The Definitive Guide to Living in the Capital , Cairo , Egypt

المكان بـ يتم تخصيصه للمجموعات لقضاء يوم واحد على طريقة الـ Day Use من الساعة 9 صباحًا لحد 10 مساءً بس بشرط تكون مجموعات كبيرة لا تقل عن 100 فرد، وده لأن معظم اللي بـ يحجز بـ يبقى جامعات أو مدارس، لكن ممكن يبقى فيه استثناءات في أوقات معينة من السنة ويتم الحجز لأقل من 100 فرد بحاجة بسيطة. المكان بـ يقدم عروض مختلفة لقضاء اليوم، العرض الأول كالتالي؛ الفرد بـ يبقى بـ 100 جنيه شاملة تزلج على الرمال الناعمة الموجودة على مساحات شاسعة داخل جمعية أحمد عرابي، لعب مباراة كرة قدم على الأرض المغطاة بالصابون وما تخافش من الوقعات اللي مش هـ تبقى مؤذية زي ما أنت فاكر وتوقع كثير من المرح، وفيه Colored water fight أو خناقات الرش بالألوان والمياه الملونة، بالإضافة لاستخدام ملاعب الكرة والكرة الطائرة وتنس الطاولة بحرية تامة طوال اليوم. فيه بعض أنشطة برسوم إضافية زي ركوب الخيل ودي بـ تبقى الساعة بـ 100 جنيه، والسايس اللي معاك بـ يساعدك أنك تتعلم أساسيات الركوب، ولو كنت محترف ممكن تنطلق مع نفسك. وممكن عند الحجز تضيف مبلغ 50 جنيه للفرد وده يبقى شامل حفل شواء (باربيكيو) وبوفيه خاص لكل أفراد المجموعة. طبعًا المكان مجهز بإضاءات وسماعات علشان تشغل الموسيقى اللي أنت عاوزها وممكن تطلب يكون فيه DJ وقت الرحلة لكن بحساب منفصل.
العرض الثاني من «سمارت كامب» بـ يبقى فيه سباق سيارات بالبنزين زي الموجودة في ملاهي “دريم بارك” ولعب الـ Paintball. ممكن 9 عربيات يتسابقوا في نفس الوقت، وكل فرد في لعبة الـ Paintball  بـ يأخذ 100 طلقة، العرض ده بالإضافة لكل الأنشطة الرياضية الموجودة داخل الكامب (ماعدا كرة الصابون والتزلج على الرمال) بـ يبقى بـ 200 جنيه للفرد.
آخر عرض مخصص أكثر للعائلات ومجموعات الأصدقاء اللي تعرف بعضها البعض ونقدر نسميه عرض “Telematch” وهنا بـ يصاحب المجموعة متخصصين في ألعاب الذكاء والمرح وبـ يعملوا لهم برنامج ترفيهي متكامل للكبار والصغيرين، وبـ يقسموهم مجموعات للدخول في منافسات ظريفة بدنية وذهنية على مدار اليوم. والفرد في العرض ده بـ 100 جنيه برضه.
المكان بـ يوفر خيام لو تم الاتفاق على قضاء رحلة أو معسكر لعدة أيام، وممكن تعمل Fire Camping وتقعد حول النار وتشوي المارشميللو أو تعيش حياة بدائية جبلية، وكل ده بـ يبقى بمصاحبة فريق من المتخصصين بـ يساعدوك على تحقيق أقصى استفادة من المعسكر ده.