The Definitive Guide to Living in the Capital , Cairo , Egypt

في أحد حلقات مسلسل الأطفال الشهير "Lazy Town" كان البطل "سبارتكوس" بـ يحاول يدافع عن اسم المدينة، اللي كان هـ يتم تسجيلها كـ "أكثر المدن كسلًا في العالم!".
وفي ختام أحداث الحلقة نلاقي "سبارتكوس" وهو عمّال يجمع في كل أهل المدينة علشان يقوموا يمارسوا بعض الرياضة بشكل جماعي.. في محاولة جاهدة لإنقاذ سمعة مدينتهم !

 
للوهلة الأولى… 

وأنت نازل تجري الصبح مع أحد مجموعات الجري الجماعي في القاهرة، أو وأنت ماشي الصبح -لغرض ثاني- وقابلت مجموعة منهم صدفة.. أو حتى وأنت قاعد في بيتك وبـ تقلب في صفحاتهم على مواقع التواصل الاجتماعي.. هـ تحس جدًا أنهم بـ يحاولوا يلعبوا دور "سبارتكوس" القاهرة !

نفس المشهد بتاع المسلسل المذكور، بداية من مشاهد الحشد للفعالية.. مرورًا بمشهد الولد اللي واقف ماسك مكبر الصوت علشان يشرح للناس طبيعة اليوم واللي هـ يحصل فيه.. ومشهد الصحاب اللي مشبكين في أيدين بعض علشان يشجعوا بعض.. ومشهد انطلاق الجري بشكل جماعي بعد الإشارة.. ومشهد الشباب اللي واقفين في كل حتة في الطريق عمالين يشجعوا الشباب علشان يكملوا (مع جملة: "عاش يا كوتش").. لحد مشهد انتهاء الجري، والتهنئة المتبادلة بين الموجودين -اللي يعرفوا بعض واللي ما يعرفوش- على إتمام المهمة !

الميلاد والنشأة

بدأت مجموعات ممارسة الجري في القاهرة بالمجموعة الأكبر والأشهر Cairo Runners في ديسمبر عام 2012 واللي أسسها المهندس الشاب إبراهيم صفوت، والحكاية من على لسان صفوت أنه لما سافر وقعد فترة بره مصر لقى أن الناس بـ يمارسوا نشاط الجري الصبح بشكل يومي في مجموعات صغيرة ..فعزم أنه يعمل زيهم، وبدأ يعمل كده لوحده، ولما رجع مصر قرر أنه يستمر، وبعدين بدأ يجمع صحابه وينزل يجري معاهم، وبعدين لقى ناس كثير بدأت تطلب أنها تشارك، وبدأت المجموعة تكبر لحد ما اتفقوا مرة أنهم يعملوا "Event" على الفيسبوك ويفتحوا باب المشاركة للي حابب يشارك، ويشوفوا الناس هـ تتفاعل مع الموضوع إزاي، وفعلًا بدأت الناس تشارك وبدأ الموضوع يكبر شوية بشوية، لحد ما بقينا نشوف العدد المشارك في الفعاليات بالمئات !

وفي الموسم الأخير للمجموعة بدأنا نلاحظ ظهور مجموعات ثانية في القاهرة والمدن اللي حولها علشان تحافظ على النشاط قائم في حال غياب Cairo Runners،
فنشأ بعدها Zamalek Runners و Giza Runnersوغيرهم ..وبدأ "سبارتكوس" يشد حيله !

شارك.. وانقذ سمعة مدينة الكسالى

طيب.. لو أنا عاوز أشارك؛ أعمل إيه؟ ويا ترى هما بـ يجروا قد إيه؟ وبـ يجروا فين؟
و …

اصطبر كده يا سيدي بس وبطل أسئلة، واسمعنا كويس وهـ نرسيك على كل حاجة.. بعون الله يعني، لو عاوز تشارك في فعاليات Cairo Runners تابعهم على صفحة الفيسبوك بتاعتهم، وتابع الـ Events اللي بـ ينزلوها أول بأول، ميعاد الجري بـ يكون يوم الجمعة الصبح (7 أو 8 صباحًا حسب ما هما بـ يحددوا على الإيفينت) والمكان بـ يتغير.. كل مرة بـ يجروا في مكان مختلف ..والمسافة كمان بـ تتغير، مرة 4 كيلومتر، ومرة 8 كيلومتر لحد ما يوصلوا للماراثون، وده بـ يجروا فيه حوالي 24 كيلو، وطبعًا كل واحد وقدرته، وبـ يبقى معمول حساب الناس اللي مش بـ تقدر تجري كثير بطريق مختصر للرجوع "Short Route" بحيث أنهم يجروا مسافة أقل.. ويستفيدوا من غير ما يتعبوا.

تمام كده يا سيدي؟ يلا سلام إحنا بقى.. يا دوب نلحق نجهز نفسنا لجرية الجمعة الجاية!

 

لو عاوز تتابع كمان Zamalek Runners شوف صفحتهم على الفيسبوك، وGiza Runners لهم صفحة على الفيسبوك كمان.