواب الخوف) 2011، (رقم مجهول) 2012، و(اسم مؤقت) 2013. زادت شهرته مع مشاركته في مسلسل (الكبير قوي) بأجزائه الأربعة 2010: 2014. وحقق نجاح كبير عام 2013 بمشاركته في مسلسل (موجة حارة).
ممكن ده يكون الكلام الرسمي عن بيومي فؤاد، لكن الكلام اللي بيقوله زملاؤه فى الوسط الفني، هو إنه فنان مجتهد إلي أقصي درجة، ومن خلفية مسرحية –يعني بدأ حياته الفنية فى المسرح وده يعتبر ميزة كبيرة- وإنه كان فى البداية فنان تشكيلي، ولسه محافظ على حبه للفن التشكيلي.
بيومي فين؟!
لو حاولنا نحصر الأعمال الفنية اللى بيظهر فيها فؤاد فى رمضان الحالي، يكفي إننا نقول أنه ظهر فى أعمال "رأس الغول"، "الميزان"، "نيللي وشريهان"، "هي ودافنشي"، "شهادة ميلاد"، "بنات سوبر مان"، "الكيف"،"أنا وبابا وماما"، و"صد رد". بالإضافة لبرامج المقالب زي رامز بيلعب بالنار ومجموعة من الإعلانات كان أبرزها إعلان شيكولاته ماندولين والمبادرة المصرية لترشيد استهلاك الوقود والمبادرة المصرية ضد الفساد.
بيومي نفسه بيقول أن ماكانش عنده الوقت الكافي لمشاهدة أسرته، ابنه كتب على الفيس بوك أنه شاف بيومي فؤاد فى التليفزيون أكتر ما شافه في البيت! أما حفلات السخرية والمرح اللى قامت على مواقع التواصل الاجتماعي فكانت حالة من الهرج والمرج، منها بعض التعليقات المرحة زي تعليق "الشيء الزيادة اللي كان المفروض يقدمه بيومي فؤاد هو أذان المغرب"
التعليق الوحيد اللى ضايق بيومي فؤاد وخلاه يزعل من صاحبه هو التعليقات السخيفة اللي قالها رامز جلال في مقدمة برنامجه (رامز بيلعب بالنار) عن بيومي فؤاد، وسخريته من وزنه الزائد وملابسه الداخلية وحاجات كتير وصفها بيومي فؤاد إنها (خيانة) لأن الجزء ده من البرنامج بيتصور بعد المقلب، والضيف مش بيعرف عنه حاجة.
بيومي ليه؟!
البعض بيقول أن السبب فى ظهور بيومي فؤاد في معظم أعمال دراما رمضان هو أن أجره قليل، لكن فى رأينا أن ده مش صحيح، لأن بيومي حقق نجاح كبير في رمضان الماضي، ويبدو أنه عمل حساباته بشكل صحيح وفكر أنه حاليًا فى مرحلة إنتشار وتحقيق قاعدة جماهيرية كبيرة يقدر يستند عليها في المستقبل.
كمان لازم نقول أن بيومي قدر يقدم كل دور من أدواره بشكل مختلف عن الدور الآخر، والحقيقة إننا بنشوف فنانين كبار بيحصروا نفسهم في نوعية أدوار واحدة مهما قلت مشاركاتهم أو زادت، لكن بيومي قدر يثبت أنه قدر ينتقل من التراجيديا للكوميديا وكل الألوان النفسية بينهما بمجرد قرار صغير منه، وقدر يقدم ألف وجه ووجه في رمضان 2016 بشكل يحسب له، ويكفي أن المشاهدين بيشوفوا بيومي في معظم أعمال السنة، بدون شعور منهم ناحيته بالملل أو الغضب من ظهوره المتكرر.
بيومي على فين؟!
وعلشان ماحدش يستغرب، لازم ننوه من دلوقتي ونقول أن بيومي فؤاد هيشارك السنة دي فى معظم أفلام موسم عيد الفطر، علشان الناس ما تستغربش من ظهوره فى رمضان والعيد على التوالي، وقدرنا نرصد ظهور بيومي فؤاد في أفلام (سطو مثلث) و(جحيم في الهند) و(أبو شنب) و(عسل أبيض)، وده بيفتح أمامنا سؤال أخير فضلنا نختتم به كلامنا عن بيومي فؤاد : هل إحنا بنشهد مرحلة انتشار فني لنجم واعد، أم ان الموضوع تحول لخلق ظاهرة سينمائية جديدة مشابهة لظاهرة (حسن حسني)؟ هنعرف الإجابة بعد نهاية موسم عيد الفطر المبارك… لما نشوف مستوى الأفلام.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
