The Definitive Guide to Living in the Capital , Cairo , Egypt

تليفزيون

“رحيم” مش هيرحم حد.. ولا حتى المشاهدين!

رحيم رمضان 2018 ظل الرئيس محمد إسماعيل أمين محمد رياض محمد سلامة مسلسلات نقد ياسر جلال
“رحيم” مش هيرحم حد.. ولا حتى المشاهدين!
    بواسطة
    Mohamed Hamdy

    من فترة قصيرة الناقد محمد عدلي كتب على كايرو 360 موضوع عن مسلسل رحيم، تقدروا تتابعوه من اللينك ده.. لكن فيه وجهة نظر تانية للناقد محمد حمدي، هنعرضها لكم في السطور الجاية.

    من الواضح أن الأكشن قدر يسيطر على الأجواء في رمضان، والدليل هو مجموعة من المسلسلات اللي كلها لها علاقة بالأكشن والحركة واللي بنشوفها مؤخرًا، وكلها حققت نجاح بشكل ما وبقى يتابعها عدد ضخم من المصريين.

    رحيم واحد من المسلسلات اللي استغلت النجاح الكبير اللي حققه النجم ياسر جلال في رمضان الماضي من خلال مسلسله (ظل الرئيس)، لكن هل قدر ياسر جلال يقدم نفس الأداء اللي قدمه في مسلسل العام الماضي؟

    الأجابة المختصرة على السؤال ده هي “أيوة قدر” . أما الإجابة الطويلة فهي أن ياسر جلال بيحصد حاليًا نتيجة وقت وجهد كبير قضاه في الشغل على نفسه واختيار أدواره بعناية، ومحاولة الخروج من فخ الدور الواحد واللي وقع فيه بعد دوره في مسلسل لن أعيش في جلباب أبي. وقد ياسر يحقق المعادلة الصعبة ويتخصص في سلسلة جديدة من الأدوار المختلفة عن أدواره السابقة.

    مسلسل رحيم من إخراج محمد سلامة وهو أول عمل درامي طويل يقوم بإخراجه. ومن الواضح أن سلامة عاوز يثبت نفسه من البداية ويحدد طريق طويل وصعب علشان يمشي فيه لكنه طريق بيمشي فيه المخرجين المتميزين. محمد من نوعية المخرجين المركزين في شغلهم جدًا وبيدي مساحة للجميع يتعاونوا معاه – من غير ما يفرضوا رأيهم عليه- وده واضح في الصورة اللي أخرجها في المسلسل، ومن الواضح الكيمياء الكبيرة بينه وبين ياسر جلال وإصرار الأتنين على الإخلاص في شغلهم بشكل قوي. حتى أن ياسر أصر على تصوير أحد المشاهد الصعبة بنفسه وكان هيتعرض لأذى كبير.

    على الرغم من جمال نور وقدرتها على الاحتفاظ بالجمال ده لفترة طويلة، لكنها محتاجة تطور أدواتها التمثيلية بشكل أفضل علشان تقدم أدوار أكتر اقناعًا للمشاهدين.

    لازم نأكد على كفاءة محمد رياض.. الفنان اللي بيثبت يوم بعد يوم قدراته غير العادية على أداء أي شخصية تطلب منه بكفاءة منقطعة النظير.

    مؤلف مسلسل رحيم هو محمد إسماعيل أمين وهو أيضًا مؤلف مسلسل ظل الرئيس. ومن الواضح أن طريقته في الكتابة بتعجب فريق العمل ومن الواضح أنه قادر يهتم بتفاصيل المسلسل وطبعًا من الواضح أن القصة عاجبة الجمهور بدليل الاهتمام الكبير بكل حلقة على السوشيال ميديا.

    رحيم مش أحسن عمل في رمضان. لكنه مسلسل بيأكد على قدرة وكفاءة ياسر جلال كممثل وعلى شطارة محمد سلامه كمخرج وتفرد محمد إسماعيل أمين كمؤلف. وننتظر في المستقبل تعاون أكبر بين الفريق ده.

    مقترح