The Definitive Guide to Living in the Capital , Cairo , Egypt

تليفزيون

مش هتقدر تنزل من البيت.. دليلك الكامل لمسلسلات رمضان 2020

أمير كرارة تليفزيون دراما رمضان 2020 عادل إمام محمد رمضان مسلسلات مسلسلات رمضان 2020 نادية الجندي يسرا
مش هتقدر تنزل من البيت.. دليلك الكامل لمسلسلات رمضان 2020
    بواسطة
    Mohamed Talaat

    الأزمة الحالية اللي بيعاني منها العالم، واللي بتتمثل في فيروس “كورونا” المستجد، أجبرتنا كلنا على القعدة في البيت لحماية نفسنا وبلدنا من انتشار الفيروس، وخلال أيام هيهل علينا شهر رمضان، اللي أصبح موسم المسلسلات الجديدة لأهم نجوم مصر والعالم العربي.

    وفي السطور الجاية هنقول لكم على الخريطة الكاملة لمسلسلات رمضان 2020، واللي تم الإعلان رسميًا عن عرضها، ودي فرصة كبيرة علشان تقعدوا في البيت وتحافظوا على سلامتكم من الإصابة بفيروس “كورونا” المستجد.

    فلانتينو

    المسلسل من بطولة عادل إمام وداليا البحيري ودلال عبد العزبز، ونخبة من النجوم، وهو كان مؤجل عرضه من السنة اللي فاتت، وبتدور أحداثه عن “نور عبدالمجيد” الشهير بفلانتينو، واللي بيقوم بدوره النجم عادل إمام، والمسلسل كوميدي اجتماعي مليان بالمغامرات والمفاجآت.

    الاختيار

    هو مسلسل عن قصة حياة البطل المصري أحمد المنسي قائد كتيبة 103 صاعقة في الجيش المصري واللي استشهد عام 2017 أثناء تصديه لهجوم إرهابي في سيناء، وبنشوف كمان في أحداث المسلسل قصة هشام عشماوي الإرهابي اللي تم إعدامه مؤخرًا، وهو من بطولة أمير كرارة، أحمد العوضي، دينا فؤاد.

    فرصة تانية

    من بطولة ياسمين صبري وأيتن عامر وأحمد مجدي ونهال عنبر، وبتدور أحداثه عن المهندسة ملك اللي بتدخل في تجارب وعلاقات عاطفية فاشلة بسبب حبها للشغل، واللي بتلاقى نفسها لعبة في إيد كتير من الطماعين.

    خيانة عهد

    المسلسل هيشهد عودة النجمة يسرا للسباق الرمضاني، بعد غياب سنتين، وهيشاركها البطولة حلا شيحة وعبير صبري، وبتقوم يسرا بدور أم عندها مصنع ملابس، والمسلسل كوميدي اجتماعي.

    البرنس

    الفنان محمد رمضان هينافس السنة دي بيه، وبيشاركه البطولة روجينا ونور وأحمد زاهر وعبد العزيز مخيون، وبتدور أحداثه حوالين رضوان البرنس اللي بيقع في مشاكل كتير مع إخواته بعد وفاة والده وتحمله مسئوليتهم.

    لعبة النسيان

    هتنافس الفنانة دينا الشربيني في سباق رمضان 2020 بمسلسل “لعبة النسيان”، بمشاركة الفنان محمود قابيل وهنا شيحة وأحمد فهمي، واللي بتدور أحداثه، حوالين سيدة من الطبقة المتوسطة، هتفقد الذاكرة وهتتغير حياتها تمامًا، وهتدخل في صراع بين حياتها الجديدة ومحاولات تذكر الماضي.

    بـ100 وش

    النجمة المتألقة جدًا، نيللي كريم هتدخل السباق الرمضاني السنة دي بمسلسل كوميدي هيشاركها بطولته آسر ياسين.

    رجالة البيت

    هو مسلسل كوميدي من بطولة أكرم حسني، وأحمد فهمي، ولطفي لبيب والمغني ويزو، وأحداثه بتدور حوالين تيمون وبومبا اللي بينتقلوا للعيش في بيت جدهم.

    سكر زيادة

    المسلسل بطولة نبيلة عبيد ونادية الجندي في أول لقاء بينهم في تاريخهم الفني، وهو مسلسل كوميدي، وهيشارك في بطولته الفنانة القديرة سميحة أيوب، والفنانة هالة فاخر.

    ونحب تاني ليه

    بطولة الفنانة ياسمين عبد العزيز وكريم فهمي وشريف منير، وبتدور أحداثه حوالين مشاكل الزواج والأسرة.

    اتنين في الصندوق

    لأول مره هنشوف حمدي الميرغني وأوس أوس في بطولة مطلقة، وهيشاركهم في البطولة بيومي فؤاد وصلاح عبد الله، وبتدور أحداث المسلسل في إطار كوميدي عن فئة عمال النظافة، والمشاكل الي بيتعرضوا لها يوميًا.

    شاهد عيان

    هو عمل بوليسي عن علاقة حياة ضابط شرطة وعلاقته بزوجته وشقيقاتها، والمسلسل من بطولة حسن الرداد وهنا شيحة ووليد فواز وبسمة.

    سلطانة المعز

    الفنانة غادة عبد الرازق هتجسد فيه دور “سيدة” اللي عندها محلات كبدة ورثتها عن والدها وهتقع في الحب اللي هيغير حياتها، وهو من بطولة حسن حسني ومحمد لطفي ودينا ومحمود البزاوي.

    القمر آخر الدنيا

    المسلسل من بطولة بشرى ومادلين طبر وسميرة عبد العزيز وساندي، وبتدور أحداثه في إطار اجتماعي كوميدي.

    عمر ودياب

    بطولة نجوم مسرح مصر علي ربيع ومصطفى خاطر، وبيشاركهم البطولة نهال عنبر ومحسن منصور، وبتدور الأحداث في إطار كوميدي، من خلال شابين هيقعوا في مشاكل بسبب تراكم الديون عليهم.

    يا أنا يا جدو

    في البداية كان اسمه “كتف قانوني”، واتغير الإسم حاليًا لـ”يا أنا يا جدو” وهو من بطولة سارة سلامة ومحمد نجاتي وأحمد بدير ورنا سماحة وعبد الله مشرف، وبتدور أحداثه في إطار كوميدي حول شخصية الجد الغني البخيل اللي فاكر أن حفيده عاوز يستولى على ثروته.

    ولاد إمبابة

    وده أبطاله كتير منهم سمير غانم وفريدة سيف النصر وأحمد شيبة وسعد الصغير وأبو الليف وغيرهم، وبتدور أحداثه في إطار كوميدي حوالين سيدة بتولد 15 أخ وأخت ولما بيكبروا بيبدأ صراع الورث بينهم.

    الشركة الألمانية لمكافحة الخوارق

    هيكون مدة الحلقة 15 دقيقة بس، وهترصد الأحداث في إطار كوميدي لشخصين بيشتغلوا في شركة وبيتعرضوا لمشاكل، وهو من بطولة محمد عبد الرحمن ومحمد سلام وميرنا جميل ومحمد محمود.

    تقاطع طريق

    من بطولة منى زكي ومحمد فراج وسيد جب ومحمد ممدوح، وبتدور أحداثه في إطار رومانسي لما زوجين يحصل بينهم خلافات كتير، وتقرر الزوجة إنهاء كل المشاكل والسفر بره مصر.

    جمع سالم

    المسلسل هيجمع الفنانات زينة ودلال عبد العزيز وريم البارودي وسلوى خطاب، وهيناقش المسلسل في إطار درامي قضية التبني والمشاكل داخل الأسر المصرية.

    لما كنا صغيرين

    وفيه هتحصل جريمة قتل هتقلب حياة مجموعة من خريجي الجامعة الأمريكية وبيشتغلوا في شركة واحدة، ومن بطولة محمود حميدة وخالد النبوي وريهام حجاج ونسرين أمين.

    الفتوة

    من بطولة ياسر جلال وأحمد صلاح حسني ومي عمر ونجلاء بدر، وبتدور أحداثه في عالم الأحياء الشعبية، اللي بيديرها “فتوة” وبيتحمل مسئولية الأهالي.

    ليالينا

    بنشوف خلال أحداث المسلسل صراع كبير بين عائلتين بدأ في الخمسينيات وبتتصاعد الأحداث حتى الثمانينيات، وهو من بطولة غادة عادل وصابرين وإياد نصار وخالد الصاوي.

    أسود فاتح

    المسلسل بيناقش القضايا المصرية في إطار اجتماعي، وهو من بطولة هيفاء وهبي وأحمد فهمي وناصر سيف وحنان سليمان.

    السر

    من بطولة حسين فهمي ووفاء عامر ومايا نصري ونضال الشافعي، وبتدور أحداثه حوالين محامية ليها علاقة برجل أعمال، وهتكتشف سر خطير بخصوصه، وده هيسبب مشاكل كتير بينهم، وهيخليه يحاول يسيطر عليها ويتخلص منها باستخدام سلطته ونفوذه.

    كل سنة وأنتم طيبين، وبمسلسلات شهر رمضان مستمتعين!

    مقترح